發佈時間：17:02 2026-05-22
杜小喬，暱稱「娘娘」，源於2013年幫YouTube頻道「熊仔頭」拍片，飾演專收觀音兵的港女而爆紅得名。沒想到娘娘唔易做，翌年患上紅斑狼瘡症。
「嗰陣時我逼死自己！24小時無論出唔出鏡，都要畀一個可愛感覺出嚟。有日發現隻腳腫到着唔到鞋，醫生聽見我甩頭髮，有一、兩日屙唔到尿等症狀，即刻轉介我去睇急症，抽完血先知個腎已經no good。紅斑狼瘡呢個病影響我內臟，唔係表面。」
God bless，慶幸病情現已受控。
「我好感謝男友譚永浩，佢令我知道要放鬆，做返真正嘅自己。」
拍親熱戲要備案
杜小喬成為宅男女神後，有段時間「銷聲匿跡」，原來這幾年她專注做舞台劇。由2016年第一套《愛情部隊鍋》開始，下月又有宮廷音樂劇《花影夢》面世，劇中她飾演歌姬，要挑戰粵劇元素的流行曲。
「有啲緊張！我收到劇本，第一時間走去學武術、學耍劍，遲啲仲會學水袖。有一場戲我要同谷婭溦battle，角色設定我同佢嘅唱功旗鼓相當。谷婭溦本身唱歌好勁，我就淆底，要自我催眠先得。」
由演廣播劇、拍戲，轉跑道去演舞台劇，眨眼間，她已累積了豐富經驗。當中2024年的《金鎖記》，曾在中港兩地巡演半年，成為她最難忘的一部。
「每次去唔同地方，都要適應新劇場，同埋排練時間好短，焦媛嘅專注度係令我覺得：『嘩！原來演員係咁。』佢每次表現都用盡200%嘅力，排練時，我哋其他演員都唔夠膽講笑。」
前輩的專業令她心悅誠服，尤其有次她忘記對白，焦媛即刻察覺到而幫她解窘。
說着說着，她急忙補鑊：「當然我都難忘《我們的青春日誌》啦！唔係都冇可能識到我男友譚永浩，同埋𠵱家演親熱戲，都會同佢報定案先。」
聽陌生人話改名
眼前的杜小喬，健談開朗，但原來她中學時代非常內向，很少和同學接觸，又勁驚被老師叫自己的名字。
「當時我好怕叫『杜小喬』，對呢個名又愛又恨，因為太易記喇。我係嗰種好怕俾人見到，有得匿埋就匿埋嘅人，所以有次返母校見到𠵱家做咗老師嘅舊同事，佢都話估唔到我會做娛樂圈呢一行。我希望大家都唔好猶豫踏出第一步，因為冇人知呢一步會帶到你去邊。我好多謝熊仔頭當年畀機會我去演一個咁外向嘅角色，令其他人畀工作我。」
記性好的話，應該記得杜小喬曾改名「杜以辰」，原來改名念頭來自一名素未謀面的網友。
「嗰時疫情上網吹水，有人話聽見我個名，就知我係嗰種乜都會拱手相讓，唔理自己嘅人。我覺得講得好中，就係因為呢個咁簡單嘅原因，對我嚟講好似一個紋身，於是我就改名『以辰』，提醒自己就算要照顧人，都要先諗自己感受。」
起用陌生人幫自己改的名字，杜小喬果然隨性。然而，後來她又改回原名，「因為『小喬』係媽咪改，我真係覺得好靚，同埋呢個名同『娘娘』掛鈎嘛。」
誤會求婚空歡喜
「娘娘」稱號為杜小喬帶來人氣，然而亦因為這個形象，令她長期受壓，就算跟當時的男友相處，也要啟動娘娘mode，令她攰到一個點，結果2014年患上紅斑狼瘡症。
提起這段往事，她淡淡然的說：「嗰時我有食類固醇藥，導致有副作用水牛肩同月亮面。我嘅狀態會因應陽光、溫度而受影響，同埋食藥會令我個胃變得唔好，要調整生活作息時間，要早食飯，以免消化唔到。𠵱家病情穩定咗，我好感謝譚永浩，遇到佢，真係去到人生一個轉捩點，佢令我對有啲嘢釋懐，想做返真正嘅自己。」
她和譚永浩因合演《我們的青春日誌》而撻着，拍拖7年，她欣賞他的細心，有耐性。「我哋嘅性格好唔同，會互補。佢會同我分析一啲睇法，邊有男仔肯同人傾咁多偈？我覺得已經互相搵到靈魂嘅另一半。」
提起男友，她笑得甜絲絲，有次還差點以為對方求婚。
「拍拖一年左右，佢若無其事送咗隻戒指畀我。冇幾耐佢去拍嘢，將個會場布置得好靚，好多氣球，做到好似向我求婚咁。嗰刻我心跳得好快，點知佢只係希望我開心，當下我落差感極大。呢啲男仔醒呀，如果第時我生女，一定教佢要小心啲。」
35歲，憧憬結婚育兒生活好正常。譚生，識做啦！
