數人生最期待的畫面，因人而異。
膚淺但實際的，如中六合彩、買車、買樓、事業有成，甚至是撲到演唱會飛⋯⋯足以令人開心到飛起。
有深度但不能強求的，大概是結婚、生B，這些揭開人生新一章的「金手指」。
29歲的何依婷，就集兩個類別的大成，入行快7年的她，既於新作《新聞女王》中表現搶Foc；又快將成為人妻，喜事連連，連帶她也自體發光，紅粉緋緋。
慣了站在燈光之下，即將多添一個身份的她直言：「藝人好被動，要靠天時地利人和，有人可能會覺得，藝人，尤其係女藝人，結咗婚就唔可以繼續靠自己嘅能力搵錢，買自己鍾意嘅嘢，但我唔想被性別定型，亦唔會被婚姻，阻礙我嘅事業。」
令何依婷期待的畫面，其實是：「我係期待同興奮嘅，因為我哋兩個終於去到下一步（結婚），呢個Moment我係開心嘅。我覺得呢個人係唔會放棄我嘅，以後我哋會一齊面對所有事情，係最好嘅Teammate。」
畫面的出現，可以是一瞬間，要深化箇中的層次，才是最高學問。

哭泣馬拉松

由奪得港姐亞軍開始，何依婷也快入行7年，而熱播中的劇集《新聞女王》，就成了她成為人妻前的最後一個作品，劇中的角色徐曉薇，屬低手的心機女，她笑指角色又壞又蠢。
「表面上人畜無害，又好似好聽話，實際就係好有野心，想取代佘詩曼飾演嘅Man姐。」
現實中，何依婷跟「師傅」阿佘也相當有緣，她於兩年前重拍的《十月初五的月光》中，就是飾演原版中阿佘的角色祝君好；兩年後二人合作一劇，何依婷直言，是一趟興奮的旅程。
「當我知道要同阿佘合作，係超級超級興奮，佢嘅劇陪住我成長，到幾年前嘅《延禧攻略》，我都係煲晒！
「到真係合作，我有時會擔心自己拖累大家，但阿佘幫咗我好多，會分析角色同劇情，又帶我進入拍攝嘅氣氛，所以真係好多謝佢。」
何依婷笑言，劇中角色跟其本人相差甚遠，「呢個角色唔識感恩，同時亦都好慘，有抑鬱症，所以我成日都要拍喊戲，好多崩潰嘅場口。我記得有一日嘅Rundown，由開會到收工拍嘅，都係喊戲，我要喊成10幾個鐘。
「正常人就算幾傷心都好，喊一兩個鐘都要唞吓回吓氣，但我嗰日係直落，對眼喺第二日都係腫晒。」
她表示，劇中人走進情緒迷宮，深陷低谷，也是跟她截然不同，「我嘅笑點、淚點都低，所以情緒都係Easy come, easy go，就算俾人鬧，我瞓一覺就唔記得咗。」

10優準老公

即將步入人生另一個階段，何依婷坦言，是對的時刻遇上對的人。
「我冇諗過會喺30歲前就結婚，因為我唔係嗰種睇自己嘅年紀，而逼自己做某啲嘢嘅人。如果冇遇到佢，我哋冇發展落去，可能我未必會結婚住。
「我哋讀書嘅時候就識，係隨住年數嘅推進，越見越多先越嚟越熟。佢嘅性格好好、脾氣好好，就算點嬲我都好，都唔會鬧我㗎。」
對準老公林先生有讚無彈，問何依婷能否即席說出老公的10大優點，她也自信地秒速稱：「數到！」隨即攤開10隻手指數：「善良、孝順、EQ高、聰明、理性、對人好、樂於助人，大方唔計較⋯⋯原來10個真係好難，哈哈！第9個！佢係一個好鍾意解決問題嘅人；除咗我之外，佢從來都唔會發脾氣鬧人。佢真係好好㗎！哈哈哈哈哈！」
她笑言，自己跟老公都享受忙碌的工作，「但係我哋每個禮拜都留一日俾對方，一齊打Golf，或者打機，仲要一人一部機 咁先可以連線一齊打。
「另一方面，佢比我有儀式感嘅，求婚都要買花同單膝跪⋯⋯哈哈！有時佢做咁多嘢，會令我懷疑自己，係咪應該喺佢生日嘅時候，book番啲氣球，搞番啲嘢，唔係好似對唔住佢嘅儀式感。」

「幾跳」個人技

無預警下公布婚訊，跟6年前何依婷選擇放棄會計師事務所的高薪厚職，參選港姐後轉到娛樂圈發展一樣，她笑言：「我個人都幾跳，我估我係一個好有諗法，而又不受管束嘅人。由會計到選港姐，再拍劇然後結婚，全部都好跳。
「返咗Office工一年，我會諗，自己係咪一世人都要坐喺Office？定係喺年輕嘅時候，試吓新嘢呢？𠵱家我諗番，其實我都好鍾意Office嗰份工；Even𠵱家結婚，我之前都有諗，係咪繼續拍劇，拍到4、50歲都唔結婚？」
怎樣跳也好，何依婷表示，婚後自己並不會減產，「時間就到我會繼續拍劇，佢（老公）好撐我去做我鍾意做嘅事，有自己嘅能力，即係唔希望我結咗婚之後就係一個家庭主婦，留喺屋企湊仔，我都覺得我嘅人生唔係咁樣。」
一說到「湊仔」，她即補充：「我哋喺生小朋友上冇計劃，隨緣啦，佢都好鍾意，但我哋都知，呢啲係天意嚟，冇得話想要就有，所以順其自然啦！」

不用拼命優雅

有想法而又不受管束，是何依婷的自我評價，由此可見，一些出其不意的爆發，也可以是Easy come, easy go。
事例1：訪問當天，她一聞本刊之名便笑說：「我都做過《東周》封面，雖然唔係我想嘅。」
意指數年前其鮮有的緋聞，旋即她俾位轉話題：「呢啲（緋聞）對一個就嚟結婚嘅人嚟講，就唔使再提嘞。」
事例2：正值《新聞女王》熱播之際，何依婷成了行家的追蹤對象，有別於訪問時的瀟灑，還於其IG上載限時動態，宣洩情緒。
就算「港姐」出身，又人逢喜事，也不代表要壓抑自己來保持優雅。
做人，還是要有一種態度。