發佈時間：12:00 2026-03-03
被外界封為「世紀賤男」的周永恆（Roy），2014年背着當時的老婆趙頌茹（阿Yu）偷食之餘，還向她發出「死亡短訊」，更大鬧女家的寓所，並向外母吐口水兼喊打喊殺，兩人最終在2017年正式離婚。一年後，周永恆火速與內地女友陳薇（Britni）結婚，婚後誕下一子，一家三口樂也融融了一段時間。2023年，夫妻突然爆出「家暴羅生門」事件，甚至鬧上法庭。
「賤男」品性難移又難以觸摸，上周四（2月26日），前女團MVG的成員周曉彤（Ivy），突然在社交網轉發周永恆的攬女相，更爆seed鬧爆對方是「世紀賤男」；以及欺騙她已經離婚，千萬個大話。此外，Ivy又向《東周刊》哭訴，近5個月來，備受周永恆纏擾，還離譜到赤裸上身在她的屋企門口發癲，搞到她極度驚慌！
多年追求者
日前，現年41歲周永恆（阿Roy），被網民拍到在港鐵的車廂內攬女，並上載到社交網；緊接着，前女子組合MVG的成員周曉彤（Ivy），轉發阿Roy的攬女相之餘，還爆seed鬧爆對方是「世紀賤男」；以及欺騙她已經離婚，千萬個大話。
雖然Ivy迅速刪除該帖文，但已觸動了網民的神經，並紛紛討論兩人是否情侶關係？避免被誤會是「恆女郎」，Ivy馬上現身留言回覆網民，強調自己與阿Roy不是戀人，對方只是她多年來的追求者；另外，因為她拒愛，導致在這數月內，遭受到對方的騷擾，甚至乎受到生命的威脅。
被咬住唔放
日前，《東周刊》就發現精神萎靡的Ivy，在屋企附近的商場流連。記者上前邀請Ivy接受訪問時，她即刻神色慌張地問：「你哋係咪真係可以幫到我？周永恆真係搞到我崩潰，我𠵱家連返屋企都唔敢，佢真係好恐怖！」Ivy坦言，與周永恆識於微時，當時他仍然和趙頌茹（阿Yu）一起：「我哋係朋友，我叫佢做『老竇』，佢叫我『阿女』。佢當然係有追求過我，但我一直都冇接受過佢；不過，我曾經同佢講過：『如果我40歲前未嫁、未有男朋友，我就俾個機會你！』點知佢一直記住，並且咬住我唔放。」現年38歲，就快踏入40歲的Ivy，於去年9月起，就開始成為阿Roy的「獵物」。
Ivy坦承自己都有情緒病，所以對阿Roy感同身受，她憶說：「我同佢一直都係好朋友，喺去年9月，佢話佢老婆（陳薇，Britni）俾綠帽佢戴，個仔又唔理，希望我每一個星期都可以幫手湊佢個仔一日，俾啲母愛佢個仔，就係咁，我就應承咗。」初時，阿Roy都表現正常，但冇幾耐之後便「癲性大發」，除了聲稱曾被一名男性朋友、音樂人「L先生」性侵之外，還突然表示自己無家可歸，更執拾家當到Ivy的屋企門口，要求一起同居。當被Ivy堅決拒絕後，他立刻失控發狂。
兒子變人球
提及此事，Ivy仍心有餘悸，兼眼濕濕地哭訴：「佢真係好癲，佢三更半夜會走上我屋企門口不停撳鐘，撳足成個鐘都唔肯走，我報埋警，佢走咗，冇幾耐佢又嚟過，佢仲跟蹤我，話要殺死我，我真係好驚，驚到唔敢返屋企！」
飽受阿Roy滋擾，固然煩到爆炸！不過，最令Ivy心痛的卻是，眼見阿Roy的兒子熙仔慘成人球。由於Ivy曾經湊過熙仔，兩人建立一定的感情，故一提起他便聲淚俱下：「我真係好傷心，佢囝囝真係好乖，好聽話，周永恆之前俾我發現佢癲到收埋個仔，唔俾佢返學，所以我最希望件事曝光後，如果佢同佢老婆真係搞離婚、爭撫養權嘅話，希望囝囝可以跟到一個適合嘅人去照顧，小朋友無辜㗎！真係唔好累到小朋友。」她希望事件曝光後，阿Roy不會再胡思亂想，盡快冷靜下來；而他的兒子亦可以得到適切的照顧，過回小朋友的正常生活。
延伸內容 : 怒轟周永恆咬住唔放 周曉彤曾被Oppa虐打
