發佈時間：17:55 2025-10-15
阿Lam林子祥及Sally葉蒨文一連五場的《白頭到老WE ARE ONE世界巡迴演唱會 – 香港站》於10月13日圓滿結束，尾場氣氛勁high，全場觀眾企足全場，尖叫聲幾乎震爆紅館！昨晚紅館繼續星光熠熠，來撐場的嘉賓眾多，包括楊千嬅、莫文蔚同老公及媽咪、任達華同太太琦琦、周凱旋、霍汶希、狄波拉、金燕玲、Joey Tang、陳法蓉、向海嵐、朱凱婷、胡楓、樂易玲、DJ梁文禮、王愛倫、鄧炳強夫婦等。
阿Lam兌現承諾 同黃博合唱
Opening一連串勁歌熱舞之後，Sally雖然跳到爆晒汗，但依然中氣十足地跟全場觀眾打招呼：「Happy last show！forget about 返工！」全場觀眾聽到即刻瘋狂歡呼。今次演唱會過去四場都未有邀請嘉賓，尾場實行一次過晒冷。阿Lam唱到《這一個夜》及《交出一切》時，首位嘉賓登場，原來是《中年好聲音3》三奪MVP兼冠軍的黃博，阿Lam話當初知道黃博揀選《這一個夜》參賽時，心諗：「『嘩！好犀利喎，咁大膽揀呢隻歌。』終於佢贏咗冠軍，嗰陣時我都講過話如果演唱會入面唱《這一個夜》，我一定要搵你上嚟！」今次阿Lam兌現承諾，兩人合唱時全場掌聲拍不停。
楊千嬅 莫文蔚 林德信 林德懿上大合唱
去到encore部分，經典歌曲《敢愛敢做》前奏一響，Sally即說：「Wait a minute，我哋就有啲friends要同我哋唱呢首歌，we have some surprise！」阿Lam兒子林德信及女兒林德懿、來睇show的楊千嬅、莫文蔚同黃博全部上台，變成超級大合唱，整個紅館變成大型K房，氣氛熱烈到不得了！阿Lam及Sally五場唱跳足全場，完全不留力，尾場更加將所有能量一次過爆發，令觀眾不停讚嘆。
延伸內容 : 林子祥葉蒨文第4場｜陳奕迅驚喜現身 合唱《數字人生》五體投地：點解你哋可以做到？
延伸內容 : 林子祥葉蒨文演唱會第2場狂派福利 Sally除衫震撼全場 阿Lam：「我都好耐冇見過啦！」
延伸內容：林子祥葉蒨文頭場｜63歲Sally晒馬甲線狂跳13分鐘 阿Lam獻唱念親恩超感動
延伸內容：林子祥×葉蒨文頭場｜林子祥唱《海闊天空》感觸流眼淚 爆坐廁所有靈感 創作《零時10分》
