發佈時間：18:21 2026-04-23
鄭秀文（Sammi）剛完成兩場吉隆坡站演唱會，回港立即為7月10至11日《You & Mi 鄭秀文演唱會2026亞洲巡迴終點站－香港啟德主場館》密鑼緊鼓操練，Sammi表示將保留You & Mi精髓融入新意：「乜都試吓。」而門票早前獲優先訂購秒殺，下周二（28日）早上10時將公開發售。
回顧吉隆坡站演唱會仍激動
回顧剛完成吉隆坡站演唱會，Sammi仍然心情激動，並說：「歌迷相當熱情，我太耐冇喺當地演出，好似見返啲舊朋友，大家都成長咗，除咗興奮，更多係感動！」即將要踏上香港啟德主場館開騷，是不一樣的期待，她續說：「我諗喺啟德主場館開騷好唔同，單單係場地已經俾到我好多新鮮感，因應個場地可以諗多好多構思。今次唔係一個全新嘅演唱會，畢竟係一個巡迴演唱會嘅終點站，需要參詳嘅地方就係點樣保留原有演唱會好嘅地方，再加啲我自己想加嘅新嘢上去，將舊同新融合埋一齊，就係今次呢個演唱會俾我自己同埋團隊嘅一個功課。」
鄭秀文親自到啟德主場館考察
早前Sammi親自到啟德主場館實地作考察被震撼到，她說：「真係好驚訝，第一、個場真係好大；第二、好有新鮮感。我覺得有好多紅館做唔到嘅，可以喺呢個場地嘗試。」至於哪個部份必定要保留？她直言：「好難答，因為我係一個好鍾意改嘢嘅人，唔到最後1秒都唔知我最終想點，或者會點做。我覺得創作過程係不斷去琢磨，然後去蕪存菁，所以我呢一刻答唔到有邊一部份必須保留或者會改動。」
邀請嘉賓望給歌迷驚喜
總之Sammi表示乜都會試吓，「人一世物一世，我好想感受一下呢個場同紅館有乜嘢唔同，試吓喺啟德主場館開過騷之後，睇吓鍾意邊度多啲，又或者越做越細，鍾意去啲好細嘅小劇院。我唔知呀，人喺唔同嘅表演階段，表演方式唔同場地需要都可能有唔同。」
場地變大，演唱會嘉賓會否加碼？Sammi笑說：「場地大咗，嘉賓未必要加碼嘅，唔通時間又要加長咩？我當然希望請到大家都鍾意嘅嘉賓，我𠵱家都諗緊希望到時可以俾驚喜大家。」
《You & Mi 鄭秀文演唱會2026亞洲巡迴終點站－香港啟德主場館》
日期：7月10至11日
時間：7:30PM
地點：香港啟德主場館
票價：HK $1,880／$1,680／$1,380／$1,280*／$980／$880*
*Restricted View（視線受阻位置）
門票公開發售：4月28日（上午10時）／快達票指定節目售票１網
網上購票：hkt.hkticketing.com
電話購票：31 288 288（僅適用於購買輪椅門票）
