傳承，跟DNA無異，同為代代相傳，讓珍寶得以保存。
「星二代」之所以備受注目，全因贏在起跑線，遺傳了特級DNA，先天優勢加上後天努力，發放耀眼光芒，指日可待。
2024年將過，展望2025，盡得父母真傳的新世代，蓄勢待發。當中最矚目的，必屬「宇宙最強」甄子丹之女、20歲的甄濟如（Jasmine）！
勇闖樂壇的少女，踏上唱作人之路，我歌唱我心，承接年初單曲〈Forever 19〉大勇之勢，上周再推出首支廣東新曲〈次次〉，向難度挑戰，果然繼承了遇強越強的DNA。
由甄濟如領頭，準備於銀色道路上發光發熱的，還有不少「星二代」，讓星味傳承，跨世代發聲。

延伸內容: 甄子丹愛女出新歌 | 甄濟如邀林愷鈴細佬拍MV玩甜蜜戀愛

延伸內容: I Hope This Part of Me Will Stay 甄濟如

延伸內容:巴黎名媛舞會|甄子丹與愛女甄濟如共舞 獻唱主打歌望傳播華語音樂

20歲甄濟如 唱出我天地

為了精心炮製的新曲〈次次〉，甄濟如最近努力宣傳，訪問這天，即使身體抱恙，一面對鏡頭，她即熟練地擺甫士，用心回答提問，把「最強DNA」，發揮到極致。
「我喺上年嘅夏天寫咗呢首歌，有一晚我瞓覺前，突然諗到一句『Before I sleep, I write songs about you.』（在我睡前，我會寫關於你的歌），我都覺得好Sweet 、好Romantic！
「然後我諗，點樣可以令首歌更加Sweet呢？我就諗起電話裏面有個Emoji，係打鼻鼾嘅，所以我就諗咗ZZZ，即係『Before I ZZ, I write songs about you.』，跟住又用咗好多Texting嘅詞語，又搵咗鍾雪幫我寫咗廣東話嘅詞，就係𠵱家嘅〈次次〉。

爸爸甄子丹 媽媽汪詩詩率先品評

新曲面世前，甄濟如先讓家中最專業的樂迷：爸爸甄子丹及媽媽汪詩詩，率先品評。
「佢哋都好鍾意，而且都係第一次聽我講廣東話講得咁快，仲叫我練多啲廣東話。其實喺錄音之前，爸爸都有陪我練廣東話，佢嘅廣東話係屋企入面最好嘅，我都好多謝佢咁Patient（耐心地）陪我去練。」
精通英文、普通話及上海話，甄濟如坦言，自己要再多花功夫，學好廣東話。
「今次係錄音錄得最慢嘅一次，錄咗兩日，到拍攝MV當日都仲未錄完！雖然兩日唔算太耐，但in my own mind就覺得好耐！我係一個心急嘅人，但係今次又唔急得，首歌好快，我更加要練好咬字。
「學好廣東話係我全新嘅目標，𠵱家我有時都唔知點樣用廣東話去表達自己，要再努力啲。」

落區派自製報紙 同粉絲零距離接觸

除了歌曲創作，點子多多的甄濟如，早於〈Forever 19〉時，已想出用自動拍照機作宣傳工具；這次她也有新意念。
「今次去派報紙宣傳〈次次〉，係我自己諗嘅，因為我覺得報紙好玩，同埋𠵱家係一個trend，to be like old-school and throwback（懷舊風），Sabrina Carpenter都玩嗰個60s、70s主題，所以我都想玩吓囉。」
於是，上周五（8日）新曲面世當日，她便落區派自製的報紙，跟粉絲零距離接觸。「I'm excited！我覺得好好玩！」

前作〈Forever 19〉連獲兩提名

宣傳新曲是現在進行式，甄濟如的前作〈Forever 19〉，則入圍港台「第三十五屆國際流行音樂大獎」，獲提名「最受歡迎十大國際金曲」及「最受歡迎女歌手」，跟她剛提到的Sabrina Carpenter、Taylor Swift等，角逐獎項。
「我好開心可以入圍！候選名單入面，好多都係我好鍾意嘅歌手，可以同佢哋一齊入圍，我覺得好榮幸！
「我出〈Forever 19〉嗰時，啱啱20歲，𠵱家就嚟去到年尾，我覺得我認識自己多咗，無論係音樂、Fashion，都了解多咗自己，對自己多咗信心！好似我之前唔係好知邊類型嘅Fashion自己可以着，𠵱家會自在啲，會自己揀衫；音樂嘅話，我知點樣可以寫一首歌，代表我嘅style。」
在歷練中成長，甄濟如同時已展望2025年。
「係一個Surprise！我好鍾意Surprise其他人，所以我寫咗好多歌，但仲未出嘅。我都希望可以多啲表演；仲有我想同唔同嘅Artiste合作，因為每個歌手，都有自己特別嘅風格，我想學多啲嘢。」

甄家傳統 為家人製造驚喜

為在台上追夢，甄濟如不放過每個生活細節，從而獲取靈感，更有「出賣朋友系列」。
「我自己有自己嘅靈感、自己嘅想法，喺我寫一啲好Sweet嘅歌嘅時候，我全部都係靠自己嘅imagination，同埋睇電影，仲有聽朋友嘅stories。我冇時間拍拖呀！
「我同朋友Share我今次首歌，仲有我其他嘅歌，佢哋都話同佢哋嘅experience好似喎，I was like yeah！我用佢哋嘅story做歌吖嘛，Surprise？哈哈！」
愛驚喜的甄濟如，也會為家人製造驚喜，原來這是甄家的傳統。
「父親節嘅時候，我同細佬（甄濟嘉）拍咗爸爸喺《殺破狼》嘅經典場面。因為我細佬好鍾意睇《殺破狼》，而且我哋都鍾意Surprise，我媽咪教我哋去Surprise everybody！所以我哋就想Surprise爸爸。
「我都有俾佢哋Surprise到！以前我成日去嗰啲學校旅行，返到屋企，就見到成屋人都拎住寫咗Jasmine嘅牌、拍手掌嘅玩具，係咁歡呼『Jasmine！Jasmine！Jasmine！』嚟歡迎我。」
受惠的，還有媽媽汪詩詩。
「我都會Surprise我媽咪，平時都會畫畫或者買一啲禮物俾佢。我記得今年我媽咪生日，我就請佢全部嘅朋友嚟，而佢係完全唔知嘅。佢一打開門，就見到啲Friend，好似喺花園咁，好Surprise！」
傳承了星味、驚喜，但甄濟如笑言，暫時未有打算，繼承外婆、媽媽及姨姨汪鎂庭的巧手廚藝，反而自我開發了另一路線。
「我唔煮嘢食，但係我鍾意沖咖啡、拉花，係我一個新嘅Hobby。喺屋企，我爸爸、媽媽一話：『我想飲杯咖啡。』我都會沖俾佢哋飲。爸爸每日都飲Espresso；媽咪就飲Latte、Flat white，而且呢，佢哋都好鍾意飲Mocha！」

速睇！重情少女手袋乾坤

常說少女情懷總是詩，手袋，更是謝絕探訪的禁地，甄濟如聞言一笑，附帶坦然的一句：「What’s in my bag？可以俾你睇！」
不論袋外袋內，都顯出其重感情的一面，即窺少女之秘！