發佈時間：10:53 2024-02-28
今年74歲的李龍基，與37歲內地女子王青霞（Chris）的「爺孫戀」，發展至今近5年，原本感情穩定，並已計劃結婚，奈何未婚妻卻被爆出「黑材料」。本月19日，Chris突然被檢控使用虛假文書、逾期居留等6項控罪，更隨即還柙大欖懲教所看管，且不允許保釋外出。
連日來，李龍基都有前往大欖懲教所探望未婚妻，表示對方經過今次教訓後，一定會變得好，又着她不用擔心，並承諾：「我應承佢一出嚟我就會同佢結婚。」
日前，本刊獨家拍到人前堅強的基哥，近日孤伶伶返回與未婚妻的愛巢即變得愁眉苦臉，全程頭耷耷兼沒精打采，認真我見猶憐！
爺孫戀有難關
結過兩次婚的李龍基，自從公開與年輕37年的王青霞（Chris）譜出「爺孫戀」後，兩人就經常出雙入對；而自認心境年輕的李龍基，曾表示只要大家真心相愛，感情是沒有年齡界限的。當年，Chris透露自己曾報讀北京航空航天大學的EMBA課程，學習營銷管理；此外，她亦有在社交平台的簡介寫上：Leiden University、Stanford University、Pacific States Aviation、Aircraft structural engineering、北京航天航空大學，表示自己曾在這些著名學府讀書，更向傳媒自稱是透過優才計劃來港。難怪，李龍基當時坦言，能夠找到一個年輕貌美又高質的女友感到自豪！
向來健談的Chris，很快便融入李龍基的朋友圈，又經常送禮物、畫作等，給予男友身邊的朋友。李龍基當時亦表示，鍾意對方為人夠真，還宣布去年尾舉行婚禮，結果好夢成空。隨後，Chris被一眾YouTuber狂爆「黑材料」，包括：學歷造假、騙財、為借錢上牀、畫作是淘寶貨，以及與一名美軍已經訂婚等等，愈爆愈多。
6項控罪被捕
到今年2月19日，Chris突然遭檢控使用虛假文書、逾期居留等6項控罪，更隨即被關進大欖懲教所，且不允許保釋外出，案件柙後至4月16日再訊；另外，2月28日再作保釋覆核申請。
對於未婚妻被即時收柙，連日來，李龍基都有前往大欖懲教所探望：「佢自己做嘅嘢係要自己承受，佢自己喺拘留所都講過，佢咁樣俾人捉一捉，好似如釋重擔。我都叫佢唔使擔心，乜嘢都好，錯咗就改過，我一定會等佢！佢成日同我講：『我以後會乖乖哋⋯⋯』咁就得啦，唔需要太多，以後乖乖哋就OK。」
維護未婚妻
提到外界指Chris大話連篇，為了金錢才與李龍基在一起；不過，他就維護未婚妻，指對方從來未在自己身上拿過一毛錢：「我對住藍天白雲發誓，佢從來未喺我身上拎一個斗零。我嘅錢放喺屋企，佢買餸都唔會拎多，咁多年來，若我發覺佢係為錢，絕唔會發展到呢個地步。」對於被指使用虛假文書，李龍基表示Chris是受害人，並透露她聲稱被一名郭姓人士欺騙；而李龍基自己亦見過此人，又指Chris是經此人考證書，但卻遭對方造假：「所以我會幫佢搵證據，清脫造假嫌疑。我會同律師商量，睇吓點去解決，將痛苦減到最輕。」
李龍基被問到，Chris可有向他道歉？他眼濕濕的說：「有，佢覺得可能累咗我，其實我覺得唔係，因為佢成日同我講，話我年紀大，唔知陪得佢幾耐，所以佢咪要爭取每分每秒嚟陪住我，所以咪諗埋呢啲屎橋囉，佢真係蠢。我成日話『點解你咁蠢』、『點解你咁蠢』，搞到今時今日咁大鑊，我仲傷心仲難過！既然發生咗就要面對，我一定會好堅強面對，希望佢都會堅強面對，唉，希望佢受咗教訓重新做好人。我相信日後等佢出嚟，我哋可以過好日子。」
此外，他每次與未婚妻見面，都有叫對方放心，就算要坐監，出來後被遣返內地，都承諾會跟對方結婚：「每次見到佢，我都畀呢個信心佢，我一定會同佢結婚，一定會娶佢，希望佢第日乖乖哋，做李龍基嘅老婆就得喇！」
寂寞孤獨老人
如今未婚妻被關柙，李龍基被問到一個人生活會否感到寂寞時，他情緒激動起來，落淚兼氣喘喘地說：「係…係…係係…因為平時兩個人係有傾有講，屋企好多嘢都係佢處理，𠵱家返到去洗衫、晾衫冇人去理，一個人喺屋企……不過，唔緊要，相信捱過呢啲日子後會好好。」
日前，本刊就獨家拍到，李龍基在大欖懲教所探望完未婚妻，獨自駕車返回兩人位於元朗的愛巢。身穿白色短袖底衫的李龍基，泊好車後，挽住外套、頭耷耷，一臉愁容行返屋企。現在Chris不在身邊，他就只好孤伶伶對住四面牆，看似十分淒涼。另一日，李龍基如常探望完Chris後，駕車返回元朗屋企，回家整理一會後，又見他一支公離開寓所，到距離家門不遠的回收場，散步之餘又可以散下心，然後才再折返回家，繼續做孤獨老人。
