性格決定命運，選擇亦然。只要有勇氣，選擇踏出改變的一步，命運就此改變。
37歲的麥美恩，是當中之一。
生於長於加拿大溫哥華的她，是家中孻女，大學修讀化學，但她畢業後並未留於成長地，反而隻身回香港，先當「項目統籌」，再膽粗粗參加2011年的《香港小姐競選》，以殿軍身份入行。
不介意被稱「龍躉村姑」，沒有港姐包袱，這13年來她以豪邁的笑聲、出色的口才，逐步成為TVB的「綜藝女王」，逢Show必見其蹤影。最新近的代表作，是這兩星期贏盡話題的《Mayanne小喇叭》。
「啲人成日問我，點解可以機關槍式咁笑，因為我阿媽都係咁樣，啲阿哥都係咁，屋企嘅氛圍，都係鍾意笑。一笑，好多嘢都可以解決到。」
喜愛跟網友互動，也深得網友歡心的她，歡笑背後，其實她深明娛樂圈的運作。
「每個人嘅Prime（全盛時期）都唔同，我咁啱就係喺36、37歲呢兩年開始，我想趁觀眾想睇我發力嘅時候，貢獻多啲。因為好現實㗎，花無百日紅，我想做同觀眾想睇，係兩樣嘢嚟，所以趁觀眾接納我《Mayanne小喇叭》，咁不如就準備定下一樣嘢啦！」
選擇了全速於事業路上前進，全因麥美恩還有一項終極目標：「我希望有一日，當我建立到一定嘅力量，可以成立一個慈善基金，用我嘅能力，去幫助其他有需要嘅人。」
Think big並非化學，是朝着「大想頭」進發，現在進行式的代表有麥美恩，你呢？

氣氛擔當

麥美恩的「大笑姑婆」形象，並非人設，其招牌笑聲，是麥家於37年前的出品，即使是13年前競選港姐時，她早已悟出「做自己」的真理。
「選港姐嘅時候，普遍會對傳媒有啲戒心，即係講嘢會小心啲，但係可能啲記者朋友見我得意、玩得，又唔怕醜，就會同我傾多兩句。我就發現，其實傳媒都唔係咁恐怖，我做自己，佢哋係會笑嘅，咁樣可以建立到關係。
「到𠵱家約專訪，我都話好㗎，咁係有一個機會，俾我去講自己嘅古仔。」
由女司儀到獨挑大樑主持《Mayanne小喇叭》，麥美恩表示，多得一路走來的無數貴人，令她儲存經驗值。
「貴人真係好多！曾生（曾志偉）、森美大哥、Do姐、阿姐、旦哥、叻哥⋯⋯好多好多，每個都係金牌司儀，佢哋都信我交到功課，俾我做氣氛擔當。
「我同森美合作得最多，我做下靶，Set個位俾佢鬧，然後我再反擊，不過大家都唔會嬲；Do姐就容許我去發揮自己嘅性格，佢知我會自動放火、自動引爆，到佢覺得夠，佢就會Stop我。」
跟一眾「神仙」合作，令麥美恩漸漸摸索到屬於自己的方向。「冇女司儀好似我咁大膽咁百厭，但呢啲都要用時間去建立出嚟。喺綵排嘅時候，我係好認真嘅，所以到真實On show嘅時候，前輩們都知道我係交緊功課，可以同佢哋撞一啲嘢出嚟，建立信任。」

方法演技

當司儀、做綜藝節目，麥美恩也拿捏得宜，今年她還踩入影壇，以客串身份演出電影《出租家人》，而對手也是曾志偉。
「其實我好大壓力㗎！曾生搵得我，即係我嗰場一定係喜劇元素，劇情講我揸車，本來只係話向前揸，點知去到現場，我見到大師兄（錢嘉樂），佢叫我窒吓窒吓咁揸，我就話我個牌生銹嘅，我成10幾年都冇揸過車，曾生仲要坐我隔籬呀！
「你諗吓，隔籬係我老細，前面係10幾個臨時演員，仲有4部機影住，我即刻自然慌、驚到發瘟呀！睇Playback啲人仲話我啲戲好實⋯⋯我係方法演技嚟㗎！」
驚險、搞笑兼而有之，麥美恩也坦言，電影上映當日，她感受甚深。「3月14號！呢個日子對我嚟講係好特別嘅，除咗係《出租家人》上畫，《Mayanne小喇叭》都係喺呢一日首播。」

Lonely Christmas

獨自為事業打拼，即使成績漸見，麥美恩也難逃思鄉病來襲，想念在溫哥華的家人。
「日日都有呀！我叫佢做Homesick，喺靜嘅時候，一停頓就諗起屋企人，冇垂淚嘅，但都會諗，如果今日發生嘅事，可以即時同屋企人分享就好嘞；又或者，咁辛苦，有屋企人煲個湯俾我飲就好嘞。
「但係又未去到『咁辛苦為咩呢？』嘅程度，因為我真係Enjoy，同埋Feel到自己慢慢慢慢進步，睇到自己做嘅嘢越嚟越重要，好清晰自己係向上嘅。」
一個人在途上，難免有空虛寂寞凍的時候，「聖誕最有感覺！入行頭幾年，我仲做緊娛樂新聞台，聖誕請唔到假，有2、3年返唔到加拿大。聖誕對我嚟講，係家庭歡度嘅節日，好似人哋過年要齊人食飯咁，唔使去睇燈飾，或者食咩聖誕大餐，總之同屋企人一齊就得。
「頂咗頭幾年，第4年我就舉手爭取聖誕放假，到𠵱家都每年返溫哥華過聖誕。」

致CP飯

這上年最偉大的「媽屐亭」，首選CP行銷術，功效於Idol界最為顯著。
實力股如麥美恩，也早於7年前被套用於其中，功效？你看7年後的今天，仍有網友要求她跟TVB主持人許文軒「在一起」就知。
「到𠵱家呢一刻，我話唔係情侶都冇人信嘅。不過，許文軒係一個好好嘅聆聽者嚟嘅，因為我哋嘅性格好夾，所以我去到一啲好𤷪𤺧嘅位，有啲嘢諗唔通，喺技術上、主持上嘅問題，我就會即刻打俾佢。佢會同我分析，好似《Mayanne小喇叭》我有啲問題問佢，佢會即刻答到我。
「我同許文軒傳咗7年啦！今年要傳離婚㗎嘞，因為痕啦嘛！It’s okay！我哋有共識嘅，就係一定要我結婚先，因為佢結婚先呢，啲網友就會話佢辜負咗我，咁我結先，我做渣女，啲人都會包容。」
收起笑臉，切換至認真Mode的麥美恩坦言：「一個講真話嘅朋友，係好珍貴嘅，許文軒係其中一個啦，周奕瑋、駱胤鳴又係啦。演戲方面，我可以搵Jinny（吳若希）同丁子朗，佢哋拍劇多就解答到我嘅問題啦。」
真誠的友情，已凌駕一切「媽屐亭」。