更新時間：18:21 2026-08-27
發佈時間：18:21 2026-08-27
發佈時間：18:21 2026-08-27
有哥哥的妹妹像個寶，唔係必然嘅。睇柴咲幸主演嘅新片《把哥哥變成可攜帶的尺寸》，表面證供，飾演佢大佬嘅小田切讓渣到不得了，做啃老族不特止，仲要攤分阿媽嘅帛金，隱瞞前妻賣屋還債，呢啲大佬，係咪唔要好過要？
偏偏佢突然腦出血猝死，作為唯一親屬嘅妹妹，無奈要幫佢收屍，整理遺物，過程中開始諒解大佬。睇到呢度，好似有啲sad⋯⋯
電影牌面吸引
電影改編自作家村井理子嘅紀實散文《最討厭的哥哥死了：被迫出來收屍的妹妹、前妻，還有女兒，又恨又哭加上一點笑聲的五日紀事》，單睇書名，就知怨氣幾重下，而片名所指嘅「變成可攜帶的尺寸」，其實係指先人火化後嘅骨灰。
導演中野量太擅長拍家庭題材，之前拍過《幸福澡堂》、《漫長的告別》，今次再同小田切讓合作，搵埋柴咲幸同《First Love 初戀》女星滿島光搭檔，牌面吸引。
做家人唔容易
片中，柴咲幸睇唔過眼哥哥抌低病母，帶住個仔搬去東北居住，直到媽媽喪禮上才出現。兄妹決裂，再見面已經陰陽相隔，但估唔到曾被連累嘅前大嫂滿島光會同佢講：「或者你唔係太了解你哥哥。」
提到角色，柴咲幸話：「家庭嘅形式有好多種，今次令我感覺到內心深處積壓已久嘅黑暗角落，被溫柔嘅光芒照亮。」
小田切讓就話：「有啲事只有家人知道，有啲期望、有啲遺憾，亦只有家人先有。做家人唔容易，呢部電影讓我鼓起勇氣，比以往更親近家人，坦誠面對一切。」
上映日期：8月27日
延伸內容：《把哥哥變成可攜帶的尺寸》（Bring Him Down To A Portable Size）新片介紹｜柴崎幸、小田切讓、滿島光主演，中野量太執導及編劇
最Hit
