發佈時間：20:21 2024-05-01
RubberBand成員繆浩昌（6號）、李兆偉（阿偉）及黎萬宏（泥鯭）早前由宣明會安排下到非洲索馬里蘭探訪，剛巧10年前他們同樣到訪非洲，但三人異口同聲接示，兩次體會感受大不同：「因為非洲好大，上次我哋去係南非嘅鄰國，今次係東非。索馬里蘭相對之下政局比較穩定啲，感謝宣明會同事安排，先確保到我哋去一個相對安全嘅地方探訪，同埋上次去係有埋電台DJ一齊去，今次就係我哋去係做『守護脆弱孩子』嘅主題，所以都預期探訪嘅項目上都有唔同。」
為是次的非洲之行，他們出發前已注射三枝疫苗，又要食預防藥物，非常大陣仗，而成員馮庭正因為囡囡年紀太少，擔心到訪當地會感染疾病而未有同行。
淚唱《We are One》
提到此行最感動的畫面，6號坦言當時不禁感觸落淚：「感受好深，係去一間學校，我哋就唱《We are One》，呢首歌係10年前去完津巴布韋返嚟之後寫，寫嗰陣冇諗過可以去返非洲，可以唱返畀嗰片大陸嘅人聽，係一件好神奇嘅事。加埋我哋又同啲小朋友互動，教佢哋打拍子，所以又開心又感動，我覺得呢件事好大，諗都冇諗過可以返非洲唱，人生有幾何呢啲情況？」
身為爸爸的阿偉到訪當地母嬰健康院感觸最大：「見到當地嘅孕婦舟車勞頓，去做啲好基本嘅產檢，因為想做多啲都冇。嗰吓突然覺得個對比好大，因為自己有經歷過，覺得自己喺個先進地方真係好幸福，仲要當地好多做產檢，可能過幾個月後已經冇得再做。」他透露是次特別掛住囡囡，最開心是囡囡知道阿偉去的地方很特別，回來以後不斷追問他當地的情況：「雖然佢好細個，但係我都盡量解釋畀佢知道。」
不麻木多關注
至於仍處於新婚蜜月期的泥鯭，被問到探訪過後，會否對生育有不同看法？他說：「咁又同我個人嘅事無關嘅，但係見到嗰啲故事，或多或少都會有感覺，我覺得最重要係睇到當地人好愛自己嘅地方。」
6號續說：「香港人過去嗰四、五年發生咗好多事，都令我哋好容易選擇逃避比較心傷啲嘅世界大事去關心，我自己都經歷緊呢樣嘢。」他坦言儘管RubberBand曾經為俄烏戰爭為靈感寫歌，但當時已經是前年去月：「其實個戰爭到而家都仲係喺度打嚟打去，佢哋嘅發展冇再係當時咁留意，老實講，上YouTube一定大把俄烏戰況更新嘅片睇，但係我反而會揀嗰啲飲飲食食嘅嘢嚟睇。點解呢？可能真係唔想接收咁多心碎嘅嘢。」不過，由於是次到索馬里蘭探訪，提醒6號不可以讓自己麻木：「其實唔係話我哋一隊樂隊，或者咩人去探訪先係關注，普通人都可以去了解多啲、睇多啲咁關注，由少少開始就夠。」
見師生傾AI即滴汗
儘管當地的環境惡劣，所謂的居所都只是用尼龍袋及木條搭成，但RubberBand認為此行的感覺，依然是充滿希望：「最後一日探訪，去咗間職業先修學校，原來佢哋係學緊啲網上貿易、電腦，老師同同學係討論緊AI、ChatGPT嗰啲喎，我哋自己就滴汗啦，嗰個滴汗係來自自己嘅無知。對於佢哋嚟講，我哋係過客，呢啲探訪或者呢啲關注，對於住喺呢塊土地嘅人都係一件事嚟，起碼有人睇到佢哋。」阿偉深受當地人及義工人員所感動：「我必須要認同世界係好差，但係好多人都為自己國家、城市去改變，呢個係一件好正嘅事。」
至於向來關心本地生活及世界大事的RubberBand，未來會否以世界所主題，不再聚焦香港？他們笑謂：「睇吓有冇感召先啦，不過唔會特登做一隻關於世界，因為呢個地方，我哋都唔想放棄佢。」他們表示將為這趟非洲之旅寫歌，泥鯭說：「嚟緊仲有個相展，都係一啲能夠反映當地嘅相、文字分享，6月1日就會有個小型音樂會，同大家分享更多。」
場地提供：HandsOn Hong Kong
