發佈時間：15:17 2024-02-14
蘇志威長女蘇君蕎（Yumi），讀書時已夢想成為一位甜品師，中六畢業後，在父母支持和鼓勵下到日本學藝四年。2022年學成歸來後，除了在五星級酒店和米芝蓮餐廳實戰，又創立了自家烘焙品牌Cool Bearkery，以私人訂製形式，為客人製作精緻的生日蛋糕、曲奇餅和節慶糕點禮盒等。
為了讓手藝和品牌有更多人認識，早前她就趁農曆新年前的周末，一連兩日在觀塘一個賀歲巿集擺檔，售賣四款自家製的手工曲奇餅。
本刊獨家拍到她在場親自打點，除了落力向客人推銷，連上落貨等粗重工夫，她也爭住做。當有客人幫襯後要求合照，她亦來者不拒，咁識做，難怪200盒曲奇餅，首日便全數沽清。
推銷送貨一腳踢
一身少女打扮的Yumi，連續兩日在巿集坐鎮，每當見有客人行近，便主動推介四款新口味曲奇，「一Set有桂花和陳皮茶香兩款味道，而另一Set就有香蔥芝麻和芝士味。除咗曲奇餅，亦可以買埋我兩位拍檔整嘅年糕或茶葉，組成一個賀年禮盒。」
期間，Yumi接到電話，馬上跑到店外的客𨋢大堂，接過拍檔手上的手推車，將數十盒pack好的禮盒推回巿集，再經貨𨋢送到樓下停車場交給客人。現場所見，不少客人幫襯後，都會跟Yumi來個selfie留念，Yumi亦毫不抗拒，展露甜美笑容任影唔嬲。
Yumi自小已經常跟父母出席公開活動，見慣世面的她，見本刊記者前來採訪，即大方地分享做巿集的樂趣，「我同幾個partner，前年聖誕於西貢做了第一次巿集後，去年聖誕轉到這間由partner父母開設的餐廳搞巿集。我們見上次反應超好，於是趁農曆年前做多一次。」
蘇志威探班力撐
Yumi在巿集set場期間，父親蘇志威突然「貢」上去探班，並在網上分享說：「風水輪流轉，今次竟然係我去探 Yumi班！」
他更捧着大大盒曲奇餅，食完一塊又一塊，「佢肯定係知我睇戲鐘意買大桶爆谷攬住嚟食，所以今次佢都俾一大兜我攬住自私食，我專屬㗎！」
有蘇老闆之稱的蘇志威，生意瓣數多多，Yumi笑言創立自己的烘焙品牌時，有向父親請教：「爸爸數口真係好叻，同埋佢做生意嘅邏輯、思維真係好勁。做生意條數要點計、同人傾合作、產品定價、巿場定位，佢都畀咗好多意見，但營運就冇份參與。」
Yumi笑言自小已喜歡整甜品，「我細細個成日跟住婆婆入廚房，佢負責煮餸，我就負責飯後甜品。媽咪以前去上烹飪班，又會幫我報名，整甜品漸漸就成為我嘅興趣。當屋企舉行宴會或派對，我就會自動自覺負責甜品部份。好多時我整完新產品都會畀媽咪試食，因為佢要求好高，如果話好味，九成都冇死。」
龍年籌備開新店
過去兩年實戰，令Yumi得到很多寶貴經驗，無論是為客人製作生日蛋糕，還是中秋節做月餅、聖誕做薑餅人，她都全情投入。畢業於日本辻製菓專門學校的她，近日更開班教授製作日式酥餅、曲奇和柚子蛋白霜，將興趣一步步實踐成為個人事業。
踏入龍年，Yumi透露還有一項大project，「過年後我會到日本一間著名的麵包店受訓，之後會和朋友合作，將品牌帶來香港，並計劃在今年底開店。希望未來做到更多好味、又靚嘅甜品和糕點，見到客人或朋友食得開心，我會有好大的滿足感和成功感。」
