發佈時間：13:20 2026-06-11
由音樂人郭偉亮（Eric Kwok）擔任經理人的女團XiX，4位成員包括︰良玳瑩（Crystal）、
楊秉頤（Caitlin）、繆昀希（Charlotte）、鄧曉殷（Kiele），她們皆從2022年的無綫選秀節目《聲夢JUNIOR》中發掘出來的。
第一次做經理人的郭偉亮，當真出心出力「湊女」，除碌人情卡讓她們加盟環球唱片外，又搵來老婆葉佩雯擔任形象總監，可惜前年成軍未夠一年已鬧出不少風波，令他既激氣又傷心，直言經理人的工作「嘔血」。去年，XiX還傳出面臨「一曲定生死」，於是他不惜積極為她們爭取演出機會，日前更在街頭親身指導她們拍MV，搏到盡！
教到嘔血
XiX原本有6位成員，均出身自無綫的《聲夢傳奇JUNIOR》，因在比賽中表演出色，故組成女團再戰《聲夢傳奇2》 舞台，最終勇奪殿軍、「優秀表現獎」及「舞台魅力獎」。2023年9月，由音樂人郭偉亮（Eric Kwok）接手管理及擔任XiX的經理人，因其中一位成員劉芷君（Aster）決定作單飛發展，故最後以5位成員出道，推出首支單曲〈SiS〉。
第一次擔任經理人的郭偉亮，自嘲猶如「湊女」，還要似足打雜一腳踢︰「我要做監製、作曲、司機及人生導師。」他繼續呻：「錄音、廣告，仲要幫佢哋搵sponsor，同老婆度下次新歌嘅造型，預備下一隻新歌嘅舞蹈，個MV等，全部都關我事，最嚴重嘅係點樣同環球公司去度下一隻歌嘅安排、宣傳，上乜嘢電視同電台節目，上咩網媒，IG拍啲咩，啲橋全部我諗，拍又係我拍，剪又係我剪，咁你話我幾忙，連個YouTube Channel都係我搞。」
此外，郭偉亮更要解決很多意想不到的問題︰「佢哋只識讀書考試，最初不適應我嘅好多規條，例如要回覆群組訊息。另外，佢哋唱歌時咬字不正，也令我嘔血﹗少啲心血都搞唔掂佢哋。」他並強調︰「真係唔會再簽人，只此一次。」就連老婆葉佩雯，也被他拖「落坑」，擔任形象顧問；可是，她一加入工作4個月，便病了3次。
翌年，其中一位成員莊殷玥（Vici）的家人，由於過分干預，結果遭郭偉亮「踢走」，故XiX變成現時的4位成員︰良玳瑩（Crystal）、楊秉頤（Caitlin）、繆昀希（Charlotte）、鄧曉殷（Kiele）。之後，郭偉亮便積極為她們鋪路，不僅打人情牌讓她們加盟環球唱片，繼而推出新歌，又安排北上拍MV和公開演出。
一曲定生死
近年，因為香港經濟麻麻，去年夏天就傳出環球「一曲定生死」，決定XiX去留？郭偉亮坦承確有其事︰「真嘅。我有同佢哋講，呢個暑假好重要，如果成績唔好，環球唔能夠一直咁支持落去，所以今次我哋都all in，希望這首歌能破釜沉舟。」幸好，他割愛原本自用的歌曲〈你唔明㗎喇〉給XiX，結果反應不俗。緊接着，他帶同XiX亮相自己有份主持的無綫節目《唱錢》記者會；期間，他笑言︰「未死得！」繼續有得玩落去。
日前，在美國讀大學的Kiele放假回港，齊人後，郭偉亮馬上安排XiX為新歌拍攝MV。當日，他帶着「4個女」及工作團隊齊集銅鑼灣鬧市，現場所見，導演先拍攝她們開心行街街，一邊行一邊揸機自拍，接着又一起去買小食。期間，郭偉亮在旁𥄫到實之餘，還用手機為她們拍花絮，更不時跟她們溝通交流，十分緊張！當日，「4個女」既聽話又配合，令拍攝十分順暢，郭偉亮也難得可以早收工，返家慰妻。
