發佈時間：15:07 2024-10-31
「屈臣氏健康美麗大賞2024」昨晚（30日）在尖沙咀舉行，鄭嘉穎、劉陳小寶、陳細潔、曹敏莉和黃百鳴等出席，馮允謙（Jay）和雲浩影（Cloud）則擔任表演嘉賓。鄭嘉穎和曹敏莉談湊仔經，鄭嘉穎因兒子不愛講廣東話和愛看周星馳電影而要家長指引；貪靚的曹敏莉笑言去旅遊不忘搽防曬，更會與子女分享保養心得，並直言13歲大女較文靜，不欲培育她選港姐。
為兒子苦惱
鄭嘉穎最近忙於照顧分別5歲半、4歲和1歲多的兒子，他表示長子和次子就讀的幼稚園以英語及國語為主，寫中文名十足十象形文字，尤其是次子不肯學廣東話，所以他決定為他報考以廣東話為母語的直資小學，他解釋：「讀我以前間學校，太太都同意，因為我爸爸都係讀同一間中、小學，我希望可以維持呢個傳統。」
而鄭嘉穎的大仔近日喜歡看周星馳的電影，更學會了一些用字，有次突然講了一句：「你碌廢柴！」其實兒子不知道是甚麼意思，但鄭嘉穎聽後卻嚇了一跳，表示要家長指引。他更透露現時會追看中外影視作品，大讚黎耀祥在《巾幗梟雄之懸崖》演得好，亦挑起他的戲癮，「有時我會諗自己做佢個角色會係點，等緊好玩嘅劇本同角色。」
女兒比較靜
前港姐曹敏莉提到與家人去完迪拜旅行，玩樂不忘做足防曬和護膚程序，她更會將保養心得與子女分享，她坦言：「3個仔女似我朋友，13歲大女長得高過我，我哋會一齊傾心事、聽《APT.》；11歲二仔係我嘅小幫手，平時去超級市場會幫手攞嘢，7歲三仔似BB，喺屋企个係萬千寵愛。」問她會否陪育女兒參選港姐，她續說：「女兒比較靜，冇乜表演慾。」
旅遊冇艷遇
Cloud早前自掏腰包5位數請家人赴首爾旅行，享受家庭樂之餘，也順道作小休，但未有艷遇，她解釋：「可能我太『正』，同埋始終合家歡旅行，好難吸引異性埋身，況且言語不通，而擇偶條件係咩？要著重心靈溝通。」
結婚Hold住先
Jay早前完成紅館演唱會後，也與家人快閃遊濟州島3天，女友因趕回加拿大工作而未有同行。他笑言在當地餐餐食韓燒，擔心影響之後工作。由於目前正藉事業衝刺期，會珍惜工作機會，結婚計劃暫緩，他笑言：「女朋友之前帶朋友睇我演唱會，佢覺得幾威，佢支持我先努力工作。雖然未有結婚計劃，但我一早認定佢，我心裏面只有佢一個！」
