資深歌手區瑞強(Albert)在樂壇屹立40多年，以唱民歌揚名。演出時，一支木結他，一把長年保鮮的嗓子，是他的個人標記，更被譽為「民歌王子」。
數十年來，他彈奏過的結他不計其數，當中部分更成為了他的珍藏品。無論是數十元一支的國產紅綿牌木結他，到數千以至數萬元的日本和歐美品牌電結他，只要他隨意在弦線上輕掃，都能奏出清脆的樂韻。
這天他從工作室端出部分藏品分享：「這些『老友記』陪伴我走過了不少年頭！每支都有其功能和故事，我收藏的每支結他都一定會彈，唔會就咁擺喺度睇。」

教彈結他儲錢

區瑞強過去演出時，因經常拿着木結他自彈自唱，而成為其個人獨有的標記。原來他小學時期，已經與結他結緣。「60年代尾，我哥哥係BAND友，屋企有支價值$33的國產木結他，當佢每次出街，我就拿來玩，然後攞些歌書來彈，完全靠自學，第一首學識彈的歌，是披頭四的〈All my loving〉。之後仲學埋當年最hit的〈House of the rising sun〉，當時我讀緊小學五年班。」
上到中學時代，無論在寄宿學校，還是後來轉到私校，他同樣對結他演奏情有獨鍾，中三更加入同學自組的民歌組，為其事業打下根基。「那時拿着哥哥支國產木結他，去參加班際民歌比賽。中學未畢業就參加《聲寶之夜》，又去其他中學參加校際賽，到中學畢業時，結他技術高咗，撞正那年代興起彈結他熱潮，我就食正條水，去豪華琴行教結他。」
期間他努力賺錢和儲錢，買到人生第一支，亦是他珍藏當中最有紀念價值的巴西古典結他。「讀中學時，每日放學都會經過通利琴行，入面的結他通常都隨便俾人試，唯獨這支放在高處，標價$800的巴西古典結他，只能遠觀。其時1970年，打工仔人工普遍 $400-500元，我就靠教結他和賣民歌晚會門票賺錢。望了兩年，到中學畢業前，終於儲夠錢買了它回來。」

外借結他花晒

其後Albert輾轉加入寶麗金成為了職業歌手，有能力買入更高級數的結他，由日本到歐美品牌都有，當中美國品牌Martin結他更令他着迷，「有些結他出完一次就唔再出，好似這個美國名廠出品的Martin結他，可以插電，聲量唔大，彈民歌一流，30年前買入都要過萬，現在巿值約10萬，但我唔係拿來炒，我冇賣過一個結他走。」
Albert收藏的結他當中，有一個三十年前買入，價值過萬的Gibson結他，最讓他心痛，「提起都覺得傷心，這個『Gibson』係電結他的頂級神物，可以彈Jazz、Blues，插電但可發出木結他聲。以前阿B鍾鎮濤住在我樓上，有日佢嚟敲門，話：『你有支靚結他喎，我哋喺上面夾band，借嚟玩吖！』我見大家樓上樓下，30年前佢已經係紅星，咁我都係歌星。借啦！點知還俾我時，個結他面花晒，真係慘！我向來錫住咁彈，但band仔係咁掃㗎嘛！我會俾番阿B睇㗎，一條花痕一餐茶，我都有排飲呀，哈哈！不過呢啲都係一啲回憶。」

設恒溫房收藏

他笑言，現在擁有的結他都有不同用途，「早年我多用木結他，但每次飛去外地工作，都要搵一個又重又巨型嘅箱作保護寄艙，如果個箱唔夠實淨嘅話，個結他好易在運送過程損壞，所以近年出埠登台，我會帶可拆件的Yamaha結他，方便上飛機。我仲買多了幾個四圍擺，架車放一個，音樂室又放一個，方便自己唔使拎來拎去。另外，亦有四、五個機製的量產木結他做騷專用，比人手做的實淨嘛！不過現在開演唱會都有隊live band，最勁的部分都係佢哋彈，哈哈！」
問他保養方法，他說：「一般收藏結他，要放恒溫房，調校合適的濕度，但我就比較隨意，有啲結他仲經常跌落地，部份跌爛就要搵專門師傅修復。我識好多結他迷，儲好多結他，但佢哋擺多過彈，有啲甚至冇彈過，只係想儲。我玩咗結他50幾年，早已和結他上的弦線結下不解之緣，我都唔記得前前後後擁有過幾多個結他，只能講冇咗結他，唔會有現在嘅我。」