更新時間：16:13 2026-01-31
發佈時間：16:13 2026-01-31
發佈時間：16:13 2026-01-31
香港人最鍾意返工，成日話受氣係份人工包埋，但問心，邊個未試過想好型咁拍枱劈炮走人？
《腦細天劫》（Send Help）女主角麗素麥雅當絲（Rachel McAdams），日日要硬食mean精上司Dylan O'Brien嘅冷嘲熱諷，點知一次飛機失事，兩人被困荒島，叫天不應，叫地不聞。呢個時候，平時巴巴閉閉嘅Dylan變成廢柴，要靠麗素先可以生存。換轉係你，你會趁機有仇報仇，抑或大愛，捉魚食都捉埋老細嗰份？
為打工仔出啖氣
Dylan O'Brien之前主演過《移動迷宮》（The Maze Runner）系列，今次喺《腦細天劫》入面，佢體會到咩叫風水輪流轉嘅滋味。雖然陪佢流落荒島嘅唔係排球Wilson，而係活生生嘅一個人，但主場唔同，由office變荒島，佢有求於精通求生技能嘅麗素麥雅當絲，冇可能再擺老細款囉！
導演森溫美（Sam Raimi）話：「睇住曾經有權有勢嘅老細，淪落到跪求自己睇唔起嘅下屬，真係大快人心，為打工仔出番啖氣。我哋嘅故事全世界都會明，係想講社會各界要互相尊重，唔好見高拜見低踩。」
細細個就睇麗素
拍過《忘了、忘不了》、《回到最愛的一天》等愛情片嘅麗素，今次癲覆形象飾演中女社畜，表面上同Dylan合作求存，實則各懷鬼胎，劇情發展落去，越來越荒誕、暗黑同血腥。「我同森溫美喺開拍前幾個月就討論『蓮達』呢個角色，覺得佢好得人鍾意，大家會不由自主地為佢打氣。」
現年34歲嘅Dylan，為人直率，唔怕得罪人，佢話細細個就開始睇47歲麗素嘅作品，今次能夠合作，令佢超興奮， 「麗素係我見過嘅最偉大演員之一。」佢呢種興奮，仲延續到麗素日前獲頒荷李活星光大道「星星」榮譽，兩個攬到實一實合照。
上映日期：1月29日
最Hit
