更新時間：18:53 2026-05-27
發佈時間：18:53 2026-05-27
發佈時間：18:53 2026-05-27
斷估，冇人會唔認同2016年上映嘅喪屍片《屍殺列車》，係K-Zombie天花板啩？
執導呢部戲嘅延尚昊，聽講用咗200億韓圜（約1億港元）製作費，拍出新片《屍殺禁區》，繼續玩激戰喪屍。最大分別係，呢班喪屍會不斷升級，一隻得到新訊息，解鎖新技能，就全部升呢；一隻衰咗，被人呃，就火燒連環船攬炒。
咁樣玩法，真係好想同女主角全智賢講句：走得快，好世界！
相隔11年現大銀幕
全智賢拍完《復國者聯盟》後，足足有11年冇喺大銀幕出現。講到對付喪屍，佢喺《屍戰朝鮮：雅信傳》早有經驗，只係舞台由古代搬到今次《屍殺禁區》嘅現代。
片中全智賢飾演生物科技教授，有次參與學術會議，點知遇上大樓爆發喪屍病毒，全棟大廈好快被緊急封鎖。佢唯有同一班倖存者諗計仔殺出重圍，順便尋找自稱注射過疫苗嘅具教煥，勢估唔到惡魔在身邊，嬲到全智賢質問：「你究竟做咗啲乜？」
不斷進化用一方法對抗
陪住全智賢出生入死嘅池昌旭，飾演熟悉大樓結構嘅保安員，由於家姐金信祿下半身癱瘓，佢唯有孭住家姐逃生，情形好似《鬼滅之刃》嘅炭治郎成日孭住禰豆子周圍走咁。佢仲會同全智賢合演韓劇《人類X九尾狐》，不過預計明年先有得睇。
講番套戲，最得人驚嘅地方係喪屍會不斷進化，由最初識爬，好快就識企起身行，仲識得共享智慧，聯群結隊攻擊人類。導演延尚昊指喪屍片熱潮之所以不減，係因為佢代表每個時代嘅恐懼，又話：「以前動作場面通常係奔跑、閃避、殺戮等，今次加入欺騙戰術，相信觀眾會有新鮮感。」
上映日期：5月28日
延伸內容：《屍殺禁區》（Colony）新片介紹｜全智賢、池昌旭、具教煥主演，延尚昊執導
延伸內容：全智賢李敏鎬相隔9年再合作拍廣告搵銀 教你護膚點零死角
最Hit
