發佈時間：17:38 2024-06-10
一家人，整整齊齊，圍爐談笑，是最幸福的畫面。蘇韻姿兩度擁有過，失去過，緣來緣去，父親和母親努力過後，始終都要走上仳離之路。
蘇韻姿接受東周刊副社長黃庭桄訪問，在父親節前夕，訴說不一樣的爸爸，不一樣的故事。
在加拿大長大的蘇韻姿，是加拿大傳統四大名校之一的皇后大學的畢業生，蘇爸爸是加拿大賭場首位亞洲人當管理層。惟蘇韻姿和弟弟年紀小小，就要面對雙親離異，全因蘇爸爸的風流，和第三者育有一子。
分開簡單，抹去往事極難，幾多溫馨燭光晚餐。面對雙親首次分開，蘇韻姿最難忘的，是媽媽日以繼夜，為口奔馳，勞累不堪的樣子。「喺我好細個時，爸爸有第二個家庭，所以只有我同媽媽、細佬三仔乸一條命。媽媽好辛苦，一個人打四份工，我同細佬兩個『蕃薯』係靠媽咪好努力養大。」
爸爸令異性歡迎，到處留情的原因，作為女兒，蘇韻姿不敢去評論，只可以尊重對方的選擇。「每一個人都有自己嘅選擇，爸爸同媽媽作出咗自己嘅選擇，所以我知道成個成長過程係點樣，希望有一日，我可以孝順返屋企人。」
媽媽照顧丈夫私生子
愛，不簡單。蘇爸爸和第三者分開後，返回蘇媽媽身邊，更把私生子交給蘇媽媽照顧，蘇媽媽視如己出，相信沒有相當的宏量與寬容，也做不到。
「大約我12、13歲時，爸爸同媽媽復合，當時先知道，原來我多咗個細佬。初時大家都未磨合得到，始終呢個細細佬已經8歲，其實佢都好慘，突然間佢嘅家庭狀況有咁大轉變。」
「媽媽始終想我同細佬有番自己嘅爸爸，加上爸爸同之前嘅太太分開咗，覺得成十幾年冇乜點陪過我同細佬，所以決定復合，希望一家人齊齊整整。我當時覺得，終於可以一家團聚，可以話畀人聽：『呢個係我Daddy，呢個係我媽媽』。」
「當初係有好多困難，始終分開咗生活咁耐，但大家都感受到對方努力，無奈最終都係唔得，唔適合，始終就係唔適合，我都有勸媽媽：『算啦！我哋都有嘗試過！』而細細佬對我媽媽都好好，佢哋都好friend。呢點都好感恩，因為多咗一個人錫媽咪，而我同細佬讀大學之後，都有多一個小朋友陪吓媽咪、畀佢照顧。」
復合‧再分開
最終，蘇爸爸選擇再離開，覓得對象再另組家庭。或許已非首次，當中的傷痛，對蘇韻姿來說，不可說是完全沒有，只是無奈，刻下最重要的，是照顧再次被拋棄的媽媽，故蘇韻姿重返一家之主的崗位，也是半個媽媽。
「媽媽講返畀我聽，第一次爸爸離開時，我大約三、四歲已經識得主動問媽媽：『月尾嘞，夠唔夠錢交租？』當時媽媽聽到係好心悒，覺得我咁細個係唔需要擔心呢啲嘢。始終我係家姐，無形中有一份責任感。」
「媽媽一個人打四份工，做過侍應、電話銷售員等，因為冇錢請工人照顧我同細佬，媽媽返工前會整定餸菜，我會負責『叮』熱啲餸菜畀細佬食；我又會知道如果有人敲門，我唔可以隨便開門，因為唔想畀人知道我哋兩姊弟獨留家中。個個放學即刻離開學校，但因為媽媽唔可以即刻嚟接，所以我同細佬要喺校園嘅角落匿埋，避開清潔工人，匿到差唔到時間，先至去門口會合媽媽。」
「後來媽媽喺地產公司做秘書，覺得不如直情考埋地產牌，就係靠媽媽嘅上進心，令生活變好，由以前要接受政府嘅生活津貼、我同細佬要瞓埋一張梳化，到之後唔需要政府資助，而我同細佬可以各自有一間房。」
沒有說爸爸的不好
母兼父職，生活迫人，加上面對丈夫的拋棄，蘇媽媽的日子，的確很難過。咬着牙關關關過，蘇媽媽就算怨天怨地，也從來不會在子女面前，說半句蘇爸爸的不好。說到這裡，蘇韻姿潸然淚下。
「媽媽最勁嘅地方，係唔會喺我哋面前講爸爸嘅唔好，因為佢唔想喺我哋成長階段中，會有好多負面嘅感覺，唔想抱住一個怨恨嘅心去對待任何人，所以媽媽當時呃我哋，話爸爸只係出咗去做嘢。」
「因為有時媽媽會送我哋去婆婆屋企，叫婆婆照顧，最記得當時我有睇劇集《真情》，見到離婚嘅劇情，我反問媽媽：『係咪離咗婚？冇理由爸爸長期去咗另一個地方做嘢。』最後媽媽終於講咗離婚嘅真相。」
報喜不報憂，是蘇媽媽一直以來保護子女的方式。蘇韻姿說，即使到現在，媽媽依然習慣話到口中留半句。「直到依家媽媽有唔開心或有事，佢係唔會講，我係要chok佢，要用其他方法令佢紓緩。可能一直母女關係親密，我會分享心事，加上媽媽覺得我大個咗，先至開始分享自己感覺。我希望可以同佢負擔少少，因為佢一直承受嘅經歷同苦楚，都係為咗我同細佬可以健康成長。佢唔想我哋畀人睇唔起，情願自己捱麵包，畀錢畀我哋去學嘢，等我哋可以考到好學校，想我哋出人頭地。」
我為爸爸自豪
蘇爸爸兩度離家出走，蘇韻姿說沒有埋怨，一來蘇媽媽沒有說過爸爸半句壞話，二來蘇爸爸給蘇韻姿及弟弟最好的照顧條件，包括支付中學及大學的學費。「爸爸好叻，學歷只有中三，英文唔係好叻，係靠個人努力，成為加拿大第一個亞洲人，做咗賭場嘅管理層。雖則當年有嗰啲事情（爸爸另組家庭），但後來係有復合，我都好為佢自豪，點都好，我永遠都係佢個女。」
「爸爸做嘅嘢令我好感恩，唔使我同細佬畢業後孭住grant loan有咁大嘅負擔，佢做嘅嘢我都記得，我都想孝順返佢，因為佢真係有為我哋付出，同埋佢真係好錫我哋。只係佢想有自己嘅生活模式，有自己嘅追求，所以我唔會埋怨佢點解咁樣對我媽媽，只係覺得好可惜.......本身我哋一家人係可以好幸福。爸爸依家有自己嘅生活，我都祝福佢。過時過節，大家都有問候對方，我都希望有一日佢返香港探我，食吓飯，可以簡單地陪伴吓對方。」蘇韻姿哭着說。
給爸爸的叮嚀
蘇韻姿離開遠在加拿大的父母，獨自在香港發展，雖是相隔萬里遠，但她和兩個弟弟及媽媽，關係始終濃情化不開，她說：「每一家人都有佢嘅難處同開心事，我哋成家好團結，有啲咩事都會盲撐，槍頭向外。」
縱使和媽媽如何緊密聯繫，有些說話，要跟媽媽說時，熱淚盈眶，也理所當然。
「媽媽，我儲緊錢買機票返嚟加拿大，你頂住先，因為好多事情發生緊。我知道有一段長時間冇見，所以，你要堅強啲，我都會努力啲，做好啲好嘅成績畀大家，希望將來我叻啲時，可以回報返畀你，因為你係值得擁有幸福。」
同樣，血濃於水，爸爸，始終也是爸爸。蘇韻姿在父親節前夕，送上的，雖然是千篇一律的叮嚀，但不變的，是那份永恒不變的愛。
「爸爸，好耐冇見，雖然有好多事情發生過，但係唔緊要，最緊要係注意健康，因為我知你成日唔食飯，成日飲啤酒、食煙，呢啲都係唔好嘅習慣。可能你會嫌我煩，作為你嘅女，我都要不停去叮囑你。希望你身體健康。」蘇韻姿說。
