發佈時間：15:09 2025-09-10
翁嘉穗的啤啤熊畫作「此刻的我」，近日在金鐘太古廣場邦瀚斯拍賣行的群展「@N1MALX：非人生活」中展出，展期至本月20日。能夠與Michael Lau、林海峰等知名藝術家的作品一同展出，她笑言自覺好叻。
「揀啤啤熊來畫，一來因為畫展主題係動物，二來反映自己。啤啤熊俾人感覺好得意，外表好吸引，但冇靈魂，就好似啲人覺得我係港姐出身，靠靚樣，冇能力做到任何嘢一樣。」
我手繪我心，用畫作來為自己平反，最好不過。
13歲開始畫畫
讀書時代，美術科已攞A的翁嘉穗，4年前原定舉行個人畫展，但後來因種種原因無奈告吹。直至半年前，她再遇到機會，獲邦瀚斯高層關尚鵬邀請她參展，雙方一拍即合。
「我13歲開始畫畫，初頭畫素描，簡簡單單畫下花、畫下波，後來技巧好啲就畫粉彩畫。覺得自己有天份，就越來越有心機。學到16、17歲，我去咗加拿大讀書，後來選港姐、結婚、生小朋友，直到10幾年前再pick up，報讀SCAD（香港薩凡納藝術設計大學）嘅課程，可惜香港分校後來shut down，完成唔到。」
學校關門大吉，但她想學畫畫團火一直未熄，於是請來學校的professor私人上堂，畫到天昏地暗。
「佢好嚴格，會俾功課我，有次佢問我覺得自己可以畫到幾多？我話畫一幅好快，佢就話：『OK，咁一個禮拜畫3幅。』我畫咗兩幅，個人開始暈暈地，佢就話我一定要知道自己嘅limit，唔可以亂講。嗰時我為咗準備開個展，仲日日畫，畫到膊頭痛。」
數數手指，她歷年已畫了約100幅畫作，全部收藏在她家中的工作室內。畫作已儲夠數量，問她會否索性下次開個展？她笑說：「哈哈，睇定啲先，今次參展真係好榮幸，覺得自己已經好叻㗎喇。」
夢見老公唱歌
翁嘉穗參加畫展，疼錫她的海馬床褥老闆老公鄔友正，帶同細仔謨風現身支持。提到老公早前為參加《中年好聲音4》海選而學唱歌3個月，連黑雨和骨折都堅持上堂，問她有冇「哦」老公？她說：「黑雨當日，我一起身就發現佢出咗門口，問佢喺邊？佢話到咗，好無奈囉。其實老師都話唔好上堂，但鄔生話去緊，上咗車先知黑雨，我心諗：唉⋯⋯」
海選當日，鄔友正因吃錯東西而腹瀉，影響表現。
「同埋我一早同佢講，到時佢會好緊張，佢話：『我唔會囉！』哈哈！結果咪緊張，有啲失準，唔啱拍子。佢之前喺屋企成日練歌，食完晚飯就嚟料，響起〈笑看風雲〉嘅音樂，我發夢都聽到呢首歌呀！鄔生覺得今次冇乜機會入圍，我就覺得佢唱歌有進步，要睇狀態，以前50分，𠵱家有7、80分。」
很多年前，她曾經畫過老公的側面素描，現在畫功進步，可會再畫？她說：「可以諗下，但佢坐唔定。」
老公坐唔定，細仔謨風就黐到她實一實，上月兩母子去香港大球場睇沙特超級盃。「阿仔係C朗fans，儲咗好多球衣、波鞋，今次佢想做球僮，但安排唔到。佢踢波踢得幾好，入咗AC米蘭青訓班，話將來想做足球員，但我擔心，始終容易受傷。」
小朋友的夢想隨時變，她的畫家夢就堅定不移。
