堅 1 Take 林奕匡 葉巧琳 黃妍

從來人生都是1 Take過，無Take 2，誰不是從錯誤中學習，從跌跌碰碰中成長，一步⼀腳印。
堅1 Take過，除了做人，還有早前3合1現身日本著名音樂頻道THE FIRST TAKE（TFT）的林奕匡、葉巧琳及黃妍。3人以作品〈藝術與科學〉登上世界舞台，無NG成功完成歌曲，影片於YouTube上架3星期，便錄得86.7萬瀏覽次數，成績絕對見得人。
「3個人咁樣合作，係第一次，我將自己寫嘅⼀首獨唱歌，再喺Key上面落啲工夫，改成3個人合唱嘅歌。」林奕匡笑說。
葉巧琳即補上：「好耐冇一首歌，係由兩女⼀男合唱，我哋知道喺TFT，一定係1 Take，所以就進行地獄式練習，由唱法、聲量，甚至細微到⼀個音嘅長短，都係⼀齊決定。」
只此一次的錄音機會，3人都嚴陣以待，黃妍笑言：「錄音前一晚，我喺酒店房閉關，咩人都唔見，要養好把聲衝刺。」
面對人生路上的各項1 Take，付出與收穫各異，而他們的這1 Take，經過短時間爆發的全力以赴，更見甘甜。

偷閒

為了這次「TFT」的錄音兼錄影，林奕匡、葉巧琳及黃妍一行人，加上歌曲監製Edward Chan和工作人員們，浩浩蕩蕩出發往東京。
林奕匡坦言：「我哋去日本之前，已經要練到瞓着都唱到嘅程度。」黃妍表示：「Edward⼀直全程陪住我哋，幫我哋分工，即係幫我哋定好練習方向。」
多次到日本公幹的葉巧琳，就認為這次的重點是：「團隊喺當地租咗⼀個Studio，俾我哋Rehearsal，我覺得好重要，因為Rehearsal俾到一個心理準備我，令我淡定好多。」
去年先後因拍MV及旅遊節目，她常「返鄉下」，工作不斷之後，葉巧琳終於可以享受一個為期數天的休假，跟拍拖10多年的男友，暢遊東京。
「真係好開心！我完成埋《Disney in Concert》之後，我就會同另外半去東京旅行。雖然之前我去過好多次，（林奕匡：「仲影晒相俾人睇食咗啲咩好嘢。」）哈哈！咁今次就同佢去食！
「其實自疫情之後，我同佢都冇去過日本旅行，佢好想Shopping，所以就去東京。我啲同事仲好好，幫我Book晒所有好食嘅餐廳，俾我食好好返嚟再衝過！」

爸爸

葉巧琳期待忙裏偷閒，林奕匡就有雙重期待。事業上，他將於本月底舉行兩場個人音樂會；家庭上，他跟結婚7年的太太李靄璣，將於8月榮升父母。
「音樂會對我嚟講係好有意義嘅，10年前〈高山低谷〉出現之前，我係經歷緊人生嘅低調，甚至懷疑過行音樂呢條路係咪啱嘅。呢首歌令我企番起身，對自己有番信心，知道堅持就會守得雲開。」
說到太太和暫未知性別的BB，林奕匡的笑容更見燦爛：「相比我同老婆嘅開心，我哋屋企嘅老人家就更加開心！尤其係我哋嘅爹哋媽咪，BB喺8月出世，我外母同媽咪都會提早過嚟香港，幫我哋準備。
「好好彩，我太太𠵱家只係比陀BB之前易攰，要好足夠嘅睡眠時間，morning sickness都冇，BB好似我咁錫媽咪，哈哈！」
為了迎接家庭的新成員，林奕匡最近還遷到新居，他曾表示要生一隊足球隊，但現在就多了考慮因素。「都要睇吓太太點嘅，我都想㗎，但都要尊重番佢嘅意願，仲有身體狀況。𠵱家生住1個先，我都好滿足㗎嘞。」

榮耀

期待，通常是因為喜悅。黃妍的喜事，在3、4月可謂浪接浪，她先於歌神許冠傑的演唱會上擔任表演嘉賓，再憑電影《白日之下》的主題曲〈日光漂白〉，入圍角逐第42屆香港電影金像獎「最佳原創電影歌曲」。
「兩件事都係既緊張又興奮！緊張係因為要現場演繹歌曲，先係同Sam哥合作，無論係錄音定係喺佢嘅演唱會表演，都係好夢幻嘅事，仲會學到好多嘢。
「金像獎就⋯⋯Oosh！我第一次唱電影嘅主題曲，就可以提名，仲可以現場唱呢首歌！喺疫情期間，我變成影迷，一日可以睇3、4套戲，一首好嘅電影歌曲，要同套戲好Sync，⼀聽首歌就好有畫面，我好感動自己可以做到。套戲係好沉重嘅，所以到尾聽番我首歌，可以令心情輕番啲。
「以往我都係喺屋企睇金像獎，今次可以親身參與，已經好興奮！」
今年在家中觀看的，換上了一直支持黃妍的黃爸爸，及抗病成功的黃媽媽，「佢哋都好開心！媽咪經過Treatment之後，身體已經好番好多，仲同⼀啲親友話我真係大個咗。」

真‧3體

自己Body自己顧，要身體、心靈都健康，運動自然不可或缺。
⼀向有跑步習慣的林奕匡，為了即將舉行的音樂會，更勤奮地鍛煉體能。「勤做運動，除咗Keep fit準備音樂會，我曾幾何時同自己講過，希望40歲係人生最Fit嘅狀態，𠵱家仲有1年幾就40歲，所以要繼續Fit落去。」
去年為了應付需要行山的工作，葉巧琳藉運動配合飲食，瘦了兩個圈，由內至外都是滿滿的健康氣息。「去年6月係我嘅脹爆高峰期，嗰時夜晚會食好多嘢，我喺出發去日本拍旅遊節目之前，就先減咗10磅。每日朝早就喺屋企健身同跳彈床，夜晚仲戒食澱粉質。」
至於坦言不愛運動的黃妍，為了工作所需，也會以運動操Fit自己。「工作需要之外，我係長期鼻敏感，好嚴重嘅時候，就算係去行山，只要出一身汗，成個人都會清醒好多！」
即使沒有職業需要，維持好身體健康水平，才能有力量迎接考驗。