發佈時間：15:28 2024-02-16
現年36歲的張振朗，昔日因外貌似張智霖而突圍，其後成功擺脫對方的影子，並於2019年獲頒發「飛躍進步男藝員」，翌年又憑《反黑路人甲》中的卧底警察「高彬」一角，勇奪「最受歡迎電視男角色」。
備受力捧的張振朗，近年已升呢「男一」之位，兼在新劇《反黑英雄》中，再演卧底執法人員。日前，他在旺角橫街拍攝外景期間，便出錢幫助顏仟汶母女解圍，可算是英雄救美。
冧莊卧底
繼上位作《反黑路人甲》後，張振朗於新劇《反黑英雄》中，再做社團大佬，但實則是卧底警察。日前，他便聯同顏仟汶在旺角新填地街拍攝外景。當日劇情講述，飾演低下階層的顏仟汶，在街上遇上兩名惡棍追數；而適逢剛放學的女兒，看見阿媽被圍，便立即上前保護。不過，兩母女勢孤力弱，顏仟汶無奈地苦喊︰「我都冇錢。」但兩名惡棍一於懶理，並且喊打喊殺。在旁的黑社會大佬張振朗看不過眼，遂上前拎出一大疊銀紙助母女解困，令顏仟汶感激萬分！
現場所見，當日天氣嚴寒，張振朗和身穿低胸的顏仟汶等埋位時，都披着大褸或羽絨服保暖，然後圍埋一起對稿。而親民的張振朗，跟劇組上下人員打成一片，不時跟他們傾偈。由於當日是拍文戲，故約兩個多小時便完成。
新鮮配搭
據知，在劇中，張振朗與陳山聰原本都是警員。後來，張振朗因為被委派去做卧底，而跟對方發生矛盾。另外，他與姚子羚則有感情線，「上一次同佢合作已經係2017年拍《包青天再起風雲》，嗰陣大家得幾場戲，所以今次嘅配搭好新鮮，希望大家拍得好玩！」
至於，首次跟張振朗合作的顏仟汶，就表示相處愉快，「大家埋位前都有溝通，點樣去演。佢對大家都好尊重、好照顧。我之前都有睇過佢嘅作品，好似《靈氣逼人》、《牛下女高音》。」對於劇中她所扮演的角色，為何天氣寒冷都要穿低胸裙上陣？她吞吞吐吐的說︰「嗰日拍攝時係好凍，但我哋拍嘢慣咗，一埋位就唔凍，頂得住。至於角色做乜，就唔方便劇透。」
