發佈時間：13:00 2025-11-30
有個專幫李嘉誠、榮智健等猛人睇風水的「富豪國師」爸爸陳伯，陳嘉龍的童年生活，比很多人精彩。
7歲，別人還在玩模型車仔，而他則於凌晨4時起床，跟隨爸爸摸黑上大帽山觀星，將最基本的天文星象知識輸入腦。
「我自細就見到好多名人出入爸爸屋企，我問爸爸點解咁鍾意幫人睇風水，佢話人生有好多條軌道，行歪咗，啲運就唔會嚟。風水作用就係幫人重回正確軌道，等佢哋人生唔會起伏不定。」
爸爸悉心栽培，鋪路想他接棒，偏偏他熱愛自由，20歲走去當海員，一走就十多年。回港後他一邊在旅行社工作，一邊跟着爸爸四出睇風水，慢慢學懂玄學為何物。
「其實風水唔係迷信，觀星象知天命，係好科學。了解箇中奧妙，就會行少好多冤枉路。」
2003年，陳伯臨終託付，他正式繼承衣缽，成為出色的命理風水師，至今20多年，見盡世間幾許風雲變。
凌晨4時觀星
全名陳朗的陳伯有3位太太，眼前的陳嘉龍，是陳伯和元配所生的孖胎細仔。他滿頭銀絲，是陳伯唯一帶去李嘉誠、李兆基、榮智健等富豪府第睇風水的兒子。
想當年，陳嘉龍年少懵懂，不知風水玄學、紫微斗數是甚麼一回事，但爸爸陳伯一星期總有兩、三次，會在凌晨4、5時拍醒他行山觀星，睇完才「父子檔」去飲茶，然後返學。他最記得有一個月，爸爸叫他每朝買豆漿和油炸鬼，送到當年的雪園酒店給一位老人家，那人正是末代皇帝溥儀的堂兄、與張大千合稱「南張北溥」的國畫大師溥心畬。
「我睇住佢用條脷舔筆，話要感覺筆鋒啲毛嘅氣係點，先至落筆。當年我爸爸跟佢學畫畫，佢離開時，仲送咗春夏秋冬4幅掛畫俾爸爸。嗰時我唔識話跟佢學，不過諗諗下，使乜學，問佢攞幾幅畫已經發達啦！」他笑說。
直到12歲，陳嘉龍開始意識到爸爸出名，「我問爸爸點解成日觀星，佢話星象會影響人的運勢。嗰時我唔識風水，只知爸爸預測啲嘢好準，啲人嚟搵佢，爸爸就答：『你朝早再嚟，最好唔好洗面刷牙，睇你氣色點先。』」
陳嘉龍續說：「當一個人瞓醒，喺陽光下一望，睇氣色係最清楚。面分上、中、下三庭，要比較整體皮膚面色、人嘅神髓，呢啲係要跟住學，書冇寫。
「記得嗰個年代，搭飛機好巴閉，有錢人會搵風水師睇氣色當買保險，冇問題先至會上機，爸爸都幫人睇過。64年台灣有場空難，其實有人勸過電影大亨陸運濤唔好上機，根本佢嘅運氣不致於死，但坐佢前兩排有個人運氣非常之差，咪搭沉船，全機墜毁囉。」
富豪穿梭大宅
男兒志在四方，陳嘉龍在20歲那年，當上了海員，再見爸爸陳伯，已是十多年後的事。茫茫大海，最驚險一次是79年遇上颶風。「我仲記得個風叫David，當時喺澳洲，明明個風走咗，又追番我哋轉頭，仲將我哋捲咗入風眼。搏鬥咗3日3夜，風浪好大，老船員猛唸南無阿彌陀佛，想行都行唔到，好似搖搖板咁。後尾個風走咗，即刻定位，嘩！真係一額汗，原來已將我哋吹離海岸60海里，如果係吹另一邊，成隻船已被沖咗上岸，一定死。」
行船令他看盡風浪，亦經常有觀星的機會，但他返港後，未有全身投入玄學事業，反而被爸爸安排去打理古董店，更是人生第一次見到李嘉誠。
「當時我都唔知佢係邊個，傾咗一輪，佢知我行過船，就叫我去佢公司幫手做船務，但我梗係話唔得啦，海員唔同做管理層喎。如果我應承，可能入咗會德豐都唔定！爸爸同李嘉誠好好朋友，會送幾百萬嘅古董俾佢，叫佢隨便揀，話冇所謂。」
陳伯當時是李嘉誠的御用風水師，一心不能二用下，就介紹了師弟任法融（已故中國道教協會會長）為「四叔」李兆基效力。10年前，陳嘉龍曾到陝西樓觀台探望任法融，獲贈4個大字「無為而治」，非常珍貴。
對古董興趣不大的陳嘉龍，之後轉到旅行社工作，業餘就幫爸爸手，正式學睇氣色和風水。
「每日上我哋加多利山屋企嗰條樓梯，出出入入都有好多富豪、明星，多到我認唔到。飯枱成日都有10幾人圍住坐，大家互不認識；而爸爸旁邊一定有個吉位，等啲人坐埋去問嘢。
「爸爸新年時唔收利是，因為佢話佢係長輩，只會派，試過叫我去銀行攞30萬嘅一千蚊新鈔嚟封利是。當年，個個富豪封利是都好大。」
陳伯親選媳婦
陳嘉龍有兩段婚姻，與現任妻子黎寶君結婚20多年，育有兩女。訪問這天，兩人低調穿情侶裝到場，陳太更不時體貼地為丈夫整理衣領，照顧周到。
提起這段緣份，聽聞這位新抱當年是陳伯「欽點」，叫兒子非卿不娶。陳嘉龍聽後指着太太笑說：「你問佢啦，佢好清楚。我第一次帶佢見爸爸時，我哋拍咗拖年幾、兩年，佢唔知我爸爸陳伯好難見，而爸爸亦唔知佢係我女朋友。」
陳太黎寶君接着說：「我知嗰個係你爸爸呀！嗰次我同聯交所主席一齊上去佢屋企，我一心諗住上去坐一坐，之後就去party。聯交所主席問完嘢，佢爸爸就問我有冇嘢問，我讀物理系，唔信呢啲嘢，所以就答話冇，然後就走，點知佢一直送到我出門口。後來才知，原來嗰次係我老爺第一次送人送到出門口，佢仲問我可唔可以留低講少少嘢，我話下次先啦，哈哈！」
人人都希望能夠跟陳伯講多兩句，但偏偏她很大膽，當面拒絕。她回憶道：「後來聽個朋友講，話老爺睇到我將來可以幫到師傅（陳嘉龍）。到第二次見面，算係見家長啦，佢俾咗一封大利是我，仲送咗個花樽。話說嗰晚食完飯，行年宵時買咗年花，夜媽媽，我諗住去日本城買個花樽裝住啲花就算，點知老爺叫我入去房間是但揀一個，結果就攞咗個明朝花樽，到今日呢個花樽都仲擺喺屋企！」
陳伯神機妙算，算到兒子有好姻緣。而陳嘉龍亦不負所望，珍惜屬於自己的妻星，結伴走人生的下半場。
延伸內容：陳嘉龍師傅專欄《妙算陳玄》│佛牌法器或靈力，佩作飾品有學問
《東周網》訪談系列節目《星桄伴我心》11月重磅嘉賓：
即睇：孫慧雪爆拍性感寫真因由 生仔大出血攞命搏 被懷疑是犯罪集團主腦
即睇：「億萬駙馬」伍富橋：人人以我唔使做！爆太太出招試探人品 永不忘被外父羞辱係鴨
立即追蹤《東周刊》全新WhatsApp頻道，緊貼全城熱話、突發猛料、獨家消息！
