更新時間：18:30 2024-05-13
發佈時間：18:30 2024-05-13
發佈時間：18:30 2024-05-13
朱潔儀在母親節當日，出席在西九龍中心舉辦的《康乃馨大行動2024》，一起頌揚偉大母愛及宣揚孝道傳統精神。除了擔任頒獎嘉賓，她更獻唱〈甜蜜蜜〉和〈世上只有〉助興，她說：「我為今日的母親節活動準備了兩首歌，一首係〈甜蜜蜜〉，因為子女為媽咪慶祝呢個大節日要開心又甜蜜，而第二首歌〈世上只有〉就歌頌母親偉大。因為我都有一段日子冇喺公開場合唱過歌，所以演出之前一星期，喺屋企不斷練習，每首歌每日起碼練十次，希望今日演出順利。」
當她獻唱〈世上只有〉時，更走到台下，與現場觀眾握手和合照互動。「我唔係專業歌手，但估唔到現場氣氛一樣咁熱烈，我落台同啲媽媽觀眾握手，佢哋啲小朋友亦埋嚟合照，希望大家都開開心心過母親節。」
朱潔儀的母親於2017年仙遊，過去多年的母親節，她都憶起與亡母的生活點滴，「我媽咪生前好正㗎，生活好有態度。我平時好鍾意行街買嘢，有時見到適合佢嘅衫我都會馬上買，母親節又會揀幾套靚衫俾佢，點知次次都唔啱佢心水，仲叫我拎去換，有時換咗幾次都係唔啱。我一番心意，佢又唔鍾意有時真係好鬼激氣，哈哈！後期我就索性折現，等佢自己揀心儀嘅靚衫。每逢大時大節，媽咪都鍾意一家人熱鬧熱鬧聚埋一齊，有年母親節我特登整蠱佢，話有事做唔得閒，點知佢真係好唔開心，其實我一早訂咗枱同佢慶祝，到晚飯時間先打電話俾個驚喜佢，佢真係馬上扮到靚靚出嚟食飯，開心到不得了。」
她又特別懷念母親的糖水和靚湯的味道，「每次返屋企食飯，媽咪都會煲定我最鍾意嘅老火湯同糖水，有時整腐竹雞蛋，有時整紅豆沙，我又食極都唔肥喎！媽咪走咗之後，呢啲糖水嘅味道，就只留喺我嘅記憶中回味。o依家每年母親節我都好懷念媽咪，希望大家作為子女都要珍惜眼前人，趁父母仍然健康，要好好孝順。」
最Hit
