發佈時間：14:49 2024-02-22
王菀之（Ivana）早前於旺角麥花臣滙為香港遊樂場協會首個年度音樂企劃《MusicSus延音Bucking計劃》Master Class 004 擔任星級講師，與學員們分享音樂創作的歷程，該計劃早前已邀得林一峰、鄺敏慧及徐偉賢擔任講師，而周鍚漢亦將於2月24日壓軸講授最後一場 Master Class。企劃的終期匯演將於3月14日假麥花臣舉行，為學員們提供演出平台，讓他們透過音樂展現年青人的才能。
成為唱作歌手接近20年
會上，王菀之（Ivana）表示自己成為唱作歌手接近20年：「我同大家一樣都係由學樂器到鍾意寫吓歌開始，由唔知道點樣將自己手寫出嚟嘅嘢變成錄製嘅歌，知道點錄製又唔識得推出，識得推出又唔識得宣傳咁樣，一路慢慢去學習。」多位延音計劃學員輪流向王菀之（Ivana）提問，被問她如何保持創作初心？王菀之（Ivana）笑謂：「我要諗諗先，我應該係冇偏離初心，所以先搞成咁，都依然係為自己創作行先，所以有時要預咗有啲曲風係冇咁多人有共鳴。」
對自己作品一定要有信心
她直言從落筆寫歌的一刻，已經知道這首歌會得到幾多聽眾，對於有學員提到在社交平台出歌，如何吸引更多點擊？王菀之（Ivana）說：「你嘅作品從來都唔關view數字，你要有信心同鍾意先可以擺上網，view數實在有太多原因影響，連擺上網嗰日有冇其他事情發生都關事，你擺上網係為咗畀人哋多一個選擇。」她又指創作的標準應該由自己去定義：「例如做音樂會，就做好人哋願意買飛嘅標準，hopefully可以做到，但至少做好自己嘅準備就好足夠。正如寫歌咁，演唱會就嚟啦，寫首賣飛嘅歌得唔得？得，咁咪《末日》囉。但係如果有日係我有嘢想講，寫首《Shattered》咪冇人聽囉，但係無論點，我都對自己作品有信心。」
分享歌唱路途的心得
談到王菀之（Ivana）為其他歌手寫歌的取捨，她透露自己會先聽對方至少十首歌，同時亦會為對方的聲線而度身訂造：「究竟你落筆去寫係為咩，為自己定為市場，如果人哋有要求，呢個係package嚟，就變咗你應該要付嘅責任，唔可以人哋要抒情歌，你夾硬要寫rap畀人，咁都係不負責任。」另外被問到她於歌唱路途的心得，Ivana自嘲：「我嗰條路途好崎嶇，呢20年，我有一個心得，我一係唔唱，一唱我就100%去享受我嘅表演，觀眾鍾唔鍾意我唔知，但係音樂一響起，我就會進入嗰個音樂世界，我會好珍惜嗰個世界。記得初初有其他歌手會話，點解我唔同觀眾講嘢？我話，我唱歌點解要同觀眾講嘢？慢慢我會學識，一個音樂會同大家近距離交流，我都用咗好多年去明白，講嘢都係分享。」
死線係好幫手
她又提到創作需要自律，死線（deadline）是很好的輔助：「（平日）唔想寫可以唔寫，但係要交歌啦喎，下星期要錄啦喎，監製催啦喎，自然就會做咩都諗住，有啲歌詞就係沖涼嗰陣諗出嚟，完全唔關沖涼事，但係佢就係咁出咗嚟。」
