發佈時間：08:39 2023-11-15
近日，內地網上流傳富商劉鑾雄（大劉）的太太陳凱韻（甘比）投資損手，因而失勢，導致大劉將遺產重新分配，同時又亂指他的健康危在旦夕、輸股票等，謠言層出不窮。
日前，大劉突然召開記者會，重申「俾番個公道太太，要保護屋企人」，傳聞全是老作，還開口埋口鬧是個「賤人」利用網絡打手所為。縱使他全程沒有開名，但矛頭直指其前女友呂麗君（現名：呂姵霖）；期間，他更怒轟：「佢全家係納米型賊仔，冇個好人！」
自我陶醉
上周五（10日），富商劉鑾雄（大劉）突然召開記者會。會上，他手持一大疊打印出來的內地網上報道，當中包括：老婆陳凱韻（甘比）投資藝術品損手，慘蝕他200億，女方因而被踢出局，遺產轉由大兒子劉鳴煒繼承等。期間，他主要澄清以上的傳聞，又狂轟「作料者」是「賤人」，全程約1個多小時，引來近200名記者到場。當有記者提問講「呂小姐」，他火速回應︰「我冇講邊個，你唔好捉蟲！用『賤人』呢個名就好。」
聲如洪鐘的大劉，一開口就謂：「我唔想出聲，但有啲人越嚟越離譜。我好後悔幫個『賤人』，（上年年尾/年頭）仔女嘅阿媽唔想破產，早知寧願佢破產，睇佢仲有冇錢養呢啲網絡打手，搞啲咁嘅嘢。」大劉又指甘比叫他不要開記招，由得個賤人「自我陶醉」，但因要「俾番個公道太太，要保護屋企人」，他說︰「我忍咗好多次，唔係呢疊嘢咁嚴重，老婆都話使乜咁勞氣，我講嘢都傷氣。」
大劉又強調甘比從來沒蝕過錢，反而在投資藝術品上賺多過200億，就算有損失，他不諱言都是自己的決定。至於，轉移財產給大兒子劉鳴煒一事，他直言：「完全冇咁嘅事，全部係假。」還有報道提及他就快死？他說：「早兩日朋友約我出嚟食嘢，佢話Joe哥，你冇事嘛？出面傳你身體好差，就嚟死？我身體冇病，俾人激死就有。」他指以上是嚴重失實的造謠。
此外，大劉對「賤人」十分厭惡，並於早前收回其所住過的大屋，他說︰「間屋裏面裝修好靚，但佢住過，唔拆唔得，用碌柚葉洗都唔掂。」對於早前幫助「賤人」度過難關，他坦言是不想子女心靈受損，他表示在子女們面前講：「你阿媽X街嚟！唔係救佢1次，連埋呢次，救咗佢3次。啲仔女都呆咗，佢阿媽最叻儍笑講：『唔記得！』⋯⋯賤到無倫，成家都做賊，係納米型賊仔，冇個好人。」
其後，大劉指早年有資深員工退休，「賤人」要求他俾幾百萬對方過生活，但他最終發現該員工沒有收過！他說：「1支牙膏、1張單都claim3次。我講大話，就絕子絕孫，幾個仔女養唔大。」還有執超市的帳單claim他的錢，甚至乎有人收到他送的名牌物品後，賣出去「套現」，貪得無厭。越講越激氣的大劉，直言「賤人」最叻在背後做「陰濕嘢」，「你知唔知佢有次11、12點，半夜三更，X你老味，叫律師俾傳票我。」他大嘆：「咁X賤，咁X壞嘅人，都未見過。」
早立遺囑
至於財產分配一事，大劉直認一早已立好遺囑，「原來結婚都唔夠保障，信託仲可以拗，研究咗最好分身家，律師同我講分咗，你就攞唔番，我寧願睇錯分俾嘅人，都唔想俾機會佢有得益。（『賤人』嘅仔女有冇得分？）有幾種可能，可能斗零都唔分，又或俾我𠵱家嘅老婆決定，或者老婆嘅3個仔女決定。但越睇越唔對辦，因為我驚分俾啲仔女，驚佢會食埋，最驚呢樣。好似之前《東張西望》，有個肥婆，嫁4次，最終連個仔間公屋都貪埋。」
至於，生意接班人的安排，大劉說︰「有都唔話你聽。但能者居之，唔一定長子，我哋普通生意仔。」他還引用范冰冰主演的電視劇《武則天》的劇情，最終立幼子當皇帝，免去兄弟相殘。臨尾，大劉指太太甘比要湊仔女，故未能出席記招，但就有收過她編織的「溫暖牌」；不過說到底，他最想要的還是身體健康。
