
發佈時間:13:34 2023-12-30

2019年,武打女星司徒鈺芸(JuJu)憑美劇《五行刺客》,成功打入荷李活。同年10月,她跟電影導演司徒永華(Antony)結婚,但婚後4年都未有所出。早前,她接受本刊訪問時,透露因身患子宮內膜異位症第4期,影響生育。
幸好皇天不負有心人,JuJu千辛萬苦接受第3次人工受孕後,終於願望成真。日前,腹大便便的她,在老公陪同下到銅鑼灣掃BB用品。準媽媽的她,心情大好,坦言佗B期間,為增加營養,不惜日食6餐,縱使暴增20磅,她也在所不計︰「最緊要BB健康!」
受孕成功
司徒鈺芸(JuJu)與電影導演司徒永華(Antony)結婚4年,因她身患子宮內膜異位症第4期,故一直未能成功懷孕。今年4月,JuJu在澳洲接受微創手術,清除輸卵管閉塞,同時又進行第3次人工受孕,幾經千辛萬苦,這次終於成孕。
日前,JuJu在老公Antony陪伴下現身銅鑼灣利園「血拼」。現場所見,她明顯肚凸凸,但手腳仍纖幼,行了一會,老公體貼地找了一間餐廳,讓JuJu坐低食蛋糕休息。跟着,夫妻便上了一間專買嬰兒產品的專門店,挑選BB產品。期間,他們有商有量,由BB床、BB車、BB衫到BB孭帶,都細心地研究;而當遇到不清楚的事宜,兩人便向店員查詢。此外,JuJu還不時輕撫腹部,一臉慈母的神態。離開時,Antony一隻手拎着「戰利品」,另一隻手小心翼翼地拖着JuJu。
拒做虎媽
準媽媽 JuJu大方分享佗B喜訊,「我一直好想有BB,真係好開心!我佗B都佗得好舒服,冇嘔,仲好食得。頭3個月,我日食6餐正餐,朝早都食3隻蛋,中午又食飯,攰就去瞓,已經重咗成15、16磅。𠵱家穩定咗,我開始做番啲輕量運動,但至今最少都重咗20磅。不過,我初時都好緊張,成日上網睇咩食得、咩唔食得,總之就忍口唔食生冷嘢、凍飲、雪糕。」
向來有計劃的JuJu,已提早睇定要為BB準備的用品,稍後家中的牆壁,還會髹上適合BB的顏色。另外,她已搵定陪月,多一雙手照料BB。問及兩人是否虎爸、虎媽? JuJu直說︰「我哋兩個都唔嚴,我只想BB開心、健康、有禮貌和有家教,好期待快啲見佢出世。」這陣子,Antony全副精神地照顧粗身大細的老婆,譬如:她早前行行吓突然腰痛,Antony就不惜抱住她上車。還有,JuJu大住肚彎腰辛苦,Antony又會幫她綑鞋帶,無微不至。他坦言︰「佢好多身體變化,所以我要隨時候命。」有老公悉心照顧,JuJu自然放心安胎。