由細打交打到大的周永恆（Roy），12月1日終於可以合法地在《培生擂台無敵盃2023》，真真正正打一場交。早前，他在記者會上與前「微辣」藝人霍哥未上擂台，已經打到一仆一碌。事實上，身為業餘拳手兼身高有6呎5吋的霍哥，盡佔優勢；此外，鍾培生講明拳賽當日要見血，所以Roy一定不可「hea打」。
據悉，經濟拮据的Roy，為了贏比賽賺酬金，不惜豪花逾萬元請教練，並且秘密鍛煉一招必殺技對付霍哥。日前，在荔枝角一個公園，本刊發現他正在操練；期間，練到㷫烚烚的他，索性赤裸上身在公園揮拳，看來日子有功，其肌肉已操到脹卜卜，有備而戰，這場「霍周大戰」絕對令人引頸以待！

年少輕狂

入行22年的周永恆（Roy），年少輕狂，與趙頌茹（阿Yu）拍拖期間，無論毆打傷人、藏毒、醉酒及毀壞公物等，曳事盡做，所以當鍾培生宣布《培生擂台無敵盃2023》對壘的人物，是前「微辣」藝人霍哥（霍俊邦，藝名：霍景耀）對Roy，大家都十分期待。皆因霍哥不單止身高有6呎5吋，高過Roy半個頭；此外，他還是業餘拳手，參加過於澳門舉辦的《澳門英雄匯—世界格鬥王者爭霸賽》。當時剛學泰拳半年的他，以澳門業餘拳手身份上擂台參加表演賽，最終以3分之差，輸給香港選手林皓皓，實力不言而喻。
至於Roy雖然未有台上打拳經驗，但入行至今，他的「打人實戰」經驗卻厚過電話簿。2014年，他因為偷食助手劉依靜（Ruby），而引發與當時老婆阿Yu爭執；期間，他動粗推撞對方，求其一下已經令阿Yu受傷入院縫6針。結果，Roy被控襲擊罪成，判守行為18個月。
雖然曾被判刑，但對Roy似乎未有阻嚇作用；之後，他自爆曾狂打前女子組合O.M.G成員兼前女友黃芊詠，Roy坦言：「我係有打佢呀！第一次係因為佢濫用藥物，見佢喺張床好辛苦，所以摑咗佢幾巴，希望可以摑醒佢。而第二次係同佢喺大陸返嚟香港，佢話有個老闆問佢價，願意出一萬蚊，我身為佢經理人同男友，我聽到之後好嬲，為咗想阻止佢，所以就由張床拖咗佢落地，然後再瘋狂掌摑佢。」最近一次，就是他與現任妻子陳薇對打，結果網上流出大量Roy留醫的照片，相中的他頭髮被剃走，頭頂有明顯手術的釘痕，情況相當嚴重。今次拳賽霍哥有經驗，Roy有膽量，誰勝誰負，無人知曉。

震懾婆婆

早前的記者招待會上，Roy同霍哥首次會面，就已經勁有火藥味，自稱體重88公斤的霍哥，要減磅至70公斤才可以與Roy對打；另外他又警告Roy說：「我希望周先生真係可以真真正正俾心機練習，唔好好似上次Steven（張致恒）上台求其俾人打一鑊，頭兩Round搞掂咗就算，鍾生（鍾培生）話流血呀嘛，流啦！」聽到對手如此挑釁，Roy不甘示弱說：「以往我經常有唔合法嘅情緒發洩，今次多謝鍾生俾呢個機會我合法去發洩，霍仔小心啲，我好鍾意打交，流血小心啲。」
輕佻的霍哥隨即嘲諷他：「我有睇新聞啊，你唔係打男人，你打女人吖嘛。」被篤中死穴，Roy立即進入瘋癲狀態，既對霍哥儍笑、伸脷，又問對方要不要親嘴，突然間，兩人打起上來；而躁狂症發作的Roy，率先連摑霍哥幾巴，還手的霍哥問道：「未戴拳套你都咁X樣？」鍾培生試圖調停和分隔兩人，要他們上擂台再打；不過，兩人完全沒有理會外間調停，你一拳、我一腳，打到雙雙倒地、扭作一團，如泥漿摔角般將場內的一張大枱推跌，搞到記者的咪牌都散落一地，場面混亂。
日前，在荔枝角的一公園內，本刊發現身穿黑色背心、帶着墨鏡的Roy，正在瘋狂操練。一眾公公和婆婆見到身形魁梧的他，都顯得面有點恐懼，於是刻意保持距離。最搞笑的是，婆婆玩小型軚盤的時候，Roy又走去她的旁邊玩大型軚盤，嚇得婆婆立即低頭，不敢與他正視。期間，操得㷫㷫的他，剝掉上衣脹卜卜的肌肉。看來，他下了不少苦功！
據悉，有健身牌照的Roy，最近就豪花逾萬元請教練學打拳，並且秘密鍛煉一招必殺技對付霍哥。不過在操練時，他由於太投入，除了被對手打爆了左眼之外，左邊及右邊胸骨都各被打斷了一條。相信霍哥都會希望他能夠快些康復，大家公平競爭，拳賽才有觀賞價值！