發佈時間：18:50 2024-10-21
Twins蔡卓妍（阿Sa）和鍾欣潼（阿嬌），日前於佛山完成第13場內地巡迴演唱會，亦是Twins在內地最後一場演唱會，歌迷特別不捨，所以由第一首歌開始，便企晒起身瘋狂跟住Twins又跳又唱，直至散場仍不肯坐低。阿嬌見歌迷如此熱情，被感動到眼濕濕。其後兩人唱到不少經典金曲時，每每又被歌迷的大合唱歌聲感動到眼紅紅。到完場時，兩人終忍不住落淚，不斷抹眼淚，不捨與歌迷揮手道別，場面感人！
延伸閱讀：TWINS 請關智斌唱死性不改 單手打側手翻 核爆紅館
粉絲由頭企到尾
當晚不少歌迷以特別裝扮入場睇Show，有人扮古裝，有人着睡衣，又有人扮小丑爆炸頭，氣氛非常熱鬧！由於這是Twins在內地最後一場演唱會，所以演唱會一開始，歌迷已企晒起身陪Twins又唱又跳，故第一部份快歌完成後，阿嬌見歌迷如此熱情，已經開始被感動到眼濕濕，坦言：「嘩！咩事，一出嚟就已經想喊！」兩人唱到不少經典金曲時，每每被歌迷的大合唱歌聲，感動到多次眼紅紅。至完場時，兩人終忍不住淚水，到大合唱《唱風箏與風》時，被感動得不斷抹眼淚，十分不捨與歌迷揮手道別。
準備驚喜畀阿Sa
今年初，Twins在香港演唱會的頭場，正是阿嬌的生日，阿Sa為她慶生，叫全場觀眾砌不同顏色的生日；當晚就輪到阿嬌畀驚喜阿Sa，為她印製好全場都看到的「蔡卓妍生日快樂」橫幅。於Talking位時，阿嬌請萬多觀眾高舉生日牌，為阿Sa高唱中文版的生日歌；阿Sa收到驚喜，感動說：「嘩！咁早慶祝生日......好感動，我爸爸同埋我隻貓呢，都係就快生日，佢兩個都係10月23號生日，大家不如送埋個祝福畀佢哋喇，我爸爸坐喺邊呀？生日快樂呀！」
巡唱開足27場
Twins繼這13場內巡後，加埋年頭在香港舉行的14場紅館Show，已經破晒二人的演唱會紀錄，唱足27場。阿Sa在舞台上十分多謝歌迷陪她們完成今年的創舉，不斷打破Twins演唱會紀錄，走過這段巡演日子其實也不容易，每星期都要去不同的地方演出，很難忘！她說：「真係好唔捨得呀！多謝大家陪我哋一路完成呢個巡演，一路上好多應緩，好多愛，多謝大家陪住我哋走過呢23年！」
展開10多場外巡
內巡圓滿結束後，下個月兩人就開始展開10多場的外巡。先會小休一下，跟住將會到倫敦、溫哥華、多倫多和拉斯維加斯等地巡演。阿Sa續說：「之後我哋去英國、加拿大，唔知會唔會見到你哋呢？」歌迷即大聲回答：「會呀！」
訂製專屬行李帶
為了即將展開的國外巡演，阿Sa稱她已特別訂製了Twins專屬的行李帶，給每位工作人員，亦非常期待去加拿大看尼瓜拉瓜大瀑布。到加拿大巡演時，正是她的生日（11月22日），當地朋友已經準備好為她慶祝。而冬天的加拿大特別寒冷，阿Sa和阿嬌都坦言自己是怕凍的人，最厚的羽絨都會帶過去，阿Sa更笑言：「已經學會了穿盔甲，到時可以幫阿嬌整埋，阿嬌就話，最希望去睇羚羊峽谷。」阿Sa忽發奇想表示：「不如搞個團，畀歌迷一齊報名，一齊去睇演唱會，一齊去參觀景點，反正我哋中間會留喺當地玩，咪一齊囉，哈哈！」
以聖誕妝扮現身
問到她們去到英國會否約著名填詞人黃偉文（Wyman）見下面？阿SA笑道：「佢對『多謝失禁』同『愛情當入土』好有興趣，哈哈，見面一定同佢度下。」阿嬌就話，聖誕節在英國過倒是第一次，所以在演唱會中，會諗下會否有個聖誕特別版的演出？兩人已在構想如何以聖誕妝扮現身，她們異口同聲說：「海外場冇咁大，可以同觀眾距離好近，應該會更加開心，或者可以叫佢哋再扮番Twins造型入場，或者扮聖誕樹，我哋可以揀最佳衣着，着得勁嗰個一樣有大獎。」阿Sa就開心和應，希望到時可以跟英國的歌迷，過一個快樂的聖誕！
