發佈時間：16:46 2024-01-12
去年六月，突然傳出何超儀的老公陳子聰身體出現問題；其後，她更大爆老公因為大動脈爆裂而命懸一線：「當其時醫生話要做嘅嘢都做晒，佢（陳子聰）今個禮拜係好大機會活唔到，會死㗎！」結果，陳子聰經過搶救後，昏迷了一個月加一個星期，奇蹟地甦醒，但仍要繼續做手術。
新的一年，何超儀傳來好消息，表示老公已經在美國手術成功，只剩下少少手尾。日前，在中環置地廣場附近，本刊就發現何超儀在兩個大隻保鏢的協助下，攙扶老公登上7人車。雖然陳子聰的步伐十分緩慢，但身形明顯漸漸回復狀態。老公大步檻過，相信這一定是何超儀
2024年的最佳禮物。
大動脈爆裂
現年49歲的何超儀（Josie）與51歲的陳子聰，於2003年結婚，一直都十分恩愛；可是，男方近年不時傳出健康欠佳。據悉，陳子聰在2016年曾患上肝硬化，幸好及早發現，成功治療；不過，他之後又被發現有直腸炎，Josie坦言：「嗰時佢成日喺醫院吊鹽水，唔食嘢，佢咪瘦到好似骷髏骨頭咁囉。」復元後，為了健康，曾經是一個「煙剷」的陳子聰，立即戒煙。另外，醫生還建議他吃素、戒飲咖啡、戒茶等，起初3個月，他都相當聽話，但之後就忍不住了。之前，返澳洲探親的他，更肆無忌憚地大塊朵頤，結果導致大動脈爆裂，需要緊急入院。
Josie解釋，老公的病容易發生在愛吸煙、喝酒、食肥膩食物及有三高的人士身上：「佢暴飲暴食，唔戒口，所以佢喺澳洲搬一張king size嘅床褥就出事。因為唔係佢能力可以做到嘅，唔好講佢之前個肚開過刀，醫生叫佢唔好做粗重嘢喇，一個普通男人都冇可能抬到咁大嘅床褥，咁佢無形中谷爆咗自己。佢用力一推時，嗰度力就令到大動脈穿咗。」
由於事出突然，要立即做手術開肚，情況嚴重，Josie續說：「醫生一開佢個肚，佢啲血已經射到一地都係。佢啲內臟要拎晒出嚟先，因為周圍都係血，成副『架生』都要洗呀！醫生即刻切咗嗰啲壞咗嘅部分，話已經爛晒，結果要同佢換啲矽膠造嘅人造膠喉入去。」
禮貌地微笑
手術後，陳子聰需要開小便造口，而小便屙出來的全部是黑血，所以每日要輸10多包血，幾乎用光醫院血庫的血。其實，醫生當時已經叫Josie做定心理準備，她憶述：「醫生話要做嘅都做晒，𠵱家就係睇佢自己喇。其實，佢今個禮拜係好大機會活唔到㗎，會死㗎！」她又表示，當時發現老公雙腳的腳趾冰冷到變成紫色，隨時會被當成糖尿腳需要截肢，最後陳子聰昏迷了一個月加一星期才甦醒。
最近，Josie傳來好消息，她表示老公已經在美國手術成功：「今次好多醫生幫佢做手術，足足做咗17個鐘。爭少少手尾，4月返去搞埋佢。」她還透露老公今次關了舊的小便造口，同時開了新造口；而4月去美國就會將新造口關掉，之後便不需用尿袋。現時，陳子聰需要戒掉油膩食物及海鮮，但可以吃牛肉及豬肉來增肥。
日前，晚上七時許，本刊在中環置地廣場附近，發現何超儀與陳子聰的蹤影。當日，兩夫婦在兩個大隻保鑣及一名女助手的護駕之下，由一商廈離開。雖然戴着口罩的陳子聰步伐緩慢，但精神不俗，並在老婆的攙扶下，慢慢登上車。坐好後，他便脫下口罩唞唞氣；期間，他發現本刊記者拍攝，隨即禮貌地報以微笑，情況令人安心。
