發佈時間：11:49 2026-08-06
曾為填詞人兼演員的黎彼得（Peter、原名黎成就）於昨日上午（8月5日）因病離世，享年76歲。黎彼得生前曾有過一段短暫的婚姻，在39歲時因患上肝病，一度被醫生勸戒停工，黎彼得因而生出結婚念頭。黎彼得就結婚一事，他曾笑稱：「失業吖嘛，冇乜聊賴，年齡又差唔多，咁啱又有位女士喺附近撞到，又幾啱傾喎，就搞結婚。」不過，黎彼得的婚姻僅維持三年便結束，前妻選擇離開時，兒子只有3歲。黎彼得曾無奈但豁達道：「嗰三年都好陰公㗎，啲人覺得個男人又失業，又要靠個女人養，我事實又係冇收入，變咗我係咪要食拖鞋飯？又唔係，但事實我又身體唔好，呢個女人肯同我捱係好難得，我好感恩㗎。無奈長貧難顧，佢要走，我咪畀佢走囉，就係咁簡單。」
老婆走路 黎彼得父兼母職
黎彼得和前妻離婚後，大家再沒有聯絡，如同陌路人，而黎彼得就開始展開近40年的「帶子洪郎」生活，身兼母職獨力撫養年幼的兒子長大。只是黎彼得與兒子關係疏離，雖然曾花費十多萬元送兒子到南京攻讀為期四年的中醫課程，期望兒子有一技之長，可惜事與願違，兒子經常逃學最終未能順利畢業。兒子回港後，更長期處於「躺平」狀態，終日留在家中沉迷打遊戲，不願外出工作。
年過70歲努力幫仔還債
黎彼得曾形容兩父子關係「形同陌路」，雖然同住一屋簷下卻甚少溝通，對於自己離世後，兒子的去向，他就表示：「可以申請公屋，就算瞓天橋底都唔會死」。黎彼得曾提到兒子30幾歲，卻欠十多萬元的信用卡債務，要由他代為償還債務，黎彼得當時已年過70歲，仍要努力工作賺錢。直到黎彼得試過因染上流感入院，兒子當時曾前往探望，又買食物及陪同攞藥，令黎彼得深感安慰，認為兒子「都算生性」。
75歲公開徵婚求伴
黎彼得單身近40年，曾抱住「不想連累人」，故未有考慮再婚。直到黎彼得因流感及腎功能問題兩度入院，在病榻上看到其他病友有親戚家人陪伴，頓時感到孤苦伶仃。黎彼得其後一改想法，決定在網上節目中公開徵婚，坦言希望尋求靈魂伴侶互相照應，並笑言自己的要求已經放得很低。
延伸內容 : 黎彼得離世│曾傳得罪阿嫂被迫冇兄弟做 「歌神」許冠傑親筆撰寫悼念忘友
延伸內容 : 黎彼得離世│主動助契爺渡過難關 「契仔」黃宗澤：他的笑聲同精神永遠陪伴住大家！
盧宛茵對老友離世感唏噓
黎彼得的生前好友兼飯腳盧宛茵（Madam）接受《星島頭條》獨家訪問時，就直言對老友離世感到唏噓，最初她接到Peter哥死訊還半信半疑，以為是假新聞，證實後有感發說：「唉，近期死訊陸續，繼施南生、謝賢後有葛蘭，唔知點解隔日就死一個，尤其上咗年紀，我真係好驚。」盧宛茵憶述，在黎彼得中風前曾與他吃過飯，之後也有到醫院探望：「有一次鍾志光好大聲喺佢耳邊叫佢加油，『快啲好返一齊食飯』，我見佢眼神想回應，但插咗喉，又有痰，始終講唔到嘢。」
黎彼得有藝術家脾氣 對創作非常執著
Madam跟黎彼得合作過多齣劇集，印象最難忘是拍梅小青的《樂壇插班生》，與他及黎耀祥、江欣燕等扮鬼扮怪：「我最欣賞佢係鬼才，讀書唔多，但靠睇粵劇填得一手好詞。佢話過，經典作品《浪子心聲》歌詞『命裡有時終須有，命裡無時莫強求』，源於廟街睇相佬嘅對聯，佢靈機一觸同許冠傑商量，就加咗落作品中，連外國人都用無伴奏合唱（a cappella）演繹呢首歌，令佢好自豪。」
Madam又指黎彼得有藝術家脾氣，對創作非常執著：「我幾崇拜佢，佢啲歌詞好正，又好寫實，好似《尖沙咀Susie》咁。佢同我哋講，而家唔寫歌原因，因為時下填詞人唔夠水準，唔知寫乜。唉，鬼才離世真係好可惜。」
黎彼得同許冠傑合作7年拆夥
黎彼得在70年代與和許冠傑成為最佳曲詞組合，當中聯手合作的金曲《浪子心聲》至今仍是經典之作。不過，黎彼得和許冠傑兩人合作7年便拆夥，黎彼得曾在其網上節目《玖噏秘笈》大談與許冠傑的恩怨，黎彼得直說：「朋友之間只要太過close，就會有恩怨，我唔會理佢有冇怨我，但我對佢就好感恩。」
