發佈時間：09:40 2024-04-04
無常的故事，每天都在上演。
上周四﹙3月28日﹚，當紅一時的90年代玉女歌手黎明詩（Stephanie），驚傳不敵癌魔病逝的消息，終年僅58歲，叫人惋惜。
據知，Stephanie兩年前曾確診患上食道癌，經治療後，去年已經康復。然而9月卻在胃部和胰臟間再發現了兩粒腫瘤，要接受化療和電療。及至今年2月，她的身體功能轉差，需入住中文大學醫院私家病房療養。
性格樂天的Stephanie，雖自知生命開始倒數，依然樂觀面對。其同性情人Kelly更陪伴她入住醫院，日夜照顧；而一班閨密好友，知道有Party Queen之稱的Stephanie愛熱鬧，更每日輪流到醫院陪她，每晚在病房內都聚集約十數人一起開餐，大家說說笑笑，猶如開派對般，好讓她每日都被愛和笑聲圍繞，無憾地走完人生的最後一程。
在Stephanie離世後，Kelly接受本刊獨家訪問時，忍痛地說：「佢係一個好樂觀、善良、堅強和美麗的女仔。佢嘅離開，令我哋非常不捨，但對佢亦係一種解脫。」
離開是為了下一次重逢，願黎明詩在另一國度，繼續被愛包圍，離苦得樂。
腫瘤壓住神經線
黎明詩（Stephanie）病逝的消息，震驚娛樂圈。據其閨中密友透露，Stephanie是於上周四（28日）早上9時15分，在醫院病榻睡夢中離世，其家人包括胞妹和同父異母的弟弟，及一眾好友亦在場相伴送別。親友隨後為她的社交平台專頁更新，貼出其代表作〈Goodbye My Love〉一曲，並留言寫上「Love you all」，憑歌向樂迷揮別。
據其閨密透露，Stephanie自兩年前患上食道癌起，一直表現樂觀，經治療後於去年已康復。但大約半年前，卻在胃部和胰臟間再發現兩粒腫瘤，無奈再度踏上抗癌之路。
「半年前佢因為腹痛和胃痛，家庭醫生建議佢做一次詳細檢查，結果發現胃同胰臟間有兩粒腫瘤，由於太接近內臟，不能做切除手術，只能接受化療和電療。可惜經過多次療程，仍然未見好轉，加上擴散速度太快，今年初佢嘅身體開始變差，好多時痛到要打嗎啡止痛。而腫瘤不斷增大亦壓住腰間兩條神經線，影響到右手郁唔到，要做手術截咗兩條神經線。」
朋友病房陪開餐
在一班閨密心目中，Stephanie愛靚亦愛玩，在抗癌期間，依然會打扮靚靚出席友人的party。「我哋成班朋友經常都一齊開party，Stephanie更有Party Queen之稱。去年年底，我哋仲一齊開聖誕P，但中途佢因為唔舒服而早走。佢個人好重情重義，早幾個月朋友唔開心，佢唔理自己身體情況，痛住都仲要揸車載朋友出去下午茶，tea完仲硬要送對方回家，其實當時佢已痛到面青唇白，嚇到朋友即刻陪佢返屋企。」
今年初，Stephanie的病情急轉直下，二月開始在中文大學醫院的私家病房留醫。閨密續說：「二月初知道佢情況唔樂觀，我哋十幾個朋友就輪流去醫院陪佢，大家又分工煮嘢食，一個煲湯、一個煮餸，陪鍾意熱鬧嘅佢一齊開飯，傾下偈，回憶過去嘅開心事，晚晚都好似開party咁。佢想食乜，我哋都盡量滿足佢，上星期佢要求飲西洋菜陳腎湯，我都馬上煲俾佢飲。」
泰國做免疫治療
其閨密稱，當Stephanie去年得悉要再度抗癌時，仍無改樂觀的心態去治病，「佢心態好好，好堅強、樂觀，從來都冇埋怨過，長期保持正能量。治療期間叫佢做乜都好，無論係食藥、打針，佢都堅強接受話：『好呀！』佢抗病以來都冇喊過，只係有時見佢痛到標眼水。」
為了對抗癌魔，Stephanie又一直努力嘗試不同的治療方法。「佢嘅partner Kelly係醫生，知道咩藥可以幫到佢，見西藥效用唔顯著，就試中藥和按摩幫佢。早前曾去了泰國做免疫治療，之後知道內地有免疫細胞治療，又去試，原本一共要打四針，但打了第一針之後，佢身體出現咗一啲反應，發燒發冷，估唔到其餘三針都未打，佢已經離開了。」
共渡患難十年情
除了一班閨密，過去10年，Stephanie身邊還有位同性情人Kelly相伴。天意安排，她上周四﹙3月28日﹚離開當天，正是二人拍拖十周年的日子。
2004年Stephanie與銀行家老公Eric Fung離婚後，不久便在香港重遇30多年前在英國認識的Kelly。2017年，Stephanie公開自己是同性戀者及與Kelly的情侶關係。當時她說：「係好隨意，我自己都估唔到講出嚟，真係神推鬼使。又唔係做啲咩壞事，自己都過咗某個年紀，都想做番一啲自己想做嘅事。Kelly經常聽我的舊曲，是我的忠實粉絲。」
她更稱「出櫃」獲得家人支持，特別是其父親：「我都估唔到，因為屋企人之前都係估估吓，只係聽聞過但又冇問我。爸爸睇到報道，話只要我人生開心就得，唔使理人哋點睇。」
據知，自Stephanie患癌後，Kelly一直在其身邊貼身照顧，過去個半月，更陪Stephanie住進醫院，方便隨時侍候左右。她又陪Stephanie四出訪尋名醫良方，惜最終仍是藥石無靈，只得忍痛告別摯愛。
Kelly接受本刊電話訪問時，哀傷地說：「我一直好欣賞佢，因為佢係一個好樂觀、善良、堅強、美麗的女仔，好唔捨得佢。呢個病對佢係好大嘅折磨，𠵱家都係一種解脫。」
她又稱，Stephanie 臨終前叮囑她們必須要繼續開心、快樂地生活下去，所以一班好友現都暫且放下哀傷，正着手籌辦Stephanie的後事。
其閨密說：「Stephanie冇宗教信仰，喪禮會貫徹佢開心嘅形象，以party形式舉行，會播佢嘅歌，同埋以佢最鍾意嘅粉色花海布置，希望成個感覺係開心嘅。」
