現年32歲的吳若希（Jinny），與老公何兆鴻（Alex）結婚至今踏入第7年，女方過往亦多次在網上「公審」老公的「惡行」，成為他們夫妻之間的另類生活日常。被網民冠以「惡妻」之名的Jinny，近日連環出post「公審」老公，質疑他想偷食女同事，搞到Alex需要狂煲煙減壓。
據悉，Jinny之所以對老公身邊的異性特別敏感，皆因Alex有一筆令她難以釋懷的風流帳！當年，兩人拍拖時，因Alex曾隱瞞有一位模特兒女友，而引致Jinny無辜被網民鬧是「小三」，受盡屈辱！

結婚7年

2017年，吳若希（Jinny）與澳門闊少何兆鴻（Alex）結婚，婚後育有一對子女，大女Giselle現年7歲，而細仔Kylian則3歲多。雖然兩公婆經常在社交平台分享幸福生活照，但Jinny亦多次在網上「公審」老公的惡行，包括：她曾因不滿老公經常打機而掟爛電腦；還有，她曾燒掉老公前女友送的頸巾。

Jinny在網上節目上表示：「我發現咗有呢條頸巾嘅存在，而佢冇承認過，同我講有呢一位前度。又係死口唔認，我咪放火燒咗佢條頸巾！」甚至寸爆老公「無能」，在Alex今年38歲生日，Jinny除了送上精美可愛生日蛋糕之外，竟然買了兩本怒轟老公的書籍《無能老公圖鑑》和《老公怎麼還不去死》做生日禮物，夠晒啜核！

Jinny被網民冠以「世界級港女」、「惡妻」之名，而Alex經過多年的「洗禮」後，鍛煉出極高的EQ，既不怒亦不怨，連生日願望亦只想老婆在自己的身邊。Jinny也坦言：「我老公好鍾意俾我鬧，佢有陣時係冇嘢搵嘢嚟做，鬼鬼祟崇故意走過來，博鬧兩句就走開。佢俾人鬧少咗之後，存在感就會好低！」

上星期，Jinny又再連環出post「公審」老公，質疑老公偷食女同事。她插爆Alex對女同事管接管送，兼且上門簽文件，還公開兩公婆的對話截圖，當中更包含粗口：「好XSweet呀，仲可以同人一齊搭地鐵返工！」
    
而Alex就解釋只是約對方簽MPF；接着，Jinny寸爆回覆：「真係好大嘅原因呀，叫佢簽MPF，就要車人返工，又要陪人搭地鐵，好XSweet呀，你唔好俾人影X到呀！」跟着，Alex反駁說：「其實我真係已經好多嘢煩，我唔明點解我咁樣我都要俾人鬧，我唔同你講鬧我都正常，我真係做嘢，我之前幾年做垃圾做唔到嘢又鬧，我𠵱家做正經嘢都鬧！」Jinny即刻追問：「做嘢又要俾我鬧？你做啲咩俾我鬧？」

事後，Jinny亦發表感受：「其實呢，女人呢係好敏感嘅，你趷起條尾，都已經知你會做咩㗎！今朝何生好積極咁話要車同事返工，俾我話完之後，好有骨氣地講，連車都唔揸自己搭地鐵！我又唔知點解，突然間覺得佢應該係搭地鐵搵佢公司同事，我chok完佢第一句，佢又真係答我係wor！」

篤信命理

她續說：「即係我自己都有公司，都有幫人哋供MPF，我𠵱家先知，原來MPF需要老闆親自攞文件俾員工簽！男人呢，就好得意嘅，身有屎嗰陣呢，就會話自己已經好多嘢煩，怪番女人唔體諒佢！」看得網民一地花生！經過連日的「公審」後，Alex最終亦「跪低」向老婆認錯！

2016年，Jinny與Alex公開戀情後，男方即被人爆大鑊，指他一腳踏兩船，已有一位模特兒女友Toby Sin；接着，Jinny便被網民鬧是「小三」。當時，Alex不甘Jinny受辱，立刻在社交網出聲明，表示和Toby沒有感情轇轕，與Jinny才是真愛！當時，Jinny亦有在社交平台轉載Alex的聲明，並留言寫道：「如果被我發現你有咩呃我，你就死梗！」

據密友透露，由於Alex有「前科」，搞到Jinny疑心勁重，欠缺安全感，故她對於所有出現在老公身邊的異性，都會特別敏感，Alex當然責無旁貸。此外，2022年，富貴KOL兼Toby Sin的前夫Sean Lam，就在社交網站爆料，聲稱有傳聞指Alex曾找玄學家陳定幫算過命，因為陳師傅算到Jinny比Toby更旺他，所以他才決定揀Jinny。難怪，Alex對老婆千依百順、忍氣吞聲、乖乖做「廿四孝老公」，惟有趁老婆不在身邊時，先至狂煲煙減壓！