發佈時間：14:20 2025-06-16
有「翻版王浩信」之稱的林俊其在昨晚（6月15）播出的一集《女神配對計劃》亮相，他公開表示想追求羅毓儀（Yuki）：「因為我覺得Yuki係一個需要多啲陪伴鼓勵，可能佢鍾意睇戲、睇動漫、或鍾意食某啲嘢，我都會陪佢先。我希望之後如果你有好多煩惱，又或者做嘢方面嘅嘢，我會想同你一齊研究、一齊去進步，希望有呢個機會。」冧到羅毓儀感動得眼泛淚光。
林俊其幕後表白 羅毓儀零反應
林俊其Kris在幕後向心儀女神勇敢告白：「我覺得佢每做一件事都會好驚、同埋都會諗好多嘢，所以就阻住咗佢行前一步。但我想講你相信自己就可以；同埋如果可以嘅話，我想做你輔助。」
但由於當時林俊其Kris未有開名，女主角羅毓儀Yuki全程感受不到這分濃濃愛意，全程眼仔碌碌零反應，之後葉蒨文Sophie見狀即出手幫忙撳燈，讓林俊其Kris有出場表白機會，Sophie：「我冇理由唔畀你爭取。」最終林俊其Kris在主持林盛斌Bob引領下、講出心儀女神是羅毓儀Yuki，令全程沒有想過自己就是女主角的Yuki大為震撼：「我依家個心跳得好快，我以為你講緊Step（李芷晴）。」
羅毓儀被真誠表白感動 眼泛淚光
羅毓儀Yuki得知對方對自己有意，稍作鎮定後才問Kris：「你幾時開始…（鍾意我）？我哋都識咗一段時間？」Kris聞言害羞地笑說：「坦白講都有留意好耐架喇，直到有次公司大型show見到佢有個位唔夠高拎嘢，佢嗰個動作係咁嘅（說畢即作踮腳趷高伸手狀），跟住我好想過去幫佢…」並冧爆表示喜歡Yuki「成日笑」！之後Kris行到Yuki面前、以極溫柔聲線繼續情深告白：「我個人都比較慢熱少少嘅，希望可以慢慢咁樣靠近你，希望唔好好似啱啱咁，一嚟就嚇親你。」
全程冧到面紅紅的羅毓儀Yuki，感動得眼泛淚光地回應：「唔會呀，我其實好開心…因為…嗯…er…嗯…係喇，好開心。」說畢更忍不住抬頭以水汪汪的大眼睛望向Kris，至於Kris亦是全程甜笑不斷，青澀程度猶如初戀告白現場，引發全場女神瘋狂尖叫，Yuki則害羞大叫救命：「完未呀？呢個環節！」
放棄21歲小鮮肉 給林俊其追求機會
最終羅毓儀被林俊其的真誠表白感動，她最後決定放棄只有21歲的康嘉泰，將其中一個位置讓給林俊其，給林俊其一個追求和了解自己的機會，林俊其得知自己打動到女神賜予機會，即時綻放出甜美笑容。羅毓儀和林俊其雖然都顯得比較怕怕醜醜，但期間還是忍不住一再甜笑及甜蜜對望，隔着個芒都Feel到甜！
Yuki事後接受製作組訪問時，亦為Kris如此了解及包容自己感動至數度哽咽：「佢不單止睇得出自卑嘅我，我覺得佢直頭包容咗呢樣嘢，甚至乎係因為呢樣嘢鍾意我。我估唔到會有人鍾意咁樣嘅自己，所以佢咁講我嗰下有啲激動。」
林俊其被稱「翻版王浩信」入行9年
林俊其於2016年入行，在TVB擔任特約演員，2017年則以模特兒身份拍攝廣告或微電影。2018年，他考TVB藝員訓練班，翌年畢業後正式加入TVB。由於他樣貌及聲線酷似視帝王浩信，故被稱「翻版王浩信」和「王浩信2.0」因此他三度在劇集《兄弟》、《反黑路人甲》及《踩過界II》中，飾演其角色的年輕版和擔任替身而為人認識 。
2020年林俊其在《愛·回家之開心速遞》裏飾演「藍浩信（Signal）」一角，引起觀眾注目。
林俊其多年來拍過不少劇集，包括《食腦喪Ｂ》、《七公主》、《白色強人II》、《破毒強人》、《黑色月光》等，近年林俊其在《反黑英雄》演古惑仔「番茄」，憑着出色的表現，成功入屋，當中他怒打顏千汶一幕更引起關注。另外，於《黑色月光》飾演「富三代渣男」蔣基俊的年輕版，奸到出汗的演繹大獲好評。
林俊其在近日熱播中的《刑偵12》飾演張振朗的拍擋，戲分比之前多，拍住影帝張振朗查案，演技表現亮眼。在演藝工作外，林俊其也發奮圖強，跟好友鄒兆霆在旺角經營手搖飲品店。
