發佈時間：17:20 2026-08-07
現年29歲的「東張女神」何沛珈（Roxanne），在2022年的《香港小姐再競選》奪得冠軍及「更上鏡小姐」後，便備受公司力捧，上位神速，剛播畢的《非份之罪》和緊接出街的《夫妻的博弈》，她都有份參演，事業就得意，但感情則無着落。
隨着，去年底跟「星三代」阮浩棕的兩年情玩完，日前接受本刊專訪時，Roxanne坦言對愛情依然有憧憬，並大方剖白昔日的3段情緣；另外，她又自爆曾玩交友app來媾仔。至於報名《女神配對計劃2》，她當然是希望盡快覓得Mr. Right喇！
情緒波動
憑參選2020年港姐入行的何沛珈（Roxanne），縱使三甲不入，但仍獲無綫青睞收歸旗下，並安排她主持《東張西望》，令她搖身一變成為「東張女神」。兩年後，她再戰《香港小姐再競選》，這趟就大熱奪冠，還獲得「更上鏡小姐」。之後，她更備受力捧，主持、綜藝、劇集三線齊發。
近來劇接劇的Roxanne，在剛播畢的《非份之罪》和緊接出街的《夫妻的博弈 》都有份參演，她指兩套劇的類型不同，但各有發揮；而《非》劇還跟前度阮浩棕合作。她憶述︰「《非》劇挑戰大，因為好多情緒波動。初時跟劉佩玥（阿Moon）合作，佢係『大馬視后』，都有啲驚，但佢好主動同我打招呼，結果我哋一拍即合，大家都好夾，佢亦都會俾意見同鼓勵我。我哋拍攝時，就算有時冇自己份，都會留低陪對方。」
學習阿佘
相反，Roxanne對前度阮浩棕的態度則截然不同，「冇俾過好面色佢睇，因為佢喺劇裏面，對阿Moon好差。而私下佢係前輩，我當時都係新人，佢有教我嘅。（分手後關係？）我哋都係朋友，見面冇尷尬。」至於，在《夫》劇中，她與高海寧（高Ling）、楊卓娜、游嘉欣等飾演一起長大的好姊妹，拍攝初時因她們不熟絡而有隔膜。幸好，經佘詩曼（阿佘）搞飯敍之後，大家戲內外都相處愉快。
轉眼已出道6年，Roxanne的事業總算穩步上揚，「演技上，目標係以阿佘、高Ling為學習對象。高Ling都係一步一步走出嚟，而主持方面，我就想走知性型嘅陳貝兒，host到成個場面。我最喜歡做live show，係有壓力又緊張，要將啲稿背到入晒血，到時主持仲要執生。不過，好似打機咁，過完一關又一關，好刺激！」
敲監製門
儘管演員工作被動，不過向來做事有規劃的Roxanne，絕不會坐以待斃。除了不介意敲監製門之外，又會主動拍片放上社交媒體，她分享說︰「生活要使費，唔夠使，我唔會減少支出，反而會開源。今時今日藝人都要宣傳自己，好彩有中學同學幫我整造型，另外細妹幫我剪片，所以我都喺社交媒體多出post，爭取客戶關注，有機會接到廣告或司儀工作。我以前都有敲監製嘅門，因為機會係要自己爭取嘅。」
在事業上，Roxanne主動出擊，但在感情上竟然是一棵「怕羞草」。即使有戀情經驗，但她卻表示自己是獅子座的女生，個性毫不女性化，為人爽直不扭擰，往往跟男生相處如兄弟，不懂得如何吸引異性，「我中學、大學時嘅男同學唔多，唔識同異性接觸。我都唔知點解自己有3次拍拖？第1段喺大學時期，當時男友係運動員，大隻靚仔、好吸引，係佢主動私訊我。不過，當時大家唔太成熟，只一齊好短時間。」
她續說：「第2段係異地戀，係屋企人介紹。第3段都係人哋介紹。我真係唔識媾仔，只係等人媾。我試過大學時段，開過交友軟件一次，但有男仔留言俾我，我就驚，成個app都刪除埋。」故最終加入《女神配對計劃2》搵對象。
擇偶條件
對於擇偶條件，Roxanne表示︰「要成熟、有擔當、五官端正，有基本經濟能力，同我差唔多高，最好年紀大過我，若果細過我，就最多3、4年，唔一定要有錢，性格好最緊要。我需要時間了解對方。」
對於《女神2》節目中將會出現的「求愛勇者」，Roxanne未開始已忐忑不安：「其實對方唔好太進取，我會縮，如果對方太正經，我又嫌悶。如果佢每朝問你起身未？我又驚。最好從朋友開始，不要太cool，又不要太熱情，我真係好難搞。自已20歲時，都想30歲結婚，𠵱家都快30，就唔諗幾時，隨緣啦⋯⋯」若真的找不到，她不諱言會向「娛圈媒人」阿Bob（林盛斌）求助。
延伸內容 :非份之罪｜阮浩棕同前度激吻戲成熱話 何沛珈回答網友 會唔會翻撻？
延伸內容 : TVB嚴格執行「禁愛令」爆何沛珈 阮浩棕兩年情玩完
延伸內容 : 獨家追蹤｜何沛珈與「星三代」阮浩棕暗撻9個月 直擊餐廳冧爆撐枱腳拍拖
