更新時間：17:27 2025-11-26
發佈時間：17:27 2025-11-26
發佈時間：17:27 2025-11-26
俾個心理準備大家，入場睇《優獸大都會2》（Zootopia 2），記得豎起耳仔，嚟個聽力測試。事關廣東話配音版，除咗繼續有黃子華聲演狐狸阿力、容祖兒做兔仔女警朱迪外，仲有Marf（邱彥筒）加盟為羚羊紅星嘉西BB配音，而Serrini（梁嘉茵）、余香凝、廖子妤、許倚榕等人，就未公布為邊個角色開聲。一邊睇，一邊追「聲」，好似估歌仔、開盲盒，諗起都覺得好玩。
《優獸大都會》全球勁收10.3億美元
2016年上映嘅迪士尼動畫電影《優獸大都會》，講兔仔女警朱迪同狐狸阿力，聯手智破綿羊副市長咩小姐嘅陰謀，教曉咗觀眾凡事唔好有偏見，好人、壞人係冇樣睇。
套戲口碑好，票房自然靚仔，全球勁收10.3億美元（約80億港元），仲攞埋奧斯卡同金球獎最佳動畫。咁威水，推出續集理所當然，只係冇諗到一等就等足9年，而《優獸大都會2》嘅時間線，只係上集發生後一星期。
朱迪阿力參加「拍檔危機處理班」
朱迪同阿力破解咗優獸市史上最大案件後，開始覺得有啲地方唔夾，要去參加「拍檔危機處理班」修補關係。期間一條神秘大蛇潛入優獸市，搞到天翻地覆，呢對拍檔唯有再次化身臥底去查案。
黃子華容祖兒繼續為阿力朱迪配音
今集嘅動物世界比上集更豐富，引入埋爬蟲類同半水棲動物角色。再度幫阿力配音嘅子華神，自覺已經好完美地演繹呢個角色，「唯一可以更完美就係開拍真人版，由我親身扮演阿力！」
祖兒就話今次配音，最大挑戰係要一輪嘴講超長對白，「有幾場戲，每段對白有半頁紙咁長，講到條脷都打晒結，要練習好多次先講得掂。」
上映日期：11月27日
延伸內谷：黃子華容祖兒相隔9年再為《優獸大都會2》配音 Marf新加盟聲演仙氣女神感緊張
《東周網》訪談系列節目《星桄伴我心》11月重磅嘉賓：
即睇：孫慧雪爆拍性感寫真因由 生仔大出血攞命搏 被懷疑是犯罪集團主腦
即睇：「億萬駙馬」伍富橋：人人以我唔使做！爆太太出招試探人品 永不忘被外父羞辱係鴨
立即追蹤《東周刊》全新WhatsApp頻道，緊貼全城熱話、突發猛料、獨家消息！
最Hit
