誰不想升呢增值自己？
年少無知，也懂要讀書識字；中年危機，也要盡力轉危為機。
到了58歲，是收成期麼？林保怡就迎來入行37載的第一次——憑《白日之下》的精湛演出，首獲提名角逐香港電影金像獎「最佳男主角」，屬其追求突破的成果。
「都做咗37年啦，係唔少（時間）㗎！有提名係開心嘅；其實之前有金馬獎提名已經好開心，今次喺香港，就有更加多朋友為我開心。
「我好鍾意試新嘢，新演繹方法、新演員、新導演⋯⋯有啲人睇新人嘅演出，會批評話『做到咁嘅』，我係新人都係『做到咁嘅』，每一個人都有做新人嘅時候，所以要俾機會佢。」
一邊呷着Cappuccino，林保怡悠然說着其「升級」旅程。「我冇讀過訓練班，冇讀過演藝，由一張白紙，唔知點做，到慢慢成長。我所有青春、時間，就貢獻晒俾TVB，喺個木人巷度，學到好多招數。
「喺我嘅成長過程入面，多得好多位前輩，佢哋掉啲錢出嚟，我就係咁執呀執！（一笑）。」
執錢升級成功，林保怡也得過大大小小獎項，惟他坦言，這37年的初心，從未變樣。
「我係好平常心嘅，有時攞過咩獎，我到𠵱家都未必記得晒。喺我嘅角度，演員係一份職業，同廚師一樣，只不過我呢份職業特別啲，做完之後好多人會欣賞到、會俾Like我，但到目前為止，我都唔認為自己係明星。
「演員嘅職責，係做好自己嘅角色，由我一開始做嘅時候，已經係抱住呢個心態，𠵱家都係。」
獎座是Bonus，境界的提升，才是源於內在的心態。

喜悅在心中

對於角逐「影帝」殊榮，林保怡笑言，有提名已是贏咗，「𠵱家我係抱住兩個心，信心同平常心，其他入圍嘅朋友都好優秀，雖然我對自己有信心，但都要睇天時地利嘅，所以我會以平常心對待。
「知道有提名嘅時候係過年前，我喺街市辦緊年貨，背景好嘈，同事叫我錄段感想，我要跑番去架車度錄⋯⋯雖然語氣聽唔出，但係我嘅喜悅在心中。」
《白日之下》叫好叫座，林保怡的有深度演繹Big boss院長，令人留下深刻印象，「近呢幾年我好鍾意啲魔鬼角色，喺做功課嘅時候，我俾咗好多理由自己，去支持院長呢個角色，要有呢個支撐，我先可以去想像，再演繹呢個角色。」
林保怡對上一趟跟「帝」相關的獎項，演繹過程也是痛苦的，就是2004年的《金枝慾孽》。
「劇集係經典，但拍嘅時候好Heavy、好辛苦，我做御醫，啲台詞又難記，拍完之後，我係好似小朋友考完試咁，放下好大嚿石頭。
「《金枝慾孽》係我其中一個轉捩點，劇集好受歡迎，全球華人都好鍾意，所以我同Gigi之後都一帆風順，哈哈！去咗好多地方，商演、剪綵⋯⋯仲試過啲粉絲係多到逼番我哋入機場禁區！」

實戰想像王

另一項大獎，是他跟黃德斌、陳豪於2012年，憑神劇《天與地》的片尾曲〈年少無知〉，橫掃樂壇頒獎禮。
「開心嘅！劇集係神劇，又創造到高收視，仲神到連陳奕迅個大獎都攞埋（叱咤樂壇我最喜愛的歌曲大獎）！全場一齊『如果⋯⋯』，我雞皮都起晒！
「但係錄音就好趕，唔係我錄唱片嗰陣咁精雕細琢，我記得喺阿Paul（黃貫中）嘅Studio錄，我仲同佢講，我錄完趕住入廠開工，所以好Rough咁唱一次就走。」
劇集中，他飾演的「鼓佬」，打鼓戲份全屬其真人演繹，只因他為貨真價實的Band友。
「到𠵱家都係，我對於文字係唔叻嘅，劇本都要分幾次睇，所以讀書嘅時候，我只係叻運動、音樂，好唔進取。
「嗰時屋企冇錢買鼓，我就用好厚黃頁分類，加張摺櫈擺喺前面扮Snare drum（小鼓），其他就全部靠幻想打空氣。聽住首歌跟打，先知我嘅想像力同模仿力咁強。」
名利雙收前，林保怡的演藝事業並非一帆風順，「喺入TVB之前，有一個時期，我拍咗好多爛片㗎，為咗生活真係冇辦法。啲人一打開銀行存摺，塊面會發晒光，我一打開就係行雷閃電，連撳機都撳唔到出嚟（存款少於100元）。
「嗰時好驚，會諗係咪要轉行呢？轉咩好呢？轉啲穩陣啲好冇呢？但係每次我差唔多瀕死嘅時候，就有啲Job搵我，吊住條命，所以我嘅人生閱歷都幾豐富。」

內外斷捨離

由「吊住條命」走到今天，林保怡愛嘗新的冒險家精神始終如一。
「我另一個轉捩點，係《瑪嘉烈與大衛 綠豆》，係我自己改變自己，我同製作團隊講，唔好理我之前做過乜，當我新人咁做，於是就有另一個演法，好貼地好貼地咁去創造角色。」
演技與時並進，林保怡近年也與時並進地斷捨離。
「入行初期，我見到自己嘅新聞，都會剪落嚟，但後來覺得，都係回憶嚟㗎啫，屋企又冇位擺，於是喺揼之前，就由頭到尾睇一次，用呢度（一指腦袋）錄低佢，到𠵱家我都冇收集關於自己嘅新聞。」
減少身外物，林保怡對內在也保養得宜。
「糖份，或者醣份，都要好刻意去戒。揚州炒飯我都係好間唔中食一小碗；以前會覺得，奶茶、檸茶唔落糖得唔得㗎？但由少甜做起，就會發現唔落糖，其實都唔係問題。
「我都貪食㗎，屋企有盒朱古力，有時睇睇吓電影想食，咪食兩粒囉。我嘅Self-control好好，食兩粒就係食兩粒。」
會定期做身體檢查的他，還會自製豬油食用。
「豬油係有益嘅油，我會買一嚿肥豬肉，切細粒之後，慢慢炸豬油出嚟，用個樽裝起慢慢用，啲豬油渣呢，就食一粒好嘞。

Be Happy之謎

快樂，關鍵在於留住正能量；要快樂，則是人生一大課題。
在林保怡的微博上，着99.9%的帖文，也是以「Be Happy」或其簡稱「BH」作結，滿滿的正能量。
「我做到㗎！始終人有經歷，就知道唔需要太執着、太強求。我以前嘅助手，試過因為太太要離開佢，覺得好痛苦，我送咗兩個字俾佢：放下。佢當時唔明，但過咗5、6年之後，佢就明嘞。
「要Be Happy，就要解決身邊嘅問題，而唔係將問題越碌越大。以前我比較處女座（完美主義），有時會因為少少事好𤷪𤺧，𠵱家我會覺得，唔緊要啦，要習慣無常，都冇以前咁𤷪咁暴躁。」
保持快樂的狀態，處女座的林保怡，還是有追求完美的堅持。
「喺做嘢嘅時候，我為角色做Research，就會好處女座嘞！日常生活嘅話，𠵱家就算飲茶倒瀉水，我都覺得OK嘅，又唔係倒喺我前面。哈哈！」
訪問過後，跟林保怡飲茶，大意的我於為他添茶時，真的把茶倒灑了，得到的回應是一下挑眉、一個佻皮的眼神，附送意味深長的微笑。
Be Happy！
「試吓168，係有用㗎！我有朋友231添呀，即係一日得一個鐘食嘢，真係可以好瘦！」