發佈時間：11:00 2025-06-24
TVB的戀愛真人騷《女神配對計劃》播出後，火速成為全城熱話，尤其是癡情男曾展望（GM）與葉蒨文（Sophie）這一對，更加是焦點所在，GM的一句man爆表白：「我唔想你俾人追走！」不單止感動Sophie，也打動了無數港女的芳心，瞬間爆升為男神。
日前GM接受《東周刊》專訪時，除親揭他和葉蒨文（Sophie）的真實關係外，更自爆小時侯有過度活躍症，現時回想當年讀書的頑皮事件，也覺得極度誇張！他笑指，自己的活躍程度是可以跳爛了3張梳化。
小時侯有過度活躍症
今年27歲的GM，出生於美國洛杉磯，3歲時隨家人移居香港，畢業於香港理工大學會計系。原來，他自細已有表演慾，喜歡參加話劇；另外，熱愛拉丁舞的他，更在東亞運動會表演過。2017年，因為在街頭接受《#後生仔傾吓偈》的訪問，怎料隔了約半年，節目組突然聯繫他， 並邀請他加入《#後生仔2 . 0》。相信命運的他說：「有啲嘢真係整定㗎，其實平時我係一個好少返學嘅學生，但係喺街接受訪問嗰日，因為喺學校約咗人見面，所以嗰日就着得齊整啲，咁啱嗰日我又早咗半個鐘放學⋯⋯半年之後就有人打俾我， 去見咗幾次之後， 就加入咗TVB。」
眼前的GM文質彬彬，原來小時侯有過度活躍症，現時回想當年讀書的頑皮事件，也覺得極度誇張！他笑指，自己的活躍程度是可以跳爛了3張梳化：「當年我上堂，每一堂都要攞老師嘅簽名，集齊咁多個簽名之後，就拎去訓導處俾老師睇，少咗個簽名，訓導主任就會問：『你今日係咪曳曳，做過啲咩嚟？』我記得有一次上緊堂，自己無啦啦企起身，搵埋啲同學捉迷藏。當其時覺得好過癮，好high，個心諗，只係跟同學玩啫！當年，阿媽都未發覺我有呢個問題，佢只不過覺得我係比較活潑，比一般小朋友百厭咗啲啫。」
直至有一天，GM覺得要正視這個問題，因為他做每一件事都不能聚焦逾10秒；於是，他找醫生求肋：「醫生同我講，我嘅過度活躍症都幾嚴重，需要食藥。我食咗藥之後，雖然平靜咗，但係就會有抑鬱嘅感覺，唔開心，做事提唔起勁；之後，我就用做運動及睇書來平靜自己，唔再食藥。」據悉，Sophie都有輕微的過度活躍症，難怪兩人那麼投契。
上龍虎山參加「授籙儀式」 做道士幫人
雖然與Sophie的年齡相差5歲，但GM曾上過龍虎山參加「授籙儀式」，並考取道士資格，故修為及悟性都相當高，絕對能將兩人的距離拉近。GM表示，因八卦而驅使他去認識道教：「讀大學時，我有個同學撞鬼，我哋一齊去過沙灘玩，凌晨三、四點，佢竟然見到有一個小朋友行過。返到宿舍，佢望落去，又見到嗰個小朋友圍住個泳池跑；之後，搭上搭識到個師傅，話可以解決呢啲嘢。我咪好八
卦咁陪佢去囉，跟住就識咗呢個師傅。」
GM續說：「其實，當時我覺得除咗呢啲神怪嘢，呢個師傅講嘢非常之有道理，我覺得佢係一個幾好嘅人生導師，所以就想跟佢學習，就入咗道教。」多年來，他從道教中領悟到要活在當下之餘，更學識了不少法術去幫人：「我一路以來都有學唔同嘅法，例如：驅鬼、符咒，亦有學招財、升運，我自己比較多做嘅就係幫人醫病痛，我唔會攞嚟當搵錢，主要幫朋友。我可以用花字（通常用來加強符咒的靈力，讓法術更有效應驗），幫你寫劍紙，寫完你真係會立即覺得好啲。我都幫過好多同事，例如之前同吳若希做《奇情谷》，佢話瞓捩頸，跟住我幫佢寫花字，佢立即郁得番。佢好好笑，開咗個神醫群組，叫咗一堆朋友加入群組俾我醫病！」當然，GM就沒有向Sophie施「和合咒」，令她乖乖愛上自己啦！
