當世一被廣泛使用，再宏觀點，宇一（宇宙第一）會否提升層次？
論演技，黃秋生手執的獎座，加上大眾的認同，還不是宇一嗎？Sorry，六十一歲的影帝，享受表演藝術的同時，對獎座不以為然。
「最近我諗，其實我行錯路，最啱我做嘅，有三樣嘢：一樣係畫家，一個人畫㗎咋；一樣係作家，自己一個人寫嘅；一樣就係音樂家，自己一個人彈㗎啫。我最高興嘅時候，就係自己一個人，攞住本書喺度睇嘅時候，孤獨精嚟㗎我！」
彈着即將公演的舞台劇《極地謎情》的樂章，再隨手彈了一小段《致愛麗絲》，黃秋生的手指於琴鍵上躍動着，跟他一樣瀟灑。即使自稱「孤獨精」，他每一年也會演出舞台劇，珍惜每一個機會。
「有得做就做，我𠵱家都係！硬係次次排戲嘅時候，我都覺得係最後一次，係咪咁樣會好啲呢？即係好似人哋佛教嗰啲咁，活在當下呢？」
世一也好，宇一也罷，如黃秋生所言，活在當下，才是銀河唯一。

十年記

回帶Mode，黃秋生於一三年，創辦了「神戲劇場」，十年間於劇場、培育後起之秀不遺餘力。轉眼十年，除舞台劇外，他還推出自傳《秋生回憶》，作為其中項紀念活動。
一聽「自傳」二字，黃秋生立即「澄清」：「唔係咩自傳，哎！阿Joyce（劇團行政總監張珮華）真係！係十周年要搵啲嘢嚟搞，咁即係搵嚟搞㗎啫！我又冇時間，跟住就搵人筆錄，我口述。如果真係自傳 ，邊度寫得切㗎？冇番一年半載，做唔到㗎。
「我一個演員仔，做咩整整書煞有介事咁？但既然都做咗，就厚顏無恥做埋落去！」
自傳於上周五（21日）的書展中售罄，翌日晚上才有補貨，可謂打響頭炮，另一項重頭作，是九月公演的舞台劇《極地謎情》，是黃秋生於十年前演出過的劇作，當時的對手梁祖堯，換上游學修，劇本則是重新翻譯。
「我記得十一年前（籌備之時），完全睇唔到個重點，因為上一次我睇到嘅版本，係刪剪過嘅，今次就譯咗成個劇本先，我知道原著講咩先，再裁剪。劇本入面有啲太過文學性嘅詞句，我就搵番同樣嘅意思去切合番，等香港嘅觀眾容易啲理解。」

收陀地

出書為劇團、為迎合市場，本身愛開卷的黃秋生，最近看的書是《布拉熱洛納子爵》、《BBC世界史》。
他邊就邊以手比劃書本的厚度，再說：「仲有逐句逐句解《聖經》囉，我係根據教會出版嘅一本解經嘅書去解。因為我諗起馬丁路德（Martin Luther），將本來係拉丁文嘅《聖經》變成德文。當時嘅德文，就好似𠵱家我哋廣東話咁，啲人覺得好鄙俗、好低級，馬丁路德譯咗之後，就每一個人都識睇。
「我突然間有一日望住本嘢就諗，好似冇人用廣東話去譯過《聖經》。（提高語調）『神話，有光就有咗光嘞！』咁樣，咁不如我試吓啦。」
黃秋生不是教徒，當他逐字逐句翻譯後，把成果於Facebook公開，也預料到有質疑的聲音。
「我成日覺得，啲人睇我應該係尖沙咀收陀地嗰啲啦！所以其實有時我講啲嘢冇人信，好似講《聖經》咁，有啲傳道人走咗出嚟，喺YouTube度叫人唔好聽我講。
「因為佢唔知道，我係根據教會出嘅解經書去寫，以為係我自己噏嘅，佢係傳道人嚟㗎，一聽就會知係唔係正統，但佢係（角色扮演）：『淨係我代表神㗎，你哋全部都唔識！搵我啦！』講得衰啲，呢啲叫做神棍！」

後生仔

入行四十年，近年他有辦「演技大師班」，傳授演技，他幽默地表示：「我成日見到人哋啲學生咁叻，我又冇嘅？我啲學生好Nice嘅，但係冇啲好有天份嘅人喺度。
「冇天份就努力啲，唔係我講㗎，史坦尼夫斯基講㗎！佢話有天才嘅，就唔使學㗎。」
那黃秋生屬於天才還是要努力？「我真係唔知，我唔覺得自己係天才，努力啩⋯⋯（停頓兩秒）哎！普通人玩一樣嘢，係有心機嘅，玩十年、廿年都精啦！」
而演技精湛的他，近半年還是有東西不能控制。「血壓原來咁難控制！我以為做吓運動、瞓好啲就冇事，原來唔係㗎，佢都係上上落落㗎喎。我好懷疑，𠵱家美國嘅標準，上壓130以下、下壓就80以下，基本上都係啲後生仔先會有，加埋我呢啲咁嘅體質，如果下壓真係75，會頭暈㗎！」
看着升升降降的血壓，黃秋生坦言不怕死：「死到嚟你就唔會怕㗎嘞！我覺得一個人去到咁上下嘅時候，就會想死㗎嘞。我感覺到嗰種狀態，當你隻眼睇唔到嘢，當你聽唔到嘢，再行唔到、食唔到，食落去又呢度痛嗰度痛；去唔到廁所、瞓唔到覺嘅時候，就會想死㗎嘞。我見到我媽會咁，人都係會咁樣。」
所以，及時行樂就更加重要，「我食晒十年嘅日本菜，食晒所有福島嘅輻射㗎嘞！你哋安全㗎，我食晒！」

花之秘

不論天才與否，也受惠於現世代發達的網絡世界，最貼身的，莫過於YouTube，還有Facebook、Instagram、Twitter、Threads等社交平台。
黃秋生也讚歎：「喺YouTube見到好多神奇嘅東西！幾多年前覺得冇可能嘅嘢，𠵱家都見到有，好似Parkour（飛躍道）嗰啲，點會有人咁癲呀？我都唔知佢點練，由呢間大廈跳去嗰間大廈，喺啲大廈天台度練？咁一嘢嚟（失手）就死咗㗎喎。」
YouTube見聞外，他也活躍於FB、ig，早前其變奏版「Flower Challenge」，也一度掀起話題。
你以為黃秋生也跟風嗎？實情是：「我喺Facebook、YouTube好多女喺度跳，我有個台灣學生，成日着埋啲低胸，又喺度捽呢度捽嗰度（舞蹈動作）⋯⋯我唔知咩嚟㗎！見到我學生喺度捽，我就覺得有乜好捽啫？（示範）
「後尾我聽埋首音樂，就仲反感添！直情好似人哋馬拉嗰啲『耶——耶——』，古靈精怪東南亞嗰啲音樂嚟㗎，仲要咁捽（再跳），加埋嗰吓手勢（開花舞），咁做乜啫？」
上載之謎是：「嗰日喺度玩，阿修（游學修）就話拍低佢擺上去（Facebook），我識鬼跳咩？」
網絡世界這玩意，跟得貼，不一定會炒車，分分鐘還會學好外語，考考你，知道Pizza跟Piazza的分別了嗎？

【東周刊】更多精彩 敬請瀏覽

《東周網》：https://eastweek.stheadline.com/

《東周刊》FB：https://www.facebook.com/eastweek.com.hk/

《東周刊》IG：https://www.instagram.com/eastweekhk/

《東周刊》微信公眾號：eastweekhk