發佈時間：15:43 2024-10-19
有「最索經理人」之稱的林寶玉（Connie）去年與「亞視一姐」薛影儀鬧翻後，二人昨晚（18日）一同出席「綠魔」許嘉浩（Karl）的慈善生日派對，首度公開碰頭。當要求二人合照時，阿儀即衝口而出話「嗰條八婆喺度」，並拒絕合照，林寶玉則顯得一臉尷尬。雖然最後都走唔甩影大合照，但她們一左一右企得好遠，之後在現場更是「零」交流。事後林寶玉自爆去生日會前收到風有機會畀人打；阿儀則斷言與林寶玉生肖唔夾，恩怨難化解！
面阻阻「零」交流
向來人脈甚廣的形象指導Karl，昨晚舉行盛大的生日慈善派對《K. LOVE ! 2024》CHARITY FASHION PARTY，一眾好友如龐景峰、劉溫馨、尹蓁晞、趙哲妤、嚴淑明、黃榕和薛影儀等一早到場。當阿儀與黃榕在布景板影相時，巧遇剛來到的林寶玉。這是阿儀和林寶玉自反面後首度同場，有指阿儀一度行開爆Seed說：「嗰條八婆喺度。」而林寶玉知道後亦表現得一臉尷尬，之後與阿儀面阻阻「零」交流。直至Karl要求影大合照時，她們才勉強一齊影，但都是各據左右分開企，以免引起正面衝突。
收電話畀人打
其後林寶玉受訪時透露，事前有人曾致電給她，聲稱有人會在生日會打她，嚇了她一跳，幸好冇發生任何事。問到是否有人在挑撥離間？她說：「唔知道，我都唔知發生咩事。（會同阿儀合照嗎？）我哋之前經常一齊，但𠵱家避免先，暫時唔會諗合照，等件事淡啲再講。我剛才有見到佢，但佢應該冇見到我，如果碰面會打招呼。（有聽到佢講八婆嗎？）我聽唔到，但嚟之前聽到有人話打我覺得有啲驚，我仲問大會有冇保安，都要保護自己嘅人身安全。」
畀人鬧完算數
她又稱今晚有男性朋友在場，可以保護她，也不會刻意提早離場，她笑言：「如果聽到難聽嘅說話聽完就算，鬧係冇意思嘅，大家又唔係仇家。」講到工作，林寶玉透露正與亞視洽談經理人工作和舉辦亞洲小姐，有消息會再公布。
自爆生肖唔夾
而阿儀被問到見到前經理人林寶玉會否尷尬？她只表示見到個八婆，問她是否很嬲？旁邊的黃榕為她解圍，並叫她要開心一點。阿儀就很多謝黃榕叫她來生日會，並稱與黃榕的生肖很夾，所以大家是很好的朋友，之前更一起到內地遊玩。問她可覺得與林寶玉不夾？阿儀直言：「係吖，我同佢生肖唔夾，佢脾氣唔好。」她續稱與林寶玉由去年開始已沒有見面，又說最近有人送她淨化水，問她可會用來化解恩怨？她即表示不講這些，她只用來噴屋企。
嘗試做和事佬
再問黃榕可會為二人做和事佬？她說：「我有叫阿儀唔好鬧人，佢答應咗我，不過佢一見到就唔想影相、好抗拒，剛才我都畀佢嚇咗一跳，其實件事已經過去，希望大家再見亦是朋友，相信時間可沖淡一切。」
慶生籌款行善
而壽星Karl今年搞的生日派對，除了有時裝騷外，又大搞慈善，他表示︰「生日願望係大家身體健康！由於我每年都會幫助唔同嘅慈善機構，今年叫啲朋友唔好買生日禮物，而係捐錢畀慈善機構，所以今年籌得嘅生日善款，會捐畀有艇搭慈善基金會。」
