發佈時間：12:00 2025-09-23
1990年度港姐冠軍兼兩屆香港電影金像獎影后，剛剛54歲的袁詠儀（靚靚），出名熱愛購買名牌手袋，掃幾多錢的袋都毫不手軟；而作為「愛妻號」的張智霖（Chilam），亦放行老婆任買，絕不say no ！
據悉，靚靚珍藏的名牌手袋於家中堆積如山，價值超過2千萬元。不過，Chilam 近日參與內地真人騷時，一度感觸落淚覺得自己老了兼力不從心，更驚爆想退休。日前，本刊獨家捕獲靚靚現身中環名店；期間，她激罕勒住荷包，全程齋睇冇買，改變以往豪買的消費模式，莫非已經斬斷購物癮？
張智霖坦承記憶力衰退
現年54歲的張智霖（Chilam）與袁詠儀（靚靚）向來是圈中公認的恩愛夫妻，婚後育有一子、今年18歲的張慕童（魔童）。近年，Chilam主力在內地發展，工作排到密密麻麻，瘋狂吸金。最近，他就忙於參演內地的真人騷《披荊斬棘5》，至10月底，又緊接拍攝TVB的新劇《璀璨之城》。據密友透露，年過半百的Chilam ，無論精神和體力皆大不如前。
半年前，Chilam曾被捕獲在上海求醫接受割膽石的手術，身體開始響起警號。另外，在《披荊斬棘5》中，他也表示自覺力不從心，但為了滿足節目組的要求，只好比以往付出多十倍的努力來完成，並坦承自己已經老了，體力跟不上，還有記憶力都變得非常差；期間，他又一度感觸落淚，更直說萌生退休的打算，令網民震驚！
袁詠儀鍾情Hermès品牌
據悉，出名鍾情Hermès品牌的靚靚，家中珍藏的手袋總值逾2千萬元，而Chilam 亦曾大爆老婆的名牌手袋累積價錢，足夠買兩棟樓。雖然ChiLam經常笑着投訴靚靚買手袋，但只要老婆開心，他仍心甘情願埋單，更曾霸氣的說：「賺那麼多錢，就是為了給老婆花的。」不過，Chilam近年似乎開始改口風，不時公開投訴老婆買袋成狂，他又笑言：「我已經快破產了！」
日前約下午3時半，靚靚與女友人現身她最愛的蒲點——中環置地廣場。當天，她戴上眼鏡，以素顏上陣，即使只是穿上白色恤衫配牛仔褲波鞋，打扮樸素低調，但依然星味十足。而作為一個「購物狂」，靚靚與多間名店的售貨員皆相當熟絡，首站先去YSL放低一袋東西給售貨員，之後又去Valentino睇衫睇袋，更試了一條紅色長裙；期間，她非常親民健談，同店內的幾位售貨員都好好傾。不過，靚靚今次竟然一反常態，試完一大輪，左諗右度之後，最後都係空手而回，跟她以往秒速掃貨的消費模式，截然不同。
張智霖節目上壓力爆煲大喊
據密友爆料，隨着Chilam早前身體響起警號，加上在節目上壓力爆煲大喊，令靚靚醒覺老公可能隨時要停下來，不能夠再像以前般瘋狂接job，密友表示：「隨住Chilam年紀增長，體力已經負荷唔到龐大的工作量，所以之前萌生退休念頭，靚靚都冇反對，認為身體最重要。不過，魔童今年先開始去外國名牌學府讀書，使費極大，所以靚靚決定喺不必要嘅開支上，收斂一啲。當然唔會話經濟緊絀到完全唔買，但唔同以前咁瘋狂亂掃，於是決心斬甩購物癮。」
魔童遠赴外國留學 每年使近7位數
現年18歲的張慕童（魔童），今年9月中遠赴外國留學，密友透露他的學費加埋住宿及生活等使費，每年都使近7位數字，令到Chilam想退休都唔係咁容易。早前，魔童突然在社交網大晒正面自拍照，見他遺傳父母的優良基因，濃眉大眼、五官精緻，相當靚仔，比爸爸的帥氣有過之而無不及，更被指撞樣《愛•回家》的「金城安」周嘉洛，令不少網民都叫他出道接Chilam的棒。雖然是帥哥一族，但魔童早前在學校畢業禮上單手接證書，就被指不禮貌，惹來非議，Chilam亦認同觀感上似乎不太好，笑稱要「車」兒子兩巴掌以示教訓。看來魔童要踩入娛樂圈，認真要跟爸爸學吓嘢。
手持磚頭市值 「億億聲」
Chilam舉家一直租住淺水灣曼克頓大廈一個逾2千呎的海景豪宅，月租約20萬元。然而，去年8月，他受訪時就自爆正忙於籌備搬新屋的事宜，但就未有透露地點。事實上，Chilam亦鍾情投資物業，於2017年就斥資9,180萬元購入東半山豪宅大寶閣高層單位；另於2023年，又以880萬元購入柴灣工業城2期一個工廈單位，再加上於2014年購入的銅鑼灣希雲街曦巒層單位，他手持的磚頭市值 「億億聲」，即使突然要退休，其實靚靚都冇有怕啦！
《東周網》訪談系列節目《星桄伴我心》9月重磅嘉賓：
即睇：羅毓儀淚眼訴說4段情 冧數林俊其出「七連招」追求 甜蜜剖白：我想出年結婚！
立即追蹤《東周刊》全新WhatsApp頻道，緊貼全城熱話、突發猛料、獨家消息！
