發佈時間：16:10 2026-01-06
剛踏入2026年，苑瓊丹（苑仔）急不及待於在佛山舉行新直播公司「星耀星柏」的開幕儀式，除邀請一眾圈中好友出席，包括陳百祥（叻哥）、陳浩民、鄭則士、黃一山、黃建東、林子聰、金剛、張穎康、陳志健、黃子揚、羅天池、姚瑩瑩、李焯寧和張美妮等等外，她還宣佈與「視帝」陳山聰簽約，齊齊做直播拍住上！
陳山聰做直播幫補
陳山聰笑言苑仔一直鍾意「靚仔」，更「睇住」自己成長，所以很安心一齊合作，並說：「其實我覺得最重要係大家互相信任、有誠意，大家都覺得有合作嘅空間同企喺同一陣線。我喺內地經驗唔及苑仔，佢係我嘅盲公竹，好似細個時，係佢話我知點做戲。TVB年代已經係咁，今天兜咗一圈又再次合作！」陳山聰笑言未知直播收入，但兒子開始讀小學，要苑仔幫補補習費，十分搞笑！
苑瓊丹投資過千萬
苑仔表示今次投資過千萬，對陳山聰非常有信心：「佢基本係我第一個簽約藝人，無論護膚、滋補、時裝，甚至做運動，佢各方面都好啱做直播，好有說服力！第二件事係佢知道我唔係古靈精怪，起碼佢同我一齊合作，唔會有人跣佢！我哋合作好簡單，就係做好呢件事，做唔好又唔會俾人留難。」
叻哥爆佘詩曼往事
當日除陳山聰外，「叻哥」陳百祥、陳浩民都有現身支持好友。叻哥仲爆出爐視后佘詩曼昔日往事：「當年係我提攜佢出嚟，你哋知唔知？我喺意大利識佢媽媽，得我一個知邊個係佢老豆，所以佢當年選港姐時，佢媽媽打俾我話個囡參選，咁我話包佢頭三名，我諗住亂噏，點知佢真係攞第三！」叻哥表示苑仔曾飾演自己女友，除秀姑外，只會「俾面」苑仔。
曾志偉功成身退
提到好友曾志偉宣佈離開TVB一事，叻哥為對方送上祝福：「戥佢開心！我覺得佢做得很好，𠵱家冇人可以坐呢個位咁耐，因為你好難將一個已經喺低層嘅事業慢慢拉上嚟，我覺得佢好辛苦，𠵱家功成身退，佢自己覺得開心就好，唔使理人講咩，好似我咁口沫遮攔都唔會死！」
陳浩民被爆料驚青
陳浩民則表示曾與苑仔一齊做直播，被對方口才折服，仲要「揞住」苑仔個嘴先肯收口：「佢係咁講係咁講，到最後人哋都叫佢唔好講呢啲，咁我就出手揞住佢個嘴！（講緊咩？）唔記得啦！」叻哥突然插嘴：「講返以前佘詩曼、以前啲女朋友。」嚇得陳浩民揞住叻哥把口，苑仔打圓場叫他講好友曾志偉，怎料叻哥繼續爆肚：「我哋唔講矮過5呎嘅人！」
姚瑩瑩現身支持苑仔
姚瑩瑩當日也有現身開幕禮，提到《尋秦記》上映仍非常興奮：「古生（古天樂）請咗我去睇首映，其實我哋成班演員都少聯絡，我話大家都要聚一聚，見到『大王』（林峯）成家立室都成熟晒。」
張美妮和鍾潔怡是專程到佛山恭賀苑仔，張美妮笑言想試做直播了解「滋補品」，還自爆當年追個女時，不時逼老公進補，只是未敢炮製「鹿鞭」等古怪食材予對方享用。
而李焯寧一早到場幫苑仔打點，並稱希望早日拍住一齊做直播：「因為有苑仔一齊做嘅直播，就會有好成績，所以我喺度隨時候命！其實我都有戲癮，如果有短劇拍，我都想參與。」
延伸內容：苑瓊丹自爆係「公主」「玻璃大王」老公成拿督要下跪請安
《東周網》訪談系列節目《星桄伴我心》1月重磅嘉賓：
即睇：龔慈恩激罕剖白2次離婚傷痕：「我冇恨之入骨！」│25歲女兒林愷鈴閨房私密│點評佘詩曼、黃宗澤、王敏奕
立即追蹤《東周刊》全新WhatsApp頻道，緊貼全城熱話、突發猛料、獨家消息！
