「女神」獨家剖白 阮嘉敏曾遇巨變絕望想輕生

更新時間:12:00 2026-11-17
發佈時間:12:00 2026-11-17

TVB熱播中的戀愛真人騷《女神配對計劃2》,現年35歲的阮嘉敏(Mandy),玩「心動電話亭」遊戲時,放棄了曾因合作內地短劇而互生情愫的「短劇男神」吳旭東(東東),而是選擇一直無微不至、默默付出的譚梓樂(Hepta)。
面對東東當場落淚的失落表現,阮嘉敏並未被情緒勒索或「戀愛腦」沖昏頭腦,反而展現出成熟、理智且大方的態度。事後,大批網民洗版式激讚她「揀得好」、「清醒獨立」。
日前,接受本刊專訪的阮嘉敏,首度敞開心扉,詳談自己「棄東東,揀Hepta」的真實心聲。此外,她還大方分享過去的感情傷痕;以及30歲時慘遇人生低谷、精神近乎崩潰,導致有輕生的諗頭;更細說對未來家庭的真摯期盼。

談過4段戀情 拒戀愛腦

2016年參選港姐入行的阮嘉敏(Mandy),感情路上並非一帆風順,她透露自己曾經談過4段戀情,在參加《女神配對計劃2》前,已空窗一年半。提及上一段幾乎論及婚嫁卻無疾而終的感情,她坦言那是人生中極具考驗的時期,也讓她在處理感情時變得更加審慎:「我對上嗰個男朋友,其實我哋係有諗過結婚嘅,但最後都係冇咗。𠵱家已經過咗最想結婚嘅時候。其實,有時結唔結婚都冇咩所謂嘅,都係個名份啫,係咪?唔一定要限個時間畀自己,我覺得咁樣對自己好有壓力,會局限咗自己,更加難搵到伴侶囉!」她直言過去的經歷,讓她深刻明白,盲目的熱情無法替代長久的契合。
Mandy不諱言:「今次參加呢個節目,我又真係好想同佢哋去了解,睇吓大家得唔得,即係我要了解埋你屋企背景、你平時生活係點㗎?你三觀係點㗎?你對將來家庭嘅憧憬係點㗎?因為我係想搵一個人同我繼續生活落去嘅人,所以唔會純粹係因為我對佢有好感,我就乜都唔理。唔想再係咁樣,因為我都大個咗嘛,我唔再係細個嘅想法,覺得鍾意就唔理,衝咗過去先。」

Mandy評追求者

提及吳旭東(東東)遠道由西安來港參賽,被網民傳為佳話。Mandy表示心存感激,但亦保持客觀與理智:「如果我真係一開頭就定咗係東東嘅話,我又唔係冇佢嘅聯絡方法,係咪?我打畀佢,約佢出來咪得囉!咁點解我冇咁樣做呢?就係因為我哋當初拍完短劇之後,覺得大家確實係有好感嘅,但大家都覺得拍完咗套劇,咁又好遠,即係可能佢又唔知我點諗,我又唔知佢點諗,咁我哋就然後,就冇然後啦,大家都等嘛。到我參加呢個節目,後尾佢又參加。雖然好多人都會覺得:『嘩,佢一定好着數啦!你哋本身都對大家有好感又鍾意,唔使玩啦!』其實真係唔係,大家相處落嚟,發現彼此喺生活細節同溝通上,依然需要時間考驗。」
相對而言,譚梓樂 (Hepta)無微不至的體貼,成了打動Mandy的關鍵,她特別分享了細節:「我同另外一個追求者Hepta都係咁樣講,我好想去了解你。有一次,我隨口講咗一句怕整花妝唔想咬雞髀,Hepta聽完之後,默默走開幫我將啲雞肉全部剝好。呢種將你捧喺手心嘅呵護,真係好打動我!」她笑言,自己想要的並非浪漫激情,而是細水長流。

30歲之前面臨健康警號

現年35歲的Mandy透露,在30歲之前已面臨健康警號,因拍節目日夜顛倒而患上免疫系統失調、皮膚試過嚴重潰爛。怎料踏入30歲門檻時,人生更遭逢一連串重創—感情突然被分手、演藝事業陷於迷惘停滯,就連最要好的朋友亦突然斷絕聯絡,重重打擊讓她一度近乎崩潰。
Mandy憶述:「嗰時拍《東張西望》真係好忙,轉做一個禮拜7日,日日開好多工。我有去睇中醫調理身體,中醫成日話:『你好似好大壓力喎!』但我成日都覺得自己冇咩壓力。有一日拍完《東張》,就突然間皮膚爛晒、好多粒粒,睇西醫話我免疫系統失調,請咗兩三個星期假休養。」
然後,生活接踵而來的巨變,更將Mandy推向低谷:「我諗嗰時係因為人去到30歲咁上下啦,好多朋友同我講話:『女人去到30呢,會諗好多嘢嘅,會覺得死啦30歲,無論事業定感情你邊方面係圓滿呢?』咁嗰時,我演藝事業一般般啦,跟住之後又啱啱分手啦,拍咗幾年拖突然間分手,好唔開心!」
她續說:「我又未係經濟獨立到,同我一齊畢業嘅大學同學,都已經搵緊十萬、八萬,或者自己afford到生活,咁我阮嘉敏都仲未搞掂自己喎!再加上嗰時同最好的朋友又斷咗聯絡⋯⋯嗰吓就會覺得,好多方面都唔順利,愛情又好唔OK,冇埋添,朋友又斷聯絡。去到一個年紀好似我咩都冇,咁大個人連少少成績都做唔出來,好失敗啊!好唔鍾意自己!好冇用!」

曾大受失戀、失去友情打擊

面對事業迷惘、失戀、失去友情的打擊,Mandy坦言:「好唔開心,其實都有想過輕生嘅,講真嘅!因為我個人呢,好多時今日唔開心,瞓醒一覺係冇事嘅,但當嗰件事瞓醒一覺都仲係好唔開心呢,就話畀我知真係好唔開心。過咗幾個月,嗰時正值又冇咩工作,我長期喺屋企熬囉,我一瞓醒,覺得點解個世界會唔同晒嘅?點解男朋友冇咗?點解又冇咩嘢做嘅?我一瞓醒就喊⋯⋯」
最終,Mandy靠自己成功走出陰霾:「但係當我諗到,自己嘅原生家庭好開心,我又會覺得,輕生係咪一個好嘅解決方法?我同自己講:『你係咪仲要咁樣去浪費自己嘅時間呢?你要自己去改變,你要自己去行出一條新嘅路,唔好再喊,因為喊其實係解決唔到問題,浪費時間,我唔想做一個咁冇用嘅人啊!』」

自學經營美妝、代餐產品生意

為了改變現狀,Mandy選擇了勇敢創業,憑着一股不服輸的韌勁,自學經營美妝及代餐產品生意。她分享說:「當時,我攞晒錢出來創業,哥哥就話:『不如我畀你,或者當借畀你。』其實,我份人自尊心好重,好想自己係由零開始做起,如果我又問人借,咁即係又係你幫我,又係以前個阮嘉敏。同埋用自己錢一鋪晒冷,你冇後路退啊,你點死都要死掂件事!所以我都好積極去做我呢個品牌。」
如今,Mandy的生意逐漸步入正軌,實現了經濟獨立,「𠵱家雖然唔係話好有錢,但起碼自給自足囉!而且我不嬲覺得一個家庭係兩個人夾埋,頭家係唔應該要個男仔孭晒,我都有責任㗎嘛,兩個人一齊去負擔囉!」
關於生育的問題,愛心爆棚兼「孩子控」的Mandy坦言:「我有考慮過雪卵,如果下年有時間,我會想調理好個身體先,然後再做呢件事囉。我好鍾意小朋友,如果生到,最好當然一仔一女啦!但如果只能揀,我想生男仔啊,因為女仔,如果佢十幾歲話唔返嚟瞓,我唔知點做啊!女仔唔返屋企我好擔心佢,嘈佢又驚覺得我煩,所以我鍾意男仔,唔使點太擔心佢!」走出陰霾的阮嘉敏,如今無論在螢幕前還是私底下,都散發着清醒而自信的光芒!

延伸內容 : 女神配對計劃2|阮嘉敏爆冷唔揀東東 暖男Hepta帖長文:冇諗過你會揀我!

延伸內容 : 女神配對計劃2|阮嘉敏爆冷拒絕「長跑型癡心男」東東 轉投「行走便利店暖男」Hepter 

延伸內容︰女神配對計劃2|吳旭東為阮嘉敏勇敢行第一步 「一句說話」冧爆女神!

延伸內容︰《女神配對計劃2》阮嘉敏獲霸總吳旭東飛撲搶櫈 冧爆心動:好Man呀