發佈時間：13:00 2025-10-16
在《女神配對計劃》中，「東張女神」梁敏巧（Maggie）因跟「暖男律師」Matt 成功配對，而深得網民的祝福。不單止愛情得意，Maggie的工作也遞增，人氣爆燈！
時來運到的Maggie，原來經玄學師傅指點，自搬到跑馬地居住後，順風順水。日前，她大方展示300多呎的閨房，內裏收藏了大量近期熱爆的日本卡通公仔 Chiikawa，每晚攬住陪瞓，童心滿載，縱使30歲，仍有一顆少女心。
童心滿載
今年30歲的梁敏巧（Maggie），憑參選2019年港姐入行，兩年後獲安排加入《東張西望》，成為「東張女神」。去年，她因主持《呃錢》，而被「癡情男」Babyface狂追，成為全城熱話。接着，她參與《女神配對計劃》，並跟求愛勇者「暖男律師」Matt（劉啟進）堅撻着。這對M&M組合，默契度超高、三觀極夾，還是鄰居，相距僅10分鐘的步程，難怪配對成功！
昔日，Maggie在沙頭角長大，但為方便娛圈工作，於是租住黃埔，隨着約滿，經玄學師傅的建議搬到跑馬地，最終扑槌現時這個1套房間隔，另客飯廳相連及設開放式廚房的單位，面積約300多呎。她的閨房布置猶如一間公仔屋，由廳到房都擺放了大量公仔，主打是Chiikawa和蠟筆小新，另還有小忌廉、內褲兔兔及Labubu等，她笑言︰「我都仲好少女，我鍾意咗Chiikawa大半年，之前佢展覽出嘅特別版都買埋。我最鍾意兔仔，因為佢好活潑，又係氣氛組，有佢就令成班人開心。我細個時就鍾意小新，貪佢夠抵死。見到咁多公仔，好似返咗童話世界。」
越住越好
搬進新居後，Maggie的愛情和事業運大躍進，她坦言：「玄學師傅話呢度啱我，教我近門口擺個吸財水晶，另睡房放一個黑矅石達摩，可以擋小人是非，跟住真係越住越好！」
平時做《東張》的採訪工作時，Maggie要反應敏捷，眼明手快，處事獨立能幹。不過，她指最初獨居時，都抱着戰戰競競的心態︰「我係生活白癡，因為之前爸爸照顧得我太好；但始終住沙頭角太遠，返工、放工好唔方便，又會影響到家人嘅生活規律。我初時都怕唔識換燈膽，慢慢都適應到，加上有鐘點姐姐幫忙。同埋爸爸一日打兩次電話俾我，保持聯絡。我自己真係好喜歡獨居，因為好靜，好享受。」
三十而立的Maggie，早前還開創自己的公司做老闆。「好感恩近年多咗人識，多咗搵我做代言、線上工作、剪綵及司儀等。另外，自己同朋友開咗間市場推廣活動公司，𠵱家同一間中資公司傾緊合作，又計劃做帶貨，已經搞緊個內衣品牌；另外，下個月會去珠海開琴行。始㚵踏入30歲後係另一個階段。」在逆市下創業，Maggie抱着大無畏精神：「攞咗姑婆本去試，衝咗先，唔怕輸。（輸咗點？）到時幕前咪再爭取多啲機會，至於幕後，咪打10份工搵番啲錢。」
爸爸呷醋
事業上勇往直前，至於跟「暖男律師」 Matt的戀情，Maggie就希望能夠順其自然：「我哋好多共同地方，好似想法、話題同興趣。現時，我哋每日都開live傾偈，而Matt私下都有傳短訊俾我，問我做嘢點呀？私下嘅佢比較大膽，但佢係好細心、溫暖，係sweet嘅。由於我同佢有時差問題，佢好早起身做gym，跟住又返工，但我嘅工作時間好似同佢倒轉，所以好難見面。（有心發展？）唔好有壓力，我哋都了解中。」據她所知，Matt的親友對他追女仔的手法相當肉緊，不時從旁教路。
Maggie透露，媽媽雖然只從電視上見過Matt，但對他印象不錯，叮囑阿女「呢個都幾好」。相反，爸爸則表現呷醋，她笑說︰「佢好留意我喺《女神》嘅一舉一動，我留意到佢睇咗我好多網上嘅片，但一句都冇問過我。不過，有次阿媽買咗我和Matt做封面嘅雜誌返嚟，佢竟然揼埋一邊，哈哈。」
其實，Maggie對人生一早已有全盤大計，「我嘅目標係34、35歲結婚，跟住即造人，即生，組織家庭，因為我鍾意小朋友，生兩、三個都冇問題，再養一、兩隻狗。」而她構思的婚禮是在海邊的草地舉行，跟住就開派對，邀請一眾至親好友到場。Maggie講到出口，Matt收到未？
延伸內容：梁敏巧劉啟進Matt以情侶檔現身天水圍幼稚園慶中秋送暖
延伸內容：梁敏巧因《女神配對計劃》收入倍增 豪送老父電動越野車
延伸內容：女神配對計劃｜梁敏巧情定律師劉啟進Matt為城中筍盤 華仁畢業英國名學府深造 任美國金融巨頭法律顧問
《東周網》訪談系列節目《星桄伴我心》10月重磅嘉賓：
即睇：湯令山失戀情歌點擊破1500萬 坦認喊住唱 揭Wyman教做人智慧 爆生得唔高謎團 曾擔心生計做某件事
立即追蹤《東周刊》全新WhatsApp頻道，緊貼全城熱話、突發猛料、獨家消息！
