不是回帶Mode，1993，是余香凝（Jennifer）與梁雍婷（Rachel）的出生年份，即是說，她們於今年也成了「女人30俱樂部」的會員。
What？她們是同齡人？是的。這大概連剛第2度為人母的余香凝，也未察覺。
「初初見Rachel，我完全唔知佢同我同年，原來佢仲比我早個幾月出世，
我哋嘅星座仲係黐住嘅，佢係雙子座、我係巨蟹座。」
嬌小、童顏也是優點，梁雍婷亦憑外型而「減齡」，
「但係演員係唔會受外型影響，亦都要Embrace（欣然接受）自己任個一個年紀。哈哈！」
其身旁的余香凝大表贊同：「係呀！有皺紋都OK㗎。」
是巧合也是緣份，二人先後演出電影《緣路山旮旯》及《白日之下》，於前者零對手戲份，
但憑後者的演出，她們一同獲得金馬獎的肯定，一同入圍，於本月底分別角逐「影后」及「最佳女配角」。
獲悉好消息，二人的反應迥異，余香凝喜極而泣，
「可能因為當時坐緊月，我個女都唔知發生緊咩事，哈哈。」
梁雍婷則笑說：「我好鍾意表演，知道得到提名，我感覺係平靜嘅，
因為演員都係集大家嘅努力，做代表去演繹角色，而呢個
過程，都係我堅持去做自己鍾意做嘅事啫。」
同齡不代表一切，無論數字如何增長，能為喜歡的事物堅持，從來不易。

Panic

訪問這天，余香凝剛好完成坐月過程「出關」，她坦言，接拍《白日之下》前，曾有一段驚恐的日子。
「生完第一個小朋友，我係好Panic嘅，會成日諗，之後仲有冇人搵我做戲㗎？仲直頭試過喺屋企喊，我記得嗰刻抱住個女食飯，佢扭計，我就抱佢出去𠱁佢，望到條街有人拍緊戲，我係覺得呢個場面，離我好近又好似好遠咁。
「擔心之後，過咗幾個月，就有一部電影搵我做，當時我覺得，原來仲有人搵我㗎，接住就拍《白日之下》，所以其實都冇得擔心咁多，只要Ready好自己，有機會嘅時候就好好去做。」
她在2021年誕下女兒，今年9月再生了兒子，湊出「好」字後，要兼顧事業與家庭，一切也要計劃得宜。
「我Plan好晒時間表，湊咗大女返學，就可以陪細仔，就算𠵱家有兩個小朋友，我都想繼續做演員，因為我實在太鍾意演戲。」

使命

《白日之下》上映後，引起觀眾討論，原因是電影屬關懷弱勢社群的小品，以記者採訪的角度出發，展示現實對老弱殘疾的殘酷。
余香凝跟梁雍婷，於戲中分別飾演記者及智障人士，二人於準備演出時，都各自做足功課。余香凝表示：「之前我對港聞記者係零認識嘅，而我嘅角色係有原型人物，我除咗同佢傾偈，仲搵咗另外一啲記者攞料，發現佢哋都好獨立，即係由搵料到寫稿，都係自己一個搞掂晒。
「於是我就自己一個人，揸車去唔同嘅院舍，我係好唔鍾意揸車嘅，但為咗攞一啲記者嘅感覺，自己揸車，喺院舍睇人出出入入。」
至於梁雍婷的「備課」，就更有學術性。「我嘅角色『小鈴』，雖然智力有限，但佢嘅情感係冇限制嘅，於是我就睇好多醫療報告、紀錄片，再同導演、編劇傾，搵一啲特質去融合角色。
「之前有一個只係俾演員睇嘅試映場，我睇之前好緊張，睇完之後喊咗好耐，係因為Jennifer同修哥（胡楓）、John哥（姜大衛）嘅感情演得好好⋯⋯」
余香凝接着說：「睇嘅時候，我仲陀緊細仔，睇完佢哋都叫我唔好咁激動，好驚我動咗個胎。我都有留意戲入面講嘅新聞，當時都有好深感受，但係都係好似戲中所講，睇完新聞之後嗰幾日，係忿忿不平嘅，但後來都冇擺上心。」
戲中帶出的社會問題，梁雍婷常有留意社會新聞，覺得自己有種使命感。「雖然係有無力感，但我唔會將呢啲事變咗日常，令自己冇感覺。」余香凝坦言，想透過新作：「帶出問題所在，唔可以無視呢啲Case。」

最勁

喜愛演戲的，還有入行10年的梁雍婷，一直默默耕耘的她，還在浸會大學就讀表演系時，經過試鏡，成功得到第一個演出港台劇集的機會。
「因為我好鍾意表演，喺中學嘅時候，就特別去學做小丑，因為學校鼓勵學生去做義工，而我係嗰啲一做就要做最勁嘅人，我唔想Hea做，所以就去學扭波，帶歡樂俾啲獨居長者同智障人士。」
梁雍婷的字典中，並沒有「Hea」這個字，而當演員也並非為名利，她坦言：「我只係見步行步，好少會做Planning，遇到好嘅角色、好嘅劇本就去做，冇話會Set一個目標俾自己。係，做演員係被動，但我覺得試鏡好緊要，係一個俾人知道，呢個演員好值得用。
「我仲想用多啲時間去進修，學編劇，屋企唔使我俾家用，而我又冇乜物質上嘅追求，所以使好少錢，有本錢去增值自己。」

Queen Maker

心態決定境界，從余香凝與梁雍婷身上，可以體驗到年齡轉字頭的境界。
如前者所說，二人星座不同，預想跟現實的30歲，也大相逕庭。
巨蟹座的余香凝稱：「兩者對我嚟講係差唔多嘅，我想喺30歲有自己嘅家庭，𠵱家真係做咗兩個小朋友嘅媽咪，責任好似更加大，又要兼顧作，
會好忙好辛苦，但係我好Enjoy呢個Moment。」
雙子座的梁雍婷，思維也如風一般，「我都唔記得自己幻想中嘅30歲係點嘞！不過，喺我今年生日前，係有少少不安嘅，會諗『哎呀！死嘞！我變老嘞！冇晒骨膠原嘞！』。於是我就好積極咁做運動，希望自己唔好老得咁快。
「但係，我好慶幸，有時買酒都有人查我身份證囉。Yes！」
不論星座、年齡，甚至血型，愛自己，你就是自己的Queen Maker。