發佈時間：13:29 2024-01-25
吳浩康﹙Deep﹚原名吳偉男，偉男，偉大的男人，相信是吳爸爸對兒子的寄望。
偉大的男人不易做，吳浩康反而做過別人眼中的「衰仔」、「賤男」、「壞男孩」，初出道的他憑一把靚聲被譽為「陳奕迅接班人」，個頭開得好，星途大可以一片光明，可惜年少輕狂，2004年捲入藏毒案，情史又一大堆，入行後曾與胡定欣、莊思敏、鍾舒漫、崔碧珈拍拖，更有背着女友「偷食」前科，令他形象破產，事業直插谷底。
背負着賤男之名，吳浩康從沒否認，昔日如是，今日亦然。「我從來冇否認過自己壞、自己衰，人人都會做錯過事，做錯事唔代表會繼續錯落去，錯咗咪改，日後做好啲咪得囉，唔通日日坐喺度後悔、懺悔，有用咩？」
經歷這些年的教訓，壞男孩似乎已經蛻變成功，去年吳浩康與郭思琳奉子成婚，今年月兒子出世後肩負養家重責，決心做好老公好爸爸。
早前，吳浩康宣布離開合作20年的英皇後，他未有放軟手腳等運到，一日打幾份工，更來個華麗轉身換上工衣到地盤開工，網民隨即大讚他能屈能伸值得尊重，封他為「地盤KOL」。
事業陷低潮 疑患抑鬱症
今年入行24年的吳浩康﹙Deep﹚於1999年參加《TVB全球華人新秀歌唱大賽總選》獲季軍後簽約英皇娛樂，從此踏上歌手之路。初出道的他憑一把靚聲被譽為「陳奕迅接班人」，2004年憑着〈孩子王﹀及〈洗剪吹﹀等歌曲hit爆，令他人氣急升，可惜同年捲入藏毒案，一時的行差踏錯，令正值向上衝的事業直插谷底。
事業陷低潮時，最壞情况零收入，吳浩康坦言被人冷言冷語已成習慣，被踐踏也是他生活的一部份，只是他覺得這些委屈都是來得對的，因為怪就只可以怪自己，做錯了事就要站出來「找數」，「抵死」二字就是說出了重點。
「我聽過好多好難聽嘅說話，但你問我邊個鬧得我最勁？邊件事令我最深刻？我真係唔記得，如果我要記住啲唔開心嘅嘢，我肯定我已經唔使做人，喺谷底嘅時候，你會發現最難原諒自己嘅人，就係自己，有段時間我真係睇唔起自己，唔知點樣去面對自己，所以我花咗好多時間去接受一個我不喜歡嘅自己。」
說到曾經身處谷底的時期，吳浩康依舊笑面迎人，因為他深信一臉愁容沒意思，眼淚在心裏流就可以，或許沒有宣洩的出口，吳浩康曾經懷疑自己患上抑鬱症，想過跳落街了結自己。「我懷疑過患上抑鬱症，或者係驚恐症，因為有一段時間真係好驚，乜都驚一餐，坐坐吓巴士，我會突然心跳加速，唔知驚乜，但係會驚到即刻落車，又唔想接觸人，好驚同人傾偈交流，心跳加快、呼吸急速、手心冒汗、手震、心胸翳悶等病徵全部齊晒，曾經想過跳落樓就算，但奇怪嘅係每次我想去睇醫生，總會有啲阻礙，最後我都係冇去睇，幸好情況又有好轉，𠵱家嘅我直頭睇通睇透，我諗呢啲都係神嘅安排。」
吳浩康七年前開始信主，信主原因，他不欲多提，只輕描淡寫地說：「信主，都離不開做錯事，想有機會改過。」吳浩康坦言過去的事，沒可能要求別人忘記，只希望在人生中揭開新章節，從錯誤中汲取教訓，繼續由主帶領前行。
網民瘋狂稱讚是「真漢子」
也許是信主得救，近兩年吳浩康人生章節有了莫大的轉變，昔日女友一個接一個，更有背着女友「偷食」前科 ，於去年他終於定下來，去年3月與郭思琳結婚，同年9月迎來囝囝「撐撐」，一家三口幸福美滿，兩公婆更不時在社交平台高調晒愛，好老公形象有了雛形。
婚姻美滿外，2023年12月1日吳浩康因為上載了一條「上班過程」短片，自揭到地盤做搭棚架工人的片段曝光後，他更即時成為城中熱話，被網民瘋狂地稱讚他是「真漢子」，太太郭思琳也公開表揚他非常努力搵錢，大讚老公做了爸爸有頭家後，直情變了另一個人。
被讚到神般完美的男人，吳浩康談及此事，即大大啖喝過手上的香檳，抹抹額頭上的汗，接着說：「關於呢件事，見到好多網友讚我、支持我，我真係諗都冇諗過，我入行廿幾年，坦白講畀人鬧多過畀人讚啦，我𠵱家只係做一啲大部份男人都會做嘅事出嚟啫，你諗下每朝早有幾多個男人係為頭家努力工作吖？我只係其中一個啫，要得到讚賞嘅人，幾時會輪到我，睇到大家嘅留言，真係受寵若驚，不過都多謝大家的讚賞。」
「上班過程」非翻身策略
有人讚當然有人彈，一片好評之下，都有Haters出來畀嬲嬲，質疑兼鬧爆吳浩康是有計劃地幫自己洗底，扮做一個好男人。
提到這些惡評，吳浩康有點嬲，即收起笑容，認真地回答：「關於𠵱啲批評同質疑，我都見到，有人直頭喺我個社交網站留言話我，所以我都好想喺度解釋返一下，其實我從來冇諗過要做啲咩去幫自己洗底、建立好形象，我只係想同大家分享下我嘅生活啫，我從來冇影響到人，亦唔會去影響人，講到我咁有機心、咁叻仔，若然我真係可以計劃到咁多嘢，都抵畀大家讚啦！係咪先？」吳浩康強調分享「上班過程」的片並非翻身策略，全都是天意，除此之外，他對別人指他「轉行」更着意，因為他只是想做多一份工作，開創多一個天地，揾多一份錢，而他從來沒有想過要放棄音樂和演藝工作，今日不會，將來也不會。
《金手指》角色有發揮 網友讚演技進步
吳浩康對演藝工作依然充滿熱誠， 若然有看過近期大熱港產片《金手指》的話，相信大家都會看到他的落力演出。「我喺《金手指》裏面係飾演劉德華的下屬，可以參與一部咁大製作，同咁多個好好戲嘅影帝同前輩合作真係好開心興奮，不過就好緊張，我每一日返到片場都會認真讀稿試戲，連電話都唔會睇唔敢講，擔心因為我演得唔好而影響到大家NG。」
樂於做「地盤KOL」
多年來，大家可能只認識吳浩康歌手和演員的一面，近年他變身做地盤工友，即時引來極大的迴響，其實吳浩康向來都有不同的角色和崗位，只是大家未看到而已。「我係一個好有危機感嘅人，我好細個已經好識得揾錢同理財，我一早就學會做生意，可能大家一直以嚟只見到我歌手嗰一面，而見唔到我多元化嘅另一面，我都做過保險經紀，𠵱家亦有做飲食生意，啱啱過咗去嘅冬至，將會嚟嘅新年，我都有做盆菜生意，只係大家唔知啫，𠵱家我都有去教人唱歌、搭鐵架等等，對我而言，人生可以有好多個角色，當我做每一個角色嘅時候，我都會好認真咁去做，每一個角色都應該得到尊重，所以我好樂於做『地盤KOL』！哈哈。」
