電影《得寵先生》將於11月7日亮相「HKAFF香港亞洲電影節2024」，並於同月28日正式上映。男主角鄭丹瑞（旦哥）破天荒飾演火爆廢老，與戲中女兒廖子妤吵吵鬧鬧，旦哥竟點名讚她有120分的超班演出。而首次拍電影的馮允謙（Jay），以「薯look」造型上陣，並與愛心爆棚的狗義工盧慧敏（Amy）合演情侶，還有飾演Amy閨密的動物醫生黃正宜（阿正）。電影將於11月9日舉行兩場「狗狗友善電影放映會」，旦哥和Amy更會現身分享拍電影的感受。

延伸內容：《破·地獄》 | 黃子華許冠文孖衛詩雅出席東京國際電影節

延伸內容：《女兒的女兒》入圍東京國際影展 林嘉欣闊別20年 與張艾嘉母女團圓

延伸內容：看我今天怎麼說︱游學修挑戰聾人角色 學手語跟聾人交流 榮獲金馬影帝提名

旦哥名曲現場播放

       早前一眾台前幕後和狗演員們舉行開鏡拜神儀式，風趣幽默的旦哥與一眾年輕演員打成一片。廖子妤更大爆在拍攝現場曾播放旦哥演繹的一首名曲《留給最愛的說話》，她笑說：「一播讀白『嗰條濕滑嘅馬路，嗰個粗心大意嘅司機』，旦哥就會問我哋『係咪想聽Live？唔做！』我哋好期待佢現場演繹，但佢又唔肯！」唱家班Jay說：「旦哥好鍾意聽Jazz，等埋位就唱，我好想同佢Jam歌。」

香港第一代Rapper

       Jay續稱：「我知道旦哥出過歌，聽講係香港第一代Rapper！」旦哥1993年推出歌曲《那夜我替女兒「R」背脊》，唱到街知巷聞。旦哥回應：「我查過Rapper意思，即係『數白欖』，我係第一代『數白欖』，你哋摩登啲咪叫Rapper囉！『那夜我替女兒R背脊......』我係用羅文、鄭少秋腔，『R得佢舒服......』。」在旁的阿正爆笑，旦哥的歌興即被打斷，還扮生氣對她說：「你再笑就冇面畀！」

發揮主持本色

        阿正期間也發揮主持本色，訪問各人對前輩旦哥合作學到的東西和優點，廖子妤大讚戲中爸爸旦哥：「高、靚仔、好脾氣、好肯教新人，又成日請我哋飲咖啡，太多優點，我真係唔想離開個劇組！」旦哥笑說：「你數緊MIRROR？我係第13人。」廖子妤強調是真心話：「同旦哥合作好大壓力，但又好易入戲，佢真係畀到我『爸爸』嘅感覺，我哋有幾場戲一見面就要面左左，戲中父女關係有啲似我嘅真實故事，所以好容易投射到。剛才拍嗰場，喊到不得了，多謝旦哥！」旦哥說：「佢投入到，我希望佢有80分，結果佢做到120分。」旦哥對廖子妤有很高的評價。

對狗有敏感照拍

        風趣的旦哥又時常扮惡樣，他說：「呢部戲將真實嘅鄭丹瑞顯露出嚟，燥狂啦，郁啲就鬧人，你哋覺得好，其實係假嘅，我只係將自己好多真實嘅一面挖出嚟，好赤裸，但好好，可以試一次咁樣做，好難得今時今日遇到好劇本，我亦最開心遇到新導演，過去幾十年，好多人幫我，好多貴人。去到今日我覺得係時候幫得上、有需要我，尤其係電影，我就去幫。最重要嘅一件事，其實我對狗係有敏感，而我竟然同狗狗拍咗一部電影，建立咗好好嘅關係，呢個係一個好大挑戰，好好玩！」

為劇情增添歡樂

        阿正揚言爸爸是旦哥的鐵粉，她說：「我𠵱家企喺旦哥隔離好光榮，Hello Daddy媽咪！最緊張同旦哥有一場嗌交戲，劇情講我同Amy懷疑旦哥落毒害啲狗，然後我哋對罵，期間Amy同旦哥嗌交我就夾喺中間。大家都睇到身高差別，我對佢哋毫無威脅，所以有啲插科打諢嘅感覺。」她富本色的演出，為嚴肅的劇情增添不少歡樂。

Jay怕被嫌棄

        本身很喜歡動物的Amy坦言特別開心，她說：「我最感恩係可以同有經驗嘅演員合作，學到好多嘢，拍攝、待人接物、處事同處理自己情緒。」廖子妤鼓勵她：「你做得好好！」Jay說：「最難忘有一場戲，我哋同Amy要搬運鐵欄，旦哥就問我一條IQ題，𠵱家唔劇透住，但好好笑，好開心！」Amy繼續爆料話：「最搞笑係場戲拍完，到𠵱家，阿Jay仲未明白IQ題嘅答案。」
第一次拍電影的Jay表示又緊張又興奮，他說：「今次第一次拍電影，感覺比我預料中好，雖然我唔係好多戲份，但都會無得瞓覺同好大壓力。我同Amy對手戲較多，同佢合作好舒服，佢冇嫌我做得唔夠好，仲成日鼓勵我，多謝Amy！」Amy受寵若驚說：「我點會嫌你呀！」

故事大綱：

60歲臭脾氣的長者任春佳（鄭丹瑞 飾）一直過着獨居生活。他在被迫退休後回望自己的一生：婚姻失敗、父女關係疏離。生無可戀的他，決定上山尋死，幸好垂死一刻被流浪狗燒腩發現，引領動物義工鄧悅娜（盧慧敏 飾）救他脫險。燒腩的靈性與令人窩心的舉動，令原本討厭狗狗的佳叔對流浪動物改觀，也與悅娜成為了好友，並加入悅娜所辦的動物中心「汪之家」當義工，幫助被遺棄的動物。悅娜亦助佳叔藉此解開與女兒任素儀（廖子妤 飾）積壓了20多年的心結。正當佳叔以為人生將要重回正軌的時候，他所住的村莊卻突然發生數十隻流浪狗被毒殺的事件......