《法證先鋒VI：倖存者的救贖》自熱播後引發不少迴響，不少新加盟角色均吸獲好評，當中不得不提的，是突破觀眾想像、以超搞笑Style、每次亮相均將「爆Bud」掛在嘴邊的法證部高級化驗師陶總（林盛斌飾），陶總與余星柏（黃宗澤飾）一滑稽一嚴肅的化學作用，令不少網民捧腹叫好。

阿Bob一輪嘴戰術好搞笑

其實阿Bob首集一出場已引爆笑點，面對星柏為求化驗不惜工本的處事手法，作為高星柏半級甚或一級的陶總自然眼都凸埋，更懶有型衝進星柏辦公室理論，務求以一輪嘴戰術擊退星柏，可惜最終熱臉貼著冷屁股！來勢洶洶的陶總先企圖以職級拋窒星柏：「我個title係acting總化驗師，高唔過你一級都半級」，豈料星柏只冷淡地回應：「所以個問題係？」眼見勢色不對的陶總續說：「好多人以為我老豆係保安局局長，我先坐到呢個位，覺得我廢（下刪三千字）…想蝦我，你明唔明？」星柏繼續冷淡：「嗯，不如講重點吖」，被逼到走投無路的陶總開宗明義指爆budget不能接受，但還是被星柏用真尿液做化驗大大拋窒，最終以一個「你咁都得」表情結束對話，十分搞笑。

林盛斌獲讚天生就是笑匠

對於阿Bob這個超乎想像的高級法證人員設定，網民普遍大為受落，除記牢了「最緊要唔好爆budget」這句台詞外，又大讚阿Bob天生就是笑匠：「都唔明點解TVB唔索性開部笑劇由阿Bob做男主角，佢唔使講嘢已經可以令觀眾笑喇，喜感十分強烈」、「好想睇阿Bob好認真咁講分析」、「唔知點解望見阿Bob樣，無論點都諗唔起認真，好想笑」、「Bosco佢哋忍笑會唔會好辛苦」、「一個滑稽一個冷漠，很搞笑」、「好想集集都睇到陶總」、「喜劇面孔，笑匠身形」、「你天生個樣就係一個笑佛，帶畀人哋正能量同開心」；並笑言阿Bob的出現令人想起《法證》元祖級演員Bobby（歐陽震華），網民：「睇落，好似阿Bobby返咗法證先鋒」、「搵唔到Bobby就搵阿Bob，都係差兩個字」。
對於角色斬獲不少好評，Bob受訪時坦言多謝佳導：「首先，好多謝鍾澍佳先生搵我拍呢個劇，我曾經都有問過佢，搵我做一個咁專業嘅高級化驗師角色，得唔得㗎？跟住佢都有話畀我知，因為套劇好大部份嘅時間都係死人冧樓，劇情好沉重，想用我呢個比較調皮同有少少搞笑嘅角色，出嚟緩和吓啲氣氛。」對於有網民笑言阿Bob演高級法證人員驟眼看撞樣麵包超人，阿Bob對此笑言：「麵包超人就由細到大啲人都咁講㗎啦，之後又有人話似一拳超人，又或者好多日本動漫角色，咁我梗係覺得冇乜所謂啦，最緊要大家覺得開心。」

Laptop孟希璘成為「歡樂擔當」

另一位搶眼新角色，是憑《愛‧回家之開心速遞》Laptop角色成功入屋、在《明星運動會前哨戰 : Fight盡》有亮麗表現的孟希璘（Ball），孟希璘在劇中飾演娜娜（蔣祖曼飾）經理人可樂，與娜娜時而情同姊妹時而鬥氣冤家；對娜娜服務至誠又認真做事的可樂，因性格大頭蝦兼處事不夠周到，經常有意無意累倒娜娜，從而引爆無限笑彈。

對於飾演烏龍經理人，孟希璘很開心能在正劇中成為「歡樂擔當」，笑言角色性格貼近真實性格之餘，又感恩終能突破自身短髮限制，告別警察及硬朗角色，並感謝監製小龍找其出演可樂。談到與劇中「阿姐」蔣祖曼Joman合作，孟希璘大讚對方超級Nice：「佢人品太好喇，係大愛嗰種人！無論台前幕後一聽到我同蔣祖曼合作，第一句一定係『恭喜你』。佢係一個無論開工有幾攰、自己有幾辛苦，佢都係超關心人。」她透露Joman為演活名模角色，刻意減肥，但即使自己在吃健康餐，Joman仍會關心希璘的伙食：「佢知我鍾意食肉，會問夠唔夠肉食，要唔要幫我嗌外賣，佢係會不停咁諗人哋。」

連環Ng幸獲「兒時男神」黃宗澤鼓勵

希璘又謂很開心能與「兒時男神」黃宗澤（Bosco）合作，大讚Bosco對台前幕後人員都照顧周到之餘，又經常萬歲請食「好西」。她透露第一天開工便與Bosco演對手戲，雖然對白不多但因稍為蹺口多番NG，但Bosco不但完全沒有怪她、更安慰她，孟希璘說：「Bosco每一次畀足所有反應，亦冇怪我。休息準備下一場時，佢仲同我傾偈，話少少狀態唔好唔緊要，總之放鬆就OK。」