被封為「元祖咪神」的葉子楣（Amy），在90年代因參演電影《玉蒲團之偷情寶鑑》而爆紅，不過自她與呂錫照醫生交往後，就逐漸淡出幕前。可惜呂醫生於2018年不幸因心臟病發離世；而Amy亦用了5年時間才走出陰霾，去年終於站出來見老友。
據悉，單身了6年的Amy，一直都希望找個老伴互相扶持。日前，本刊就發現她現身九龍塘的省善真堂。由於當日是觀音誕，廟宇內人頭湧湧，她幾經辛苦才走到觀音殿前買花供觀音，祈求姻緣快些降臨。

裝偷聽器

現年58歲的葉子楣（Amy），1988年由亞視轉投嘉禾拍電影，先憑《神勇飛虎霸王花》嶄露頭角，而她首齣參演的三級片是1990年的《聊齋艷譚》，票房過千萬元，令她的知名度大增！Amy曾透露是麥當雄促使她走上艷星之路：「我好欣賞嘅麥當雄，佢游說我話，只需性感，但唔使露點，會拍得我好靚。當時唔可以唔拍，因為簽咗嘉禾，咁咪嘗試。」而1991的《玉蒲團之偷情寶鑑》就令她爆紅！當年，她堅守「三點不露」，即使片商高價利誘，都不為所動：「呢個係我嘅底線同堅持，因為我認為一露咗，就冇神秘感。」雖然拍三級片的酬勞豐厚，但她訴說：「後期係越拍越唔開心，因為好多動作、表情尺度，自己唔太鍾意。」
1992年，Amy與脊骨神經科醫生呂錫照拍拖，愛得如膠似漆。那時26歲的她，雖然事業如日中天，但仍決定息影：「呂醫生係唔鍾意我拍戲㗎，拍拖嘅初期，佢仲睇得我好實添，交往嘅第5年，我發現屋企個電話俾人裝咗偷聽器，你叫我點樣相處落去呢？我哋兩個於是就約法三章，大家都要俾空間對方，咁樣我哋先冇分手。其實當年退落嚟，又唔可以完全係因為佢，拍咗幾年性感嘅戲，我都覺得好攰啦，所以佢出現係俾藉口我退出啫！」

投資電影

奈何天不從人願，2018年呂醫生坐飛機去日本公幹期間，因心臟病發而突然離世。重提這事，Amy仍忍不住淚崩痛哭：「佢每次搭飛機，我都有心理準備，始終佢有心臟病。嗰日，佢兩個家姐跟細妹，仲有姐夫一共四個人，話喺我屋企樓下要上嚟，我已經知出事。佢哋唔想我一個人喺屋企，驚我出事，就想同我見面講。最初，我都好堅強⋯⋯但當佢哋走咗⋯⋯真係忍不到，就算一個女人點堅強，始終一齊咗26年。」
事隔5年，Amy終於走出男友離世的傷痛，重新振作。去年，她還打扮得靚靚出席各大公開場合；而息影近30年的她，身形更勝從前，與昔日的老友黃百鳴、黃玉郎、陳欣健、黃錦燊及尹光等經常飯敘。初期，Amy抱着的心態都只是與老友敘舊，但在大家游說下，她突然轉軚，並決定今年重返演藝界：「原本，我淨係想搵啲老友出嚟食飯見面，但係佢哋都叫我出返嚟拍戲，佢哋話我嘅狀態保持得咁好，不如復出啦！我諗咗好耐，其實我都真係鍾意拍戲，仲有戲癮嘅；不過，我唔會行番以前條路，想拍多啲內心嘅戲。」據悉，她復出的頭炮電影，將會有份投資，希望有自主權。

冇分遺產

雖然呂醫生沒有立遺囑將財產分給Amy，但知足的她，既不求名份，也不要求任何遺產：「好多女人忍唔到，但我冇所謂。醫務所留俾佢個仔都好應該，一來我哋冇結婚，二來可能佢覺得因為我，虧欠咗個仔。」其實，投資有道的Amy，兩年前以7,200萬元放售港島東半山豪宅，勁賺逾6,000萬元，之後她再以3,600萬買入何文田豪宅自住，但仍手握大筆現金，生活無憂。
日前，本刊就發現她由司機送抵九龍塘的省善真堂。由於當日是觀音誕，道堂內人頭湧湧；而為避開人群，她左穿右插，好不容易才走到觀音殿前。踏正吉時，一早取了籌號的她，進殿前就先買了一盆鮮花供佛，祈求姻緣。進入殿內，Amy誠心跪拜，聽從道長的指示，將桌上的5件供品捧起，逐一頂禮，朝賀觀音。
此外，即將再戰娛圈的Amy，離開前不忘到文昌殿，摸一摸文昌筆，祈求事業順景。其實，她憑演技與外形已大殺四方，再加上拜神助旺，必定如虎添翼，在演藝事業上再展繽紛！