發佈時間：09:30 2026-10-16
現年47歲的黃嘉樂，於2001年入讀無綫第17期藝訓班出道，多年來發展平平，捱足21年，終在2022年憑劇集《法言人》「升呢」成為主角，同年的年尾約滿，他毅然決定離巢，回復自由身。
早前，黃嘉樂的攝影師太太在社交平台上載一張地產代理牌照的相片，隨即令網民聯想她要打兩份工幫補家計，因老公經濟拮据。其實，黃嘉樂於今年簽約新公司，低調地密密吸金，並剛在大馬拍完電影。日前，他又化身驗車師傅到茘枝角開工，期間態度專業，他不諱言是踩多瓣︰「係未雨綢繆，因為資深驗車師傅，年薪係高達百萬。」
御用細佬
御用細佬
入行前，黃嘉樂曾於電訊盈科工作，因前往無綫藝員科檢查電話系統時被睇中，而獲邀投考藝員訓練班，從此踏上演藝之路。由於童顏的外貌，他多次飾演主角弟弟的角色，故有「無綫御用細佬」之稱。另外，他亦參演不少重頭劇，包括：《鐵馬尋橋》、《大醬園》等，捱了21年後，終在2022年於《法言人》當上主角；不過，他在同年的年尾，決定離開娘家，轉戰內地拍攝短劇。
感情方面，黃嘉樂鮮有緋聞，與攝影師江惠賢（Samantha）於2017年開始交往，並於拍拖5年後結婚。今年3月，Samantha突然在社交平台貼出一張地產代理牌照的相片，並透露自己已經成為「slasher」（斜槓族）1年，寫上：「攝影同地產都唔係需要日日返工，呢兩樣嘢加埋一齊做slasher真係好正。」由於太太打兩份工幫補家計，令外界揣測黃嘉樂的事業出現問題。
剛從大馬拍畢電影的黃嘉樂，日前身穿印上他名字「Ka Lok」的藍色制服，現身茘枝角一間驗車中心。現場所見，他先從工作車中取出一個工具箱，然後拎着電筒走到停在一旁的Benz，由外至內進行驗車，期間又踎又跪，接着用手輕摸車上的漆油，繼而又打開引擎蓋檢查水箱的水量，跟着瞓落修車躺板上，檢查車邊底部，全程一絲不苟，懶理污糟！最後，他便寫下報告，整個步驟共用上近兩小時。
信心未夠
對於秘做驗車師傅，接受本刊記者訪問時，黃嘉樂直認不諱；「之前，經理人話有個綜藝節目要拍驗車，我自己揸咗車好多年，當年我買第一部二手車時，咩都唔識就『伏』咗，因為求其被人驗，點知架車揸咗無耐就出問題，我開始認識到驗車嘅重要。所以我同經理人講，真係有興趣，於是我就由學徒做起，跟住驗車師傅四圍去驗車。啲師傅初時都錫住我，通常驗啲都係名車，但我話係認真學，惡劣環境都唔怕，我一個星期跟足兩、三日，每日驗足4、5部車，有時忙到連食飯時間都冇。」
經過逾兩個月的培訓後，雖然驗車師傅指黃嘉樂合乎資格落場工作，但他仍信心未夠：「我覺得要補吓鐘，始終驗車係好大責任，影響到買賣雙方，好似之前有個客有部經典古董車，佢唔驗車都唔知有撞過。有啲客見到我驗車，都同我傾偈，好有趣。（呢行收入點樣？）普通嘅月入4至5萬蚊，若資深驗車師傅，年薪係達百萬㗎。由於我係演員，要未雨綢繆，想兼職做埋驗車師傅，睇吓老闆點啦！」
保密協議
對於老婆打兩份工一事，黃嘉樂「認衰」，指有些工作簽了「保密協議」及有一陣子未有在網上更新近況，而被誤以為收入有問題。他解釋︰「太太做攝影工作，可能年輕時不懂得保養，條腰𠵱家有啲事，擔心之後出問題，咪想做多樣嘢多條出路，佢有問過我做地產好唔好？我話最緊要係佢喜歡，佢喺朋友間地產公司學習，幾好吖。」稍後，黃嘉樂隨時會以「星級驗車師傅」出現，到時大家應該唔會覺得奇怪。
