呂良偉契女梁藝齡奪環姐亞軍 英國學霸曾肥到148磅狂減38磅變索女

更新時間:17:32 2026-11-20
發佈時間:17:32 2026-11-20

呂良偉契女的梁藝齡(Alexis),因參加《環球小姐2026香港區選美大賽》而備崇外界的焦點,最終勇奪亞軍和「最佳台風獎」。個性爽朗活潑又點衝動的Alexis表示,參加選美是一個臨時決定:「從來冇諗過選,因為我個人唔女仔,但有日起身見到個廣告,覺得好國際性,我好細個喺英國讀書,好想將東方文化帶去西方,咁就去試。」
既然報得名,Alexis就全力以赴,首先努力減肥,昔日最重高達67公斤(約148磅),「我疫情時最肥,一人可以食一份中size pizza、6隻雞翼、一桶雪糕,嗰時又肥又腫;但參加選美後,經減肥及狂做運動、游水等,最終減到50公斤(約110磅)。」縱使外形達標,但Alexis卻是一個不折不扣的男仔頭,於是不惜由內至外重新打造,「我講嘢大聲粗魯,原本把聲唔係咁,喺4年前睇Blackpink,我high到不停大嗌 Lisa,結果第二日失聲,跟住把聲變得又沉又沙,變咗街市賣菜把聲。我惟有去學唱歌,改善番聲音變得soft、高音啲。之後,又開始學化妝和行路,習慣女人啲,講嘢慢啲細聲啲。」
因為梁媽媽跟楊小娟的金蘭姐妹,所以Alexis自小便與呂良偉上契。貴為家中獨女,她不單止是父母的掌上明珠,還獲得契爺和契媽痛錫;而她更視他們的兒子呂善揚為哥哥。「我哋成日見面,佢哋好支持我參選,我對加入娛樂圈都持開放態度,契爺覺得我有一定表現能力。但我將來想成為生意人,想從事啲健康、身心靈方面,讓別人更認識自己。」有契爺呂良偉做後盾,已經贏在起跑線!

Profile︰
姓名︰ 梁藝齡
英文名:Alexis Leung
年齡:23歲
三圍:34” 25” 34”
學歷:畢業於英國巴斯大學獲商務行政與管理學士學位。
職業背景:自由身市場營銷人員、KOL、社交媒體經理。


延伸內容:周婷退選港姐逆襲奪環球小姐香港冠軍 棄銀行工轉型KOL收入更豐厚

延伸內容:環姐季軍梁聖童曾獲YG邀當練習生 15歲為學業婉拒 今24歲奪口才獎腳踏實地如常返工做最美OL