發佈時間：12:00 2026-02-16
藝人伍富橋的億萬太太梁兆楹（Shirley），去年參加HOY TV節目《領廚爭霸戰》贏得亞軍後，「廚神」形象鮮明。為迎接馬年，她特意用「馬」字的食材，炮製幾道賀年菜，分別是「馬蹄肉餅蒸膏蟹」、「雙檸蒸馬友」及「桂花酒釀馬蹄」等，祝願大家踏進丙午馬年，馬到功成，馬上行運！
祖籍上海的梁兆楹，小時候由廚藝了得的外婆湊大，細細個已喜愛食。「婆婆好錫我，每一分每一秒都驚我會餓親。媽咪話，我兩歲已經可以自己坐在飯枱食一隻乳鴿。只要有嘢食，我就唔會扭計。」
外婆和兩個姨婆都愛下廚，連帶Shirley亦愛在廚房留連，「佢哋最叻煮上海紅燒肉、元蹄。我將原本嘅版本改良，𠵱家都煮得算拿手。只要有啤酒、可樂，就可以做到紅燒汁個味，完全唔使落花椒八角，如今婆婆反而倒轉用我個煮法。」
「廚神」不是一天煉成，她也經歷過地獄階段，「我第一次下廚，係煮泡菜鰻魚魚蛋炒飯，基本上係將雪櫃有嘅嘢炒埋一碟，但唔知點解炒出嚟個飯好似risotto咁，濕嘅，好核突，簡直係一個噩夢。」
真正開始鑽研廚藝，是在英國讀大學的時候，「當年在英國讀書，完全冇啖好食，無辦法之下惟有侷住睇cookbook學煮餸。但有時食譜或者條片講得幾清楚都好，始終每個人的口味都唔同，都要靠不斷嘗試至學到。」
試試下，她更發展成生意，開始自製兩餸飯盒，賣給同學賺錢，「我記得我借晒朋友的電飯煲，最高峰時有9個電飯煲鋪咗喺個廳度煮飯，再自己煮大鑊餸。其實那年我已經畢咗業，在London讀緊Master，只係返去為班考緊試的同學煮飯。當時我有個IG page，叫Kitkitkitchen，同學想幫襯就DM我，每個飯盒賣5英鎊。做咗一個月左右，考試完咗我就無再做了。」
納豆式婚姻
熟能生巧，經此一役，她變成了同學的「米飯班主」，「在英國，基本上我日日都煮飯，每日煮6、7個人飯，好多師弟都話我有份養大佢哋，哈哈。」
2022年與伍富橋（Alvin）結婚後，她就成為丈夫的御用主廚。「我每日都煮飯俾我先生食。佢食嘢好簡單，以前食全素，但後來因為有大豆敏感，就改為唔食紅肉。有時整手撕雞、燒雞，或者蒸條魚俾佢食，都係以清淡為主。」
她的招牌菜，包括有鹹雞、紅燒肉、排骨麵等。「排骨麵係好受歡迎，朋友知我煮，半夜都會由清水灣專登揸車嚟我屋企食。」
要她用菜式去形容與家人的關係，她笑言：「同婆婆的關係，一定係紅燒肉。因為只要我哋返屋企，佢就一定會煮一大鍋。見到紅燒肉，就等於見到佢，好有家的感覺。」
而「非洲雞」，則代表着媽媽，「當年佢嚟英國探我，我話好想食葱烤大扒（即紅燒豬扒），結果佢煮到全黑色，又乾，好似樹皮咁，我就幫佢改咗個名叫非洲豬扒，呢個係佢嘅首本名菜。
「佢仲試過煲粥嘅，但佢一講煲粥，大家就會嚇一嚇，因為佢會將雪櫃所有嘢都放晒落去煲，最經典係粥入面有粉絲、五香肉丁、炸菜、娃娃菜，仲有撕扯完的午餐肉。唔好再問喇，佢陣間打我，哈哈。」
與Alvin結婚接近4年，他應該學到妻子的一招半式吧？「佢更加恐怖。佢曾經煎過糖醋蛋俾我食，即係好似煎荷包蛋咁，最後落個糖醋汁，甜甜酸酸，入面應該係流心嘅。但佢就煎咗一隻炸蛋出嚟，燶晒。所以呢兩個人，我禁止佢哋喺我個廚房出現，好危險。」
兩人的婚姻一直是城中焦點，她以納豆來形容自己與丈夫的關係，「 納豆呢種食物，係好睇個人口味，有人好鍾意，有人好抗拒，就好似我哋嘅婚姻咁，有人祝福，亦有人唔睇好。作為一種咁有代表性嘅食材，佢唔需要靠其他做法或菜式去證明自己，只需要繼續做自己；但其實如果你俾個機會佢，品嚐下，就會發覺佢冇你想像中諗得咁差，仲有可能會愛上佢，當然你亦都可以繼續唔鍾意佢啦。」
打牌罰飲酒
說到新年習俗，她笑稱小時候不喜歡過年，「細個過年，婆婆通常年三十晚就俾利是我哋，因為叫壓歲錢吖嘛。第二朝一早就要起身，因為好早就有人嚟屋企拜年，所以我麻麻地鍾意，好悶。全部人坐喺度，電視又無咩睇，淨係睇賀年節目。」
如今人大了，她反而改觀了，「𠵱家大個咗，反而鍾意過年，因為大條道理放假返去上海陪婆婆，會覺得見一面就少一面。」
近幾年，她都習慣返上海過年，「上海過年，好多店舖都照開，無休息，同埋所有親戚都會嚟晒婆婆屋企，好熱鬧，一陣又食炸春卷，一陣又食年糕，食唔停。就算要我入廚房煎幾轉鍋貼，我都開心。天氣雖然凍，但感覺好溫暖。」
中國人過年，都愛與親友打麻雀耍樂。家族有做麻雀館生意的她，會否是雀壇高手呢？「其實我打麻雀好渣，屋企人從來冇教過我打牌，反而係十幾歲時成班同學圍威喂學打。最好笑係，Alvin第一次去我屋企就係打麻雀。嗰時大家都以為佢識打，點知佢打得勁慢，打打下仲要瞓着覺。佢打牌瞓覺係出晒名，身邊所有朋友都知㗎！」
她又笑言與朋友打牌不是賭錢，而是輸了罰飲酒。「我班朋友係為咗飲酒先至打牌，通常係飲茅台或者威士忌。最高紀錄，試過疫情時，有朋友輸咗140幾杯酒，跟住分期找數俾我。」
有做食品及醬料生意的她，今年與往年一樣，會在維園擺年宵。踏進馬年，她的新大計是報讀寵物營養學課程。「因為我自己有養狗，盡可能都想佢哋食得健康啲，長命啲。同埋屋企3隻狗仔都係玻璃肚，我好想了解佢哋可以食乜、唔可以食乜，希望過完年就去報名啦。」
新年除了恭喜人發財，身體健康都好重要㗎！
